Ezra El Luti Mwet uh Ke Masap luhn God

Oasr ke yac 70 tari tukun inkaiyen mwet Israel fohlohklac nuh Jerusalem, tuhsruhktuh srackna oasr kuhtuh suc muhta ke acn pucspucs sahyac ke tohkohsrahi luhn Persia. Sie sin mwet inge pa mwet tol Ezra, suc luti masap luhn Jeova. Ezra el lotwelah lah mwet suc muhta fin acn Jerusalem eltahl tiac ukwe Masap uh, pwacnacng el luhngse in som nuh we tuh elan kahsreltahl. Tohkohsrah Artaxerxes luhn Persia el fahk nuh sel Ezra: ‘God el orekom in lahlmwetmwet tuh kom in luti Masap lal uh. Kom som, ac mwet suc luhngse in wi kom som nuh Jerusalem, eltahl kuh in som.’ Ezra el sramsram nuh sin mwet nuhkewa suc luhngse in fohlohk nuh Jerusalem. Eltahl puhruhe meet nuh sin in Jeova in karuhnguhnuhltahl ke fuhfahsryucsr laltahl, na eltahl som.

Tukun mahlwem ahkosr, eltahl sun acn Jerusalem. Mwet fihsrack suc muhta we eltahl fahk nuh sel Ezra: ‘Mwet Israel uh seahkos Jeova ac eltahl pahyuckyak nuh sin muhtwacn suc alu nuhke ma sruhloaclah.’ Meac Ezra el oruh? Ye muhtuhn mwet Jew el sikuckmuhtuhnte ac puhruhe: ‘Jeova God, puhslaclac tari ma kom oruh nuh sesr, tuhsruhktuh kuht srackna oruh ma koluk nuh sum.’ Mwet Jew eltahl auliyak, tuhsruhktuh srackna oasr ma suhtuhuh ma eltahl oruh. Ezra el sulaclah mwet mahtuh ac mwet nuhnuhnkuh in ahksuwohsye ma inge. Ke mahlwem tolu tohkoh, mwet suc tiac alu nuh sin Jeova sapkihnyuck in som luhkeltahl.

Yac 12 somlah tari. Pot luhn Jerusalem muhsahiyucklac. Ezra el sap nuh sin mwet Jew eltahl in fahsreni nuhke acn in toeni luhn mwet uh tuh elan kuh in riti nuh seltahl Masap luhn Jeova. Ke pacl se ma Ezra el ikacslah puk in masap ah, mwet nuhkewa tuyak. El kaksakuhnuhl Jeova, ac mwet Jew eltahl kohlwack paholtahl nuh lucng in ahkkahlwemye lah eltahl insese nuh kac. Tukun ma inge, Ezra el riti ac ahkuhtweyac Masap, ac eltahl lohng ahkwoyac. Eltahl fahk lah eltahl sifwilpac kuhnahoslah masap luhn Jeova, ac eltahl tuhng. Ke lwen se tok ah, Ezra el tahfwelah in riti Masap nuh seltahl. Eltahl lotwelah lah pacl in ahkfuhlwactye Kuhfa luhn Iwen Ahktucktuck. Eltahl sa na in ahkolah nuhke ahkfuhlwact se inge.

Ke lusen lwen itkohsr, mwet uh eltahl enganwack ac sang kuloh nuh sin Jeova ke srihpen puhslaclac ma eltahl kosracni ke imac laltahl. Pa inge lwen se ma eltahl sifwilpac oruh Kuhfa in Iwen Ahktucktuck, tiacna orek mwe ahkfuhlwact se inge muhtwacwacack in pacl lal Joshua. Tukun sahflah kuhfa inge, mwet uh tuhkweni nuh sie ac puhruhe ohinge: ‘Jeova God, kom ahksukohsohkyekuhtlac oacna mwet kohs, kihte kuht yen mwesis, ac kom acse nuh sesr acn na kahto. Tuhsruhktuh pacl puhs kuht seahkos kom. Kom suhpwacma mwet pahluh in sensenkackihn kuht, tuhsruhktuh kuht tiacna porongo. Kom mongfihsracsr nuh sesr ke pacl puhs. Kom ahkpwacyeye wuhlelah lom nuh sel Abraham. Kuht wuhlelah nuh sum ingena lah kuht ac fah ahkos kom.’ Eltahl suhmuhslah ma eltahl wuhlelah inge, ac mwet fihsrack, mwet Levi ac mwet tol eltahl fihliyac sil laltahl kac.