Sie Tohkohsrahi Ma ac Oan Ma Pahtpaht

Ke sie fong ah, Tohkohsrah Nebuchadnezzar el mwemwei siena kain in mwemwe. Yohk fohs lal kac, oruh elan koflah mutul. El pahngonma mwet susfa in tuhkuh ac fahk nuh seltahl: ‘Ahkuhtweyac mwemwe sac luhk nuh sihk.’ Eltahl fahk: ‘Tohkohsrah, fahkma nuh sesr mwemwe sacn.’ Tuhsruhktuh Nebuchadnezzar el fahk nuh seltahl: ‘Moh! Komtacl ac fahkma nuh sihk mwemwe sac, kuh nga ac fah unikomtacluh.’ Eltahl sifwilpac fahk nuh sel: ‘Fahkma na lah mwemwe fuhkah se, na kuht ac fah ahkuhtweyac kalmac an.’ El fahk: ‘Komtacl nuhkewa srihke na in kiacpweyuclac. Fahkma lah meac mwemwe sac!’ Eltahl fahk nuh sin tohkohsrah: ‘Wacngihn sie mwet fin facluh nohfohn ac kuh in oruh ohinge. Ma kom siyuck arulacna upac in orek.’

Nebuchadnezzar el foloyak ac el sapkihn in acnwucki mwet lahlmwetmwet nuhkewa fin acn uh. Weluhlacng pac Daniel, Shadrach, Meshach, ac Abednego. Daniel el siyuck sin tohkohsrah tuh lan pakiyac sie pacl nuh sel. Tohkohyang, el ac mwet kawuck lal uh puhruhe nuh sin Jeova ac siyuck in kahsreltahl kac. Meac Jeova el oruh?

Ke sie aruhruhma, Jeova el ahkkahlwemye nuh sel Daniel mwemwe sac lal Nebuchadnezzar ac kalmen ma inge. Lwen se tok uh, Daniel el som nuh yurin mwet kuhlwacnsap luhn tohkohsrah ac fahk: ‘Nimet uniye kuhtwena mwet lahlmwetmwet. Nga kuh in ahkuhtweyac mwemwe sac luhn tohkohsrah.’ Mwet kuhlwacnsap sac pwacnuhlwack Daniel nuh yohrohl Nebuchadnezzar. Daniel el fahk nuh sin tohkohsrah se: ‘God el ahkkahlwemye ma suc ac sikyak in pacl fahsruh uh nuh sum. Pa inge kalmen mwemwe sacn: Kom liye ma sruhloaclah na yohk ma sifac ah oreklac ke gold, iniwac ah ac paho ah orek ke silver, infulwacl ac intwel oreklac ke copper, niyacl oreklac ke osra, ac falkacl oreklac ke osra ac fohk kle akulamisak. Na eot na luhlahp se tufwaclah liki fin ohl se, twe sun niacn ma sruhloaclah se. Ma sruhloaclah se muhsahlsahluh, mokutkuti ac eng ah oklah ma inge. Eot sac yohkwelihk nwe oacna ohl soko, ac afihnyac facluh nohfohn.’

Daniel el fahk pac: ‘Pa inge kalmen mwemwe sac lom: Tohkohsrahi lom pa sifac se ma oreklac ke gold. Silver pa sie tohkohsrahi ma ac fah sikyak tukum. Tohkoh ac oasr pac sie oacna copper, ma ac leumi facluh nohfohn. Tohkohyang oasr tohkohsrahi se ma ac fokoko oacna osra uh. Sahflahiyac, ac fah kihtakatwelihk tohkohsrahi ma ahkkahlwemye lah kuhtuh ip kac kuh oacna osra, ac kuhtuh muhnahs oacna fohk kle. Eot sac ma eklac ohl soko pa Tohkohsrahi luhn God. Ma inge ac fah kuhnahoslah tohkohsrahi inge nuhkewa ac fah oan na nwe tok.’

Nebuchadnezzar el pahsrlah nwe ten ye muhtahl Daniel. El fahk: ‘God lom el ahkkahlwemye mwemwe sacn nuh sum. Wacngihn God sahyac oacna el.’ El tiac sap in acnwucki Daniel, a Nebuchadnezzar el oracllah Daniel in pa leum fin mwet lahlmwetmwet nuhkewa ac mwet fuhlwact fin acn Babylon nohfohn. Yac kom nuh liye lah fuhkah Jeova el tohpohklah puhruhe lal Daniel?