Pahon Mwet Se Sihm Ke Pesinkac

Tukun yac ekahsr, Belshazzar el eklac tohkohsrah in acn Babylon. Sie fong ah, el solacni sie tausin mwet fuhlwact luhn muhtuhnfacl sacn nuhke kuhfa se. El sapkihn mwet kuhlwacnsap lal in use cup gold ma Nebuchadnezzar el uslah liki tempuhl luhn Jeova. Belshazzar ac mwet ma el solacni inge eltahl tuhkweni nihm wain kac ac kaksakihn god nuhkewa laltahl. In kihtin pacl ah na, poun mwet se sikyak ac muhtwacwacack in sihm kahs sakihrihk ke pesinkac in acn in mongo.

Belshazzar el arulacna sahngweng. El pahngoneni mwet susfa ac wuhlelah nuh seltahl: ‘Mwet se suc kuh in fahkma nuh sihk kalmen kahs ma sihmlac inge, nga ac oruh tuh el ac fah mwet leum se ahktolu fin acn Babylon.’ Eltahl srihke, tuhsruhktuh wacngihn sie seltahl kuh in ahkuhtweyac kalmac uh. Na muhtwacn kasra se el utyak ac fahk: ‘Oasr mwet se, inel pa Daniel, suc in pacl somlah ah el ahkuhtweyac nuh sel Nebuchadnezzar ma uh. El kuh pac in ahkuhtweyac nuh sum kahs ma sihmlac ingacn.’

Na Daniel el som nuh yurin tohkohsrah. Belshazzar el fahk nuh sel: ‘Kom fin kuh in riti ac ahkuhtweyac kalmen ma sihmlac inge, nga ac sot soko ah gold ac kom ac fah mwet leum se ahktolu fin acn Babylon.’ Daniel el fahk: ‘Nga tiac enenuh mwe sang lom an, tuhsruhktuh nga ac fah fahk nuh sum kalmen kahs inge. Pahpah tomom Nebuchadnezzar, el arlac inse fuhlwact, pasis Jeova el ahkpuhsisaclye. Kom etuh ma sikyak nuhkewa nuh sel, tuhsruhktuh kom tiac pac suhnakihn Jeova ke kom nihm wain ke cup gold ma uslah liki tempuhl Lal. Pa ingacn srihpac se oruh God el suhmuhslah kahs inge: Mene, Mene, Tekel, ac Parsin. Kalmac pa, mwet Mede ac mwet Persia ac fah kuhtanglah acn Babylon, ac kom ac fah tilac tohkohsrah.’

Luhman wacngihn muhtuhnfacl sahyac kuh in kuhtanglah acn Babylon. Oasr pot mahtoltol luhn siti se inge ac infacl na loal raunelah acn se inge. Tuhsruhktuh in fong sacn, mwet Mede ac mwet Persia uh tuhkuh mweun. Tohkohsrah Cyrus luhn acn Persia oruh tuh kof ke infacl soko inge sohrohrlah nuhke acn sahyac tuh mwet mweun lal in fahsr sahslah infacl soko inge nuhke sruhnguhl luhlahp ke siti uh. Ke eltahl sun acn we, eltahl liye tuh ikacklah sruhnguhl luhlahp! Eltahl utyak ac sruokyac siti se inge, ac acnwucki tohkohsrah se. Pwacnacng Cyrus pa eklac mwet leum luhn Babylon.

Ke soenna sun yac se, Cyrus el fahk: ‘Jeova el sapkihn yuc in sifwil muhsahelah tempuhl lal in Jerusalem. Mwet nuhkewa suc luhngse in kahsruh kac, komtacl kuh in som.’ In oacna ke ma Jeova el wuhlelah, puhs mwet Jew eltahl fohlohklac nuhke acn seltahl inge tukun kuhnanuclac luhn Jerusalem yac 70 somlah. Cyrus el sap eltahl in us cup gold ac silver, kuhfa nuhkewa ma Nebuchadnezzar el uslah liki tempuhl. Yac kom liye lah fuhkah Jeova el orekmakuhnuhl Cyrus in kahsruh mwet lal uh?