Jeova El Fwa Tia Fwasr Liki Met Mwo Nukewa Lal

“[Jeova] el tia fwasr liki met mwo lal. Elos karunginyuk ma patpat.”​—SAM 37:28.

1, 2. (a) Mea orek ke century aksingoul B.C.E. in sang akpayeye oaru a paye lun met kulansap lun God? (b) Ke inkanek fuka tolu Jeova el oakiye in sang karungin met kulansap oaru lal?

CENTURY aksingoul B.C.E. pa inge a sie pal in oru sulela. Meun su pangpang civil war su sikyak in pal inge el akupayela akwuk in aksukosokyela mutanfwal lun an Israel ke sruf lun an eir in an we. Jeroboam, su togusra sasu se lalos el silaklak in orekmakin ku lal in sang oakiye sie akwuk in orala sie State sasu nu fwin an we. El sapkin nu sin met nukewa in akilen a akos akwuk inge. Mea met kulansap nukewa lun Jeova elos ku in oru? Ya elos fwa sruokye ku lulalfongi lalos nu sin God su elos alu nu se? Oasr tausen puspus met elos oru oinge a Jeova el sang me kasru yok nu selos in sruokye ku ke kafweang lalos.​—1 Togusra 12:1-33; 2 Kronikel 11:13, 14.

² Oaru a paye lun met kulansap lun God el srifweyuk yok ke len lasr. “Komwos in efwal, komwos in sano,” Baibel el sapkin. “Met lokwalok lomwos Devil, el oana soko laion ngutngut, el fwafwasryesr, in suk su el fwa kangla.” Ya kut ku in eis kutangla “in tu ku a sinukunul in lulalfongi [lasr]”? (1 Piter 5:8, 9) Lela kut in tuni akmwoye kutena kain in oiya su on siskesr ke pal in akmusrala lal Togusra Jeroboam in yea 997 B.C.E. a in koneak la mea kut ku in lotela ka. Ke lusen pal in ongoiye inge, met kulansap nukewa lun Jeova elos pulakin me keok. Elos pulakin pa kas in akkoluk lun met su lainelos, ke elos fwakak kas in akkeokyelos. Ke kais sie oiya su sikyak inge, Jeova el tia fwasr liki met mwo nukewa lal in pal sa, a el fwa oru oapana in len lasr inge.​—Sam 37:28.

Ke Pal in Me Keok

3. Efu ku me kolyuk lal Togusra Devid el tia sang ma upa nu sin metu?

³ Lela kut in tuni ma sikyak puspus ke pal se Jeroboam el ekla togusra. Soakas 29:2 el akkalemye: “Ke sie met koluk leumi, metu mongi.” Ye kolyuk lun togusra Devid in pal meeta in an Israel, metu tia mongi ku keok. Devid el tia met sumwosmwos, tusruktu el oaru nu sin God a el lulalfongel. Kolyuk lal Devid el mwo a tia sang ma upa nu sin metu. Jeova el orala mwuleang nu sel Devid, el fwak: “Loom sum a togusrai lom fwa oakiyuki ma patpat ye mutom; tron lom fwa oakiyuki nu tok.”​—2 Samuel 7:16.

4. Me insemwomwo puspus su met nukewa engankin ke pal in kolyuk lal Solomon el fwal nu ke mea?

⁴ Kolyuk lal Solomon mwen natul Devid el mwo a oasr misla yok ke mutamwauk su ku in lumeyuk nu ke Kolyuk lun Jisus Kraist ke Lusen Sie Tausan Yea. (Sam 72:1, 17) Sruf 12 lun Israel wangin kutena sripe lalos in lain kolyuk inge. Tusruktu, Solomon a met nukewa ye kolyuk lal elos ku in eis a engankin me insemwomwo puspus fwin elos akos masap lun God. Jeova el fwak nu sel Solomon: “Kom fwin lungsum fwasr in ma lo luk, a oru orekma luk, a liaung masap luk nukewa in fwasr ka, na Nga fwa akkeye kas luk nu sum, su Nga fwak nu sel Devid papa tumom; a Nga fwa muta in masrlon tulik natul Israel, a tia fwasr liki Israel met srak.”​—1 Togusra 6:11-13.

5, 6. Mea sikyak tokin Solomon el tila akos masap lun God?

⁵ Ke pal se el matou tari, Solomon el fuleak oaru lal nu sin Jeova a el wi ke orekma in oru alu kikiap. (1 Togusra 11:4-6) Kais kutu srisrik, Solomon el tui in akos masap lun Jeova a el tila met kol mwomwo meyen el akupaiye moul lun met puspus. Arulana upa ma el oru nu sin metu paenang tokin el mise, metu elos torkaskas ka nu sel Rioboam mwen nutul su aolal a elos siyuk in eisla me aktoasr yok nu selos. (1 Togusra 12:4) Mea Jeova el oru ke pal se Solomon el tila oaru?

