Tohkohsrahi Se Ma Kihtakatwelihk

Ke lusen pacl se ma Solomon el alu nuh sin Jeova, oasr mislac fin acn Israel. Tuhsruhktuh, Solomon el pahyuckyak nuh sin muhtwacn pucspucs ke kuhtuh acn sahyac, ac muhtwacn kiacl inge alu nuhke ma sruhloaclah. Solomon el kais kuhtuh na eklac, na el muhtwacwacack in alu pac nuhke ma sruhloaclah. Jeova el arlacna kasrkuhsrak. El fahk nuh sel Solomon: ‘Tohkohsrahi luhn Israel ac tuhfah itucklac liki sucu lom an ac kihtakatwelihk nuhke ip luo. Nga ac fah sang ip se ma yohk an nuh sin sie sin mwet kuhlwacnsap lom an, ac sucu lom an ac fah kol ip se ma srihk an.’

Jeova el oraclah sulaclah lal in kahlwem ke el orekmakihn sie pacna inkacnek sahyac. Sie sin mwet kuhlwacnsap lal Solomon suc pahngpahng Jeroboam, el oruh fuhfahsryucsr lal ke inkacnek uh ke pacl se el sonol Ahijah, sie mwet pahluh. Ahijah el seseyac nuknuk lal nuhke ip 12 ac fahk nuh sel Jeroboam: ‘Jeova el ac fah eislah tohkohsrahi luhn Israel liki sucu lal Solomon ac kihtaclihk nuhke ip luo.’ Eis ip singucul inge mweyen kom pa ac tohkohsrah fin sruf singucul inge. Tohkohsrah Solomon el lohngack ma inge ac el ke unilyac Jeroboam! Pwacnacng, Jeroboam el kahinglac nuh Egypt. Ke kuhtuh pacl tohkoh, Solomon el misac ac Rehoboam, wen se nahtuhl el eklac tohkohsrah. Tukun ma inge, Jeroboam el puhla muh ac wo elan fohlohk nuh Israel.

Mwet elder luhn acn Israel eltahl fahk nuh sel Rehoboam: ‘Kom fin oruh wo nuh sin mwet uh, eltahl ac oaru nuh sum.’ Tuhsruhktuh, mwet kawuck fuhsr lal Rehoboam eltahl fahk: ‘Kom enenuh kom in ahkkweokye mwet uh! Sang kuhtuh orekma upac an eltahl in oruh!’ Rehoboam el oruh ma kawuck fuhsr lal inge fahk nuh sel ah. El arlacna koluk nuh sin mwet uh pwacnacng eltahl oruh orekma in lain laltahl nuh sel. Eltahl oruh tuh Jeroboam elan eklac tohkohsrah luhn sruf singucul ac, ma etweyuck oacna tohkohsrah luhn Israel. Sruf luo sahyac ah etweyuck oacna tohkohsrahi luhn Judah, ac eltahl ahkkahlwemye oaru nuh sel Rehoboam. Ingena, sruf 12 luhn Israel inge kihtakatwelihk.

Jeroboam el sruhnga mwet lal inge in som nuh Jerusalem in oruh alu laltahl, suc oan ke tohkohsrahi lal Rehoboam. Yac kom etuh lah efuh? Jeroboam el sensen muh eltahl ac forlah luhkwel ac kahsrel Rehoboam. Pwacnacng, el oraclah ma sruhloaclah gold in luhman cow mukul lukwac ac fahk nuh sin mwet uh: ‘Jerusalem el oan arlacna loeslac. Komtacl kuh in alu na inge.’ Mwet uh muhtwacwacack in alu nuhke ma sruhloaclah gold in luhman cow mukul inge ac sifwilpac muhlkuhnuhllah Jeova.