Un Mwet Mweun luhn Jeova Wi Chariot E

Tohkohsrah luhn acn Syria, suc pahngpahng Benhadad, el tahfwelah na in mweuni acn Israel. Tuhsruhktuh, ke srihpen mwet pahluh Elisha el sensenkuhnuhl tohkohsrah luhn Israel ke kais sie pacl, pwacnacng oruh elan kuh in kahinglac. Ke ma inge, Benhadad el sulaclah elan sruokilyac Elisha. El konwacack lah Elisha el tuh muhta ke siti Dothan, ac el suhpwaclah mwet mweun luhn Syria in som ac sruokilyac we.

Mwet Syria inge tuhkuh nuh Dothan ke fong. Ke lotutacng se tok ah, mwet kuhlwacnsap se lal Elisha ah illac liki lohm ah ac tuh liye lah un mwet mweun na luhlahp se raunelah siti uh. El arlacna sahngweng ac wowoyak: ‘Elisha meac kuht ac oruh?’ Elisha el fahk nuh sel: ‘Puhs mwet wi kuht luhkeltahl.’ In pacl sac na, Jeova el oruh tuh mwet kuhlwacnsap se lal Elisha inge in liye pe ohl uh ma raunelah siti nuhkewa sesseslah ke ors ac chariot e in mweun.

Ke pacl se mwet solse luhn acn Syria inge srihke in sruokilyac Elisha, el puhruhe: ‘Jeova, nuhnak muhnahs oruh tuh in kunlac muhtahltahl.’ Ke kihtin pacl ah na, eltahl finne kuh in liye, tuhsruhktuh mwet solse inge tiac etuh lah eltahl oasr oyac. Elisha el fahk nuh sin mwet solse inge: ‘Komtacl oasr ke sie pacna siti. Fahsr tukuk, nga ac fah pwen komtacl nuh yurin mwet se komtacl suk an.’ Eltahl ukwacl Elisha som na ne Samaria, yen se ma tohkohsrah luhn acn Israel muhta we.

Mwet solse Syria inge akihlacnwack lah eltahl oasr oyac tuh nuh pahtlac tari. Tohkohsrah luhn acn Israel siyuck sel Elisha: ‘Yac nga ac oneltahluh?’ Yac Elisha el orekmakihn pacl wo se inge in fohlohksahk nuh sin mwet inge ke eltahl srihke in unilyac ah? Moh. Elisha el fahk: ‘Nikmet oneltahluh. Sang kuhtuh mongo an nwacltahl ac suhpwacltahllah in som.’ Pwacnacng, tohkohsrah el oraclah kuhfa na yohk se nuh seltahl ac suhpwacltahllah nuh yen seltahl ah.