⁶ Baibel el akkalemye nu sesr: “Jeova el mulat nu sel Solomon, meyen insiel kufla liki . . . God lun Israel, su nuna sikme nu sel pal luo.” Jeova el fwak nu sel Solomon: “Meyen . . . kom tia liaung mwuleang luk a masap luk, su Nga sapkin nu sum, paye Nga fwa seye togusrai se inge liki kom, a Nga fwa sang nu sin met kulansap lom.”​—1 Togusra 11:9-11.

7. Fwinne Jeova el tila insemwomwo kel Solomon, tusruktu fuka el karungin met kulansap nukewa Lal su oaru nu sel?

⁷ Ke ma inge Jeova el supwela met palu Ehaija in akmusraella met se su e fwa molela metu liki me aktoasr yok lal Solomon. Met se su fwa molela metu pa Jeroboam, sie met su mwo a fwal su orekma ye kolyuk lal Solomon ke pal se ma el srakna togusra. Fwinne Jeova el oaru pal nukewa ke mwuleang lal ke Togusrai nu sel Devid, El insese ka la sruf 12 fwa kitakitelik nu ke u luo. Sruf singoul fwa itukyang nu sel Jeroboam; sruf luo fwa oasr ye kolyuk lun sruf lal Devid, su Togusra Rioboam pa togusra. (1 Togusra 11:29-37; 12:16, 17, 21) Jeova el fwak nu sel Jeroboam: “A a fwa te oru, kom fwin lungsum in porongo ma nukewa su Nga sapkin nu sum, a fwasr inkanek luk a oru ma sumwos ye mutuk, in liaung ma lo luk a masap luk, oana Devid met kulansap luk el oru, na Nga fwa muta yurum, a fwa musai sie loom ku nu sum, oana Nga musaela nu sel Devid, a fwa sot met Israel nu sum.” (1 Togusra 11:38) Jeova el orala akwuk mwomwo ke met kulansap lal a orala inkanek in sang me kasru yok nu selos liki me aktoasr yok.

8. Me srufwe puspus fuka aktoasrye met kulansap lun God ke pal inge?

⁸ Me aktoasr su tuku sin met kol a orekma sesumwos el oasr yen nukewa ke pal inge. “Oasr ku yurin sie met fwin siepa met nu ke ongoiye lal,” Ekklisiastis 8:9 el akkalemye. Akwuk lun business su pal nukewa el akkalemye rapku a me kolyuk koluk ka el orala ma upa puspus nu ke moul lun metu. Met kol puspus lun guferment, business, a lun alu elos akkalemye me srikasrak koluk ke oiyen moul nasnas. Ke ma inge, in oana met sumwosmwos se inge su pangpang Lot, met kulansap oaru nukewa lun God ke pal inge elos “toasrlana ke moul kosro lun met koluk.” (2 Piter 2:7) Sayen ma inge, fwinne kut kafweang yok in akos masap a akwuk mwomwo lun God a kut tia akkolukye moul lun met puspus, tusruktu met kol koluk puspus elos lungse in kalyai kut.​—2 Timote 3:1-5, 12.

9. (a) Mea Jeova el orala tari in sang molela met nukewa lal? (b) Efu ku kut ku in lulalfongi na paye la Jisus el fwa akpayeye la el oaru a paye nu sin God pal nukewa?

⁹ Fwinne oinge, kut ku in lulalfongi na paye ke akwuk lun ma paye: la Jeova el fwa tia som liki met kulansap oaru nukewa lal! Aok nunku ke akwuk puspus su el orala tari in aola met kol koluk nukewa lun fwal se inge. Togusrai lun Messaia lun God ye kolyuk lun Jisus Kraist el oakiyuki tari. Jisus Kraist el oru kolyuk lal in kosrao ke lusen pal su apkurun nu ke yea siofok. Tia pat el fwa akinsemwomwoye met nukewa su sangeng ke inen God ke inkanek yok. (Ridi Fwakyuk 11:15-18.) Jisus el akpayeye tari la el oaru na paye nu sin God nu ke mise. El fwa tia aktoasrye met nukewa su muta ye kolyuk lal, oana Solomon el oru.​—Hibru 7:26; 1 Piter 2:6.

10. (a) Kut ku in akkalemye fuka la kut aksaokye Togusrai lun God? (b) Fwin kut sun me srufwe puspus, ke mea kut fwa ku in lulalfongi?

