Kaiyuck Muhtwacn Kasra Na Koluk Se

Tohkohsrah Ahab el kuh in liye imac in grape se luhn mukul se pahngpahng Naboth ke sie winto ke lohm in muhta sel fin acn Jezreel. Ahab el luhngse imac se inge, pwacnacng el srihke elan molwelah sel Naboth. Tuhsruhktuh, Naboth el sruhnga in kuhkwackuhnacng nuh sel mweyen ac lain Masap luhn Jeova in kuhkwackihn ipin acn se ma sie mwet el usrui. Yac Ahab el akihlen orekma suwohs lal Naboth inge? Moh. Ahab el arlacna kasrkuhsrak. Yohk toasr lal oruh elan tiac luhngse in tufoki liki infuckihl lal, ac el sruhnga pac in mongo.

Kasra Jezebel, muhtwacn koluk se kiyacl Ahab inge el fahk: ‘Kom pa tohkohsrah luhn acn Israel. Kom kuh in eis ma nuhkewa ma kom luhngse. Nga ac eislah acn se ingacn lom.’ El suhmuhslah lwacta nuh sin mwet kol in siti uh in fahk nuh seltahl in orek loh kikiacp muh Naboth el selngawi God ac tatngal el nwe ke na el misac. Mwet kol inge oraclah oacna ke ma Jezebel el sapkihn nuh seltahl, na Jezebel el fahk nuh sel Ahab: ‘Naboth el misac! Imac in grape se inge ma lom.’

Tiac Naboth muhkwena pa Jezebel el uniyac. El uniyac pac mwet pucspucs suc luhngse Jeova. El alu nuhke ma sruhloaclah ac oruh pac ma koluk sahyac. Jeova el liye nohfohn ma koluk ma Jezebel el oruh inge. Meac el ac oruh nuh sel?

Tukun Ahab el misac, Joram wen nahtuhl el eklac tohkohsrah. Jeova el suhpwaclah sie mukul pahngpahng Jehu in kael Jezebel ac sucu lal uh.

Jehu el kahsruhsr ke chariot nahtuhl nuh Jezreel, yen ma Jezebel el muhta we. Joram el tuhkuh ke chariot nahtuhl sifacna in ohsun nuh sel ac el siyuck: ‘Yac oasr mislac inmahsrlosr?’ Jehu el fahk: ‘Ac wacngihn mislac ne ke na ninac kiom, Jezebel el oruh ma koluk.’ Joram el srihke elan furohklah chariot nahtuhl ah ac kahinglac. Tuhsruhktuh, Jehu el pihsrkilyac ke mwe pihsr nahtuhl ac el misac.

Na Jehu el som nuhke lohm in muhta sel Jezebel. Ke pacl se el lohngack lah Jehu el ac tuhkuh, el tuhnwaclah muhtahl, nahwelah aunsifacl ac soanel ke sie winto lucng. Ke pacl se ma Jehu el sun acn we, el painguhl ke inkacnek tiac kuhlwacng. Jehu el wowoyak ac sapkihn nuh sin mwet kuhlwacnsap lal Jezebel ma tu siskacl ah: ‘Sisuhllah nuh ten!’ Eltahl sisuhllah Jezebel liki winto sac, ac el puhtatlac nuh infohk uh ac misac.

Tukun ma inge, Jehu el uniyac wen 70 nahtuhl Ahab ac ahknwacsnwacsyelah acn ma eltahl alu nuh sel Baal we ingacn. Yac kom kuh in liye lah Jeova el etuh ma nuhkewa ac ke pacl fal, el ac sang kai nuh sin mwet suc oruh ma koluk uh?