Eltahl Tiac Pahsrlah

Yac ekahsr tukun Nebuchadnezzar el oruh mwemwe lal ke ma sruhloaclah, el sap in oreklac ma sruhloaclah gold na luhlahp se. El sap tulokyak in acn tuhpahsrahsr se pahngpahng Dura, ac sapkihn mwet pwacpa fuhlwact lal nuhkewa in fahsreni, weluhlacng Shadrach, Meshach ac Abednego, in tuhkweni nuh sie ye muhtuhn ma sruhloaclah sac. Tohkohsrah el sapkihn: ‘Kowos fin lohng puhsren mwe ukuk, harp, ac kain in mwe sritacl on nuhkewa sahyac, komtacl in pahsrlah nuhke ma sruhloaclah! Kuhtwena mwet suc tiac pahsrlah ac fah sisiyang nuh in sie funyu in e fihrihr uh.’ Yac mwet Hebrew tolu inge ac fah pahsrlah nuhke ma sruhloaclah, kuh yac eltahl ac alu nuh in Jeova muhkwena?

Tohkohsrah el sap tuh mwe on nuhkewa inge in sritaclkihnyuck. Mwet nuhkewa pahsrlah ac alu nuhke ma sruhloaclah, tuhsruhktuh Shadrach, Meshach ac Abednego eltahl tiac na pahsrlah nuh kac. Kuhtuh sin mwet liye ma inge ac fahk nuh sin tohkohsrah: ‘Mwet Hebrew tolu eltahl sruhnga in alu nuhke ma sruhloaclah.’ Nebuchadnezzar el sap in utuckuh mwet tolu inge nuh ye muhtahl ac fahk: ‘Nga ac usot sie pac pacl nuh sumtacl in alu nuhke ma sruhloaclah. Komtacl fin tiac ahkos, nga ac sap in sisiyang komtacl nuhke funyu in e fihrihr. Wacngihn god kuh in molikomtacllah.’ Eltahl tohpohklah: ‘O tohkohsrah, kuht tiac enenuh sie pac pacl. God lasr el kuh in molikuhtlac, ac El finne tiac molikuhtlac, kuht ac fah tiacna pahsrlah nuhke ma sruhloaclah sac.’

Nebuchadnezzar el arlac foloyak. El fahk nuh sin mwet lal: ‘Komtacl in tanak e uh in fol pacl itkosr yohk liki pacl nuhkewa!’ Tok el fahk nuh sin mwet mweun lal: ‘Kapriya mwet tolu inge, ac siselosyang nuh in funyu in e fihrihr sac!’ Ke srihpen funyu in e sac arlacna fol, oruh mwet mweun inge sa na misac ke eltahl apkuhranyang nuh kac. Mwet Hebrew tolu inge puhtatyang nuh in e sac. Tuhsruhktuh, ke pacl se ma Nebuchadnezzar el ngwetlah nuh in funyu in e sac, el liye mwet ahkosr pa forfor in e se inge, ac tiac mwet tolu na. El fwefwelac ac siyuck sin mwet fuhlwact lal: ‘Kuh tiac mwet tolu pa kuht sisang nuh in e uh? Ac efuh kuh mwet ahkosr pa nga liye? Ac mwet se ahkahkosr oacna luhman lipufacn se!’

Ohinge Nebuchadnezzar el fahsryang nwe ke muhtuhn funyu fihrihr sac, pahngyak ac fahk: ‘Komtacl suc mwet kuhlwacnsuhpuh God Fuhlwactlacna, oatume!’ Mwet nuhkewa we arlac lut ke eltahl liyacl Shadrach, Meshach ac Abednego eltahl tiacna follah ke e sac. Aunsifacltahl, kololtahl, ac nuknuk laltahl tiacna fihrihryak, ac eltahl tiac pac fo kuhlasrlah ke e sac.

Nebuchadnezzar el fahk: ‘God lal Shadrach. Meshach ac Abednego arlacna kuh. El suhpwacma lipufacn lal in molweltahllah. Wacngihn god sahyac oacna God laltahl.’

Oacna mwet Hebrew tolu inge, yac kom luhngse in sruokyacna oaru lom nuh sin Jeova finne oasr kuhtwena ma sikyak?