¹⁰ Togusrai lun God el sie guferment paye su fwa akwanginyela orekma koluk nukewa. Arulana fwal kut in sang kasru a akkalemye oaru lasr nu sin Jeova God a ke akwuk lal. Kut enenu in lulalfongi ke inkanek nukewa ke Togusrai, ke ma inge kut srunga kutena orekma koluk lun fwal se inge a kafweang in oru orekma mwomwo. (Taitus 2:12-14) Kut kafweang in karungin kut in wangin metasr ke fwal se inge. (2 Piter 3:14) Ke kutena ma upa a me srufwe su saap kut sun ke pal inge, kut ku in lulalfongi la Jeova el fwa karungin kut fwin oasr me akkoluk nu ke lulalfongi lasr. (Ridi Sam 97:10.) Sayen ma inge, Sam 116:15 el akkalemye nu sesr ke kas in mwulela inge: “Ma saok ye mutun Jeova mise lun met mwo lal.” Met kulansap nukewa lun Jeova arulanu saok nu sel paenang el fwa tia lela elos in kunausyukla oana sie u.

Ke pal su Oasr Me Kufus lun Akwuk ke Alu Kikiap

11. Fuka Jeroboam el ekla sesumwos?

¹¹ Me kolyuk lal Togusra Jeroboam el ku in sang me kasru a me akkeye nu sin met kulansap lun God. Tusruktu tia oinge, meyen orekma lal el sang kutupa me srufwe nu ke oiyen oaru lalos nu sin God. Ke sripen el srakna suk kutupa oiyen pengpeng a el tia akfwalye nu sel sifwana me akfulat a kunokon mwomwo oana sie togusra su itukyang tari nu sel, ke ma inge Jeroboam el suk inkanek puspus in akkeye mwal lal. “Met inge elos fwin utyuk in kisekin me kise in loom sin Jeova in Jerusalem,” el fwak, “na insien met inge fwa sifwil folokla nu sin leum lalos, aok nu sel Rioboam togusra Juda.” Ke ma inge Jeroboam el oakiye sie alu sasu su alu nu ke ma srolela luo ke kaf gold. “A el filiye soko in Bethel, a ma soko ngia el filiye in Dan. A ma se inge sie ma koluk, tu metu som in alu ye mutun soko, aok nu Dan. A el orek loom fwin an fulat a oru met tol sin met e nukewa, su tia mwen natul Livai.” Jeroboam el pakiye sie len in “kofwo nu sin tulik natul Israel,” a el “utyuk nu ke loangu in esukak me keng.”​—1 Togusra 12:26-33.

12. Mea met kulansap oaru lun Jeova su muta ye togusrai leyen eir elos oru ke pal se Jeroboam el oakiye akwuk in alu nu ke ma srolela kaf soko in an Israel?

¹² Mea met kulansap oaru nukewa lun God ke togusrai in an eir elos oru ingena? In oana papa matou tumalos su oaru, met Livai nukewa su muta in siti puspus su itukyang nu selos su oasr ye kolyuk lun togusrai in an eir elos oru ma fwal a ma eneneyuk. (Exodus 32:26-28; Oekyuk 35:6-8; Duteronomi 33:8, 9) Elos filiye me usru lalos we, a elos som wi sou lalos nu ke leyen epang lun an Juda, a in an se inge elos ku in tafwela in oru orekma lalos in alu nu sin Jeova. (2 Kronikel 11:13, 14) Kutu sin met Israel su tuku nu in an Juda elos oru sulela lalos in muta we a elos srungela in folokla nu in loom selos in an eir. (2 Kronikel 10:17) Jeova el orala akwuk in oasr inkanek in folokla nu ke alu paye pal nukewa in sang me kasru nu sin fwil toko ke sruf nukewa su muta ye kolyuk lun togusrai ke leyen eir tu elos fwa ku in som liki alu nu ke ma srolela lun kaf a folokla nu in an Juda.​—2 Kronikel 15:9-15.

13. Ke pal inge, fuka me akkoluk lun met puspus su som liki alu paye a luti ma kikiap el srufwe met kulansap lun God?

¹³ Met apostates su som liki alu paye a me akkoluk lalos sang me sensen nu sin met kulansap lun God ke pal se inge. Kutu sin met kol elos oakiye akwuk lalos sifwana in oru alu lun Anu, a patok met nukewa su oasr ye kolyuk lalos in sroang nu ke alu inge. Met kol lun Kristendom a met fulang a insefulat puspus elos srike in ekin ku fwak mu elos fwal nu ke orekma lun met tol ku met kol lun alu. Tusruktu, in masrlon met Kristian paye mukena kut ku in koneak met akmusrala paye, su wi ke u lun “met tol” su ma lun God mukena.​—1 Piter. 2:9; Fwakyuk 14:1-5.

