Jeova El Karuhnguhnuhl Jehoshaphat

Jehoshaphat, tohkohsrah luhn acn Judah, el kuhnahoslah mwe loang lal Baal ac ma sruhloaclah nuhkewa fin acn we. El ke mwet uh in etuh ke masap luhn Jeova. Pwacnacng, el suhpwaclah mwet fihsrack ac mwet Levi nuh fin acn Judah nohfohn in luti masap luhn Jeova nuh sin mwet uh.

Muhtuhnfacl siskacltahl inge sahngweng in lain mwet Judah ke srihpen eltahl etuh lah Jeova el wi mwet lal uh. Eltahl oacyacpac us mwe sang nuh sel Tohkohsrah Jehoshaphat. Tuhsruhktuh ke kuhtuh pacl tok, mwet Moab, mwet Ammon ac mwet suc muhta ke finohl Seir, eltahl tuhkuh mweuni acn Judah. Jehoshaphat el etuh lah el enenuh kahsruh sin Jeova. El oracni mukul, muhtwacn ac tuhlihk nuhkewa in tuhkweni nuh sie fin acn Jerusalem. El tu ye muhtuhn mwet uh, ac el puhruhe: ‘Jeova, kom fin tiac wi kuht, kuht tiac kuh in kuhtanglah. Nuhnak muhnahs fahk nuh sesr ma kuht in oruh.’

Jeova el tohpohklah puhruhe laltahl: ‘Kowos in tiac sahngweng. Nga ac fah kahsre kowos. Ahkolah na ac soano, kowos ac liye ke nga ac fah molikowoslac.’ Jeova el molweltahllah fuhkah?

Ke lotutacng se tok ah, Jehoshaphat el sulaclah mwet on ekahsr ac fahk nuh seltahl in fahsr meet liki mwet mweun uh. Eltahl fahsr Jerusalem lac nuhke yen in mweun uh ke acn se pahngpahng Tekoa.

Ke pacl se mwet in on inge kaksakihn Jeova ke puhsra luhlahp, Jeova el mweun ke mwet lal inge. El oruh tuh mwet Ammon ac Moab inge in fohsack pwacnacng eltahl foracni amweuni inmahsrloltahl sifacna, ac wacngihn sie seltahl moullac. Tuhsruhktuh, Jeova el karuhnguhnwacng mwet Judah, mwet mweun, ac mwet tol. Nohfohnna muhtuhnfacl siskacltahl ah lohng ke ma Jeova el oruh, ac eltahl etuh lah Jeova el srackna karihngihn mwet lal ingacn. Jeova el molwelah fuhkah mwet lal ingacn? Ke inkacnek pucspucs. El tiacna enenuh kahsruh luhn mwet uh in oruh kain in orekma ingacn.