Sie Tohkohsrahi Ma Oacna Soko Sahk Na Luhlahp

Sie fong ah, Nebuchadnezzar el tuh oruh sie mwemwe na ahksahngweng. El pahngon mwet lahlmwetmwet tuh in ahkuhtweyac nuh sel kalmen mwemwe se lal inge. Tuhsruhktuh, wacngihn sie seltahl kuh in ahkuhtweyac kalmen ma inge. Sahflahiyac, tohkohsrah el sramsram nuh sel Daniel.

Nebuchadnezzar el fahk nuh sel Daniel: ‘Ke mwemwe se luhk, nga tuh liye soko sahk. Sahk soko inge kapwack arlacna loes nwe ke na sun yen engyeng uh. Mwet facluh nohfohn kuh in liye. Sra kac uh arulacna kahto ac fahko kac arulacna ungung. Kosro lwemnak uh monglac ye lulin sahk uh, won uh oraclah ahng laltahl ke lesahk uh. Tok, sie lipufacn oatume inkuhsrao me. El fahk: “Pakiyac sahk soko an, ac wotelah lah kac an; yolla sra kac. Ac fihliyac sruen sahk sacn in oanna infohk uh, ac loseni ke mwe lohl oreklac ke osra iron ac bronze. Ke lusen yac itkosr el ac fah tiac nuhnak oacna mwet uh, a el ac nuhnak oacna kosro uh. Mwet in acn nukewa in etuh lah God Fuhlwactlacna pa Leum ac El kuh in sang tohkohsrahi nuh sin kuhtwena mwet suc el sulaclah.”’

Jeova el fahk nuh sel Daniel kalmen mwemwe sac. Ke pacl se Daniel el etwaclah kalmen mwemwe sac, el sahngweng. El fahk: ‘O Tokosra, nga kena tuh mwemwe sac in ahkuhtweyucki muh uh ma nuh sin mwet lokoalok lom, ac in tiac ma nuh sum, a ma inge ma keim. Kom pa sahk fuhlwact soko ma pakwelah. Tohkohsrahi lom ac fah tuhlac liki kom, ac kom ac fah mongo mah oacna kosro lwemnak. Ac ke srihpen lipufacn se sapkihn in fihliyac sruen sahk sac in oanna infohk uh, kom ac fah sifwilpac tohkohsrah.’

Tukun yac se, ke Nebuchadnezzar el forfor fin acn lucng ke lohm luhlahp sel ac el liye acn Babylon, el fahk: ‘Arlacna kahto ac oaskuh siti se inge ma nga muhsahelah. Nga suhmaht na pwacye!’ Ke pacl ma el fahk ma inge, oasr puhsra se ma kahslah inkuhsrao me ac fahk: ‘Nebuchadnezzar! Inge wal in tohkohsrah lom itucklac liki kom.’

In pacl sacn, Nebuchadnezzar el wellac ac ohiyacl eklac oacna kosro lwemnak. Lisyuckyak el liki lohm luhlahp sel ac muhta insahk uh yurin kosro lwemnak. Aunsifacl Nebuchadnezzar kapwack oacna unen eagle uh, ac tukinpahol oacna tukinnien won uh.

Tukun yac itkosr, Nebuchadnezzar el sifwilpac wolac ac Jeova el fohlohkuhnuhlwack oacna tohkohsrah luhn Babylon. Tukun ma inge Nebuchadnezzar el fahk ohinge: ‘Kaksakihn Jeova, Tohkohsrah inkuhsrao. Ingena nga etwelah lah Jeova pa Leumi ma nuhkewa. El ahkpuhsiselyelah mwet suc inse fuhlwact ac el kuh in sang tohkohsrahi nuh sin kuhtwena mwet suc el luhngse.’