14. Oiya fuka kut enenu in akkalemye nu ke nunak lun met luti kikiap?

¹⁴ In oana met Livai in century aksingoul B.C.E., met oaru nukewa lun God ke pal inge elos tia kiapeyukla ke me luti kikiap lun met su som liki alu paye. Met Kristian akmusrala a met Kristian nukewa su welulos elos sa in fwasr liki a pilesru me luti lun met luti kikiap nukewa. (Ridi Rom 16:17.) Aok kut insemwomwo in akpusiselye kut nu ke ku lun guferment ke akwuk puspus lalos a kut tia wi ke kutena u ku mutanfwal su lain sie sin sie, oiyen oaru lasr kut akkalemye a sang nu ke Togusrai lun God. (Jon 18:36; Rom 13:1-8) Kut pulesru kas lun met puspus su fwak mu elos met kulansap nu sin God a ke pal sepana elos tia sang me akfulat nu sel ke oiya koluk lalos.​—Taitus 1:16.

15. Efu ku fwal kut in akkalemye oiyen oaru lasr nu sin “met kulansap oaru a lalmetmet”?

¹⁵ Nunku pa ke akwuk mwomwo su Jeova el orala tu in oasr pal mwomwo nu sin met nukewa su paye insielos in som liki fwal koluk se inge, oana ke kas in pupulyuk, nu ke paredais in ngun su el orala. (2 Korint 12:1-4) Ke sripen kut lungse in sang kulo ka ke inse kewa lasr, paenang kut lungse in fototo pal nukewa nu sin “met kulansap oaru a lalmetmet su leum lal filiye fwin met in loom sel, in kitalos in pal fwal.” Kraist el srusrngiye met kulansap inge “fwin ma nukewa lal.” (Matu 24:45-47) Ke ma inge, fwinne kut oana met se met se su tia kalem na paye ke kutu akwuk lun u lun met kulansap inge, wangin sripe mwomwo lasr in pulesru ma inge ku in folokla nu ke fwal lun Setan. A, oiyen oaru el fwa mokle kut in akkalemye inse pusisel a tupan Jeova in akkalemye kalem ma inge.

Ke Pal In Akpayeye Orekma su God el Sapkin

16. Kunokon fuka met palu su tuku in an Juda el eis?

¹⁶ Jeova el nununkel Jeroboam ke sripen orekma in alu lal nu ke ma srolela. El pakiye sie met palu lun an Juda in som nu in an Bethel a osun nu sel Jeroboam ke pal se el oru orekma lal ke altar. Met palu sa akkalemye kas in nununku upa nu sel Jeroboam. Wangin alolo ka la, orekma lal el sie kunokon upa.​—1 Togusra 13:1-3.

17. Jeova el karungin fuka met lal?

¹⁷ Jeroboam el arulana mulat ke pal se el long kas in nununku lun Jeova. El asroela paul nu sin met lun God a wowoyuk nu sin met puspus su oasr ke an su apkurun: “Sruokilye!” Tusruktu tia pat, meet liki kutena met su oasr we sruokilye, “paul su el asroela lainul, paola, na el koflanu sifwil lukosak nu sel. A loangu pa fukwelik, a apat okwokla liki loangu.” Ke ma inge Jeroboam el siyuk sin met palu in siyuk kulang lun Jeova a pre ke paul in akkeyeyukla. Met palu se inge el pre nu sin Jeova a paul akkeyeyukla. Ke ma inge Jeova el karungin met tutafpo lal liki me sensen.​—1 Tokusra 13:4-6.

18. Ke inkanek fuka Jeova el karungin kut ke kut tia sangeng in oru orekma in kulansap lasr nu sel?

¹⁸ Pal nukewa ke kut wi ke orekma in sulkakin a luti peng mwo lun Togusrai, oasr pal kut sun met su sekulang ku kutupal mulat nu sesr. (Mattu 24:14; 28:19, 20) Tusruktu kut enenu in tia lela oiya inge ke pal se met elos srunge kut in akmunasye oiyen moniyuk lasr ke orekma in luti peng mwo. In oana met palu se inge su inel tia akkalemyeyuk in len lal Jeroboam, oasr kunokon lasr “tu kut fwa orekma nu sel [Jeova] a wangin sangeng.”a (Luk 1:74, 75) Fwinne kut etu la Jeova el tia orekmakin