MWE LUTLUT 64
Daniel Ke Luhf In Lion
Darius suc sie mwet Mede, el sie pac sin tohkohsrah fin acn Babylon. Darius el liye tuh Daniel el wo ac lahlmwetmwet. Pwacnacng, el oracllah Daniel elan leum fin mwet luhlahp luhn acn se inge. Mwet inge eltahl sok sel Daniel pa oruh eltahl luhngse tuh in acnwucki el. Eltahl etuh lah Daniel el puhruhe nuh sin Jeova pacl tolu ke lwen se, pa sis eltahl fahk nuh sel Darius: ‘Oh tohkohsrah, kuht enenuh in oraclah masap muh mwet nuhkewa eltahl in puhruhe nuh sum muhkwena. Kuhtwena mwet suc tiac ahkos masap se inge ac fah sisiyang nuh in luhf in lion.’ Darius el luhngse masap se inge, pa oruh el sainiyac ma inge.
Ke pacl sena Daniel el lohng masap sasuc se inge, el fohlohklac nuh in lohm sel. El ikacslah sie winto, ac sikukmutunteyak ac puhruhe nuh sin Jeova. Mukul inge suc sok sel Daniel eltahl utyak nuh in lohm sel ac eltahl liyacl ke el puhruhe. Eltahl kahsruhsr som nuh yohrohl Darius ac fahk: ‘Daniel el tiacna ahkos kom. El puhruhe nuh sin God lal pacl tolu ke lwen nuhkewa.’ Darius el luhngse Daniel ac el sruhnga elan misac. Lwen fohn se el sang kuhiyacl in suk inkacnek in molwellah Daniel. Tuhsruhktuh el sainyac tari masap se, el tiac kuh in ekullah ma inge. Pwacnacng finne el sruhnga, el sapkihn in sisilac Daniel nuh in luhf in lion suhlallacl uh.
In fong sac, Darius el koflahna mutullac ke el nuhnkuh yohk kacl Daniel. Toang na in lutu se tok ah, el silahklahk som nuhke luhf sac, ac pahngnol Daniel ac siyuck: ‘Yac God lom el molikomlac?’
Darius el lohng puhsren mwet se. Daniel pa ngacn! El fahk nuh sel Darius: ‘Lipufacn se luhn Jeova el kaliyac oalin lion uh, oruh eltahl tiac kuh in ngalisyucwi.’ Darius el arlacna enganack! El sap in amacyuk Daniel liki luhf sac. Wacngihn kihnet ac kuhtwena ma sikyak nuh sel Daniel. Na tohkohsrah el sap: ‘Sisiyang nuh in luhf sac mwet nuhkewa ma tuh ahkkolukyacl Daniel.’ Meet liki na eltahl sun kapihn luhf sac, lion uh ngalisyac ac kotkotweyac nohfohn sri kaclos uh.
Darius el sapkihn: ‘Mwet nuhkewa in sahngweng ac akfuhlwactye God lal Daniel. El molwellah Daniel liki lion uh.’
Yac kom puhruhe nuh sin Jeova lwen nuhkewa, oacna Daniel?
“Jeova El etuh lah El ac molwelah fuhkah mwet suc luhngse el liki mwe srihke nuh selos.”—2 Peter 2:9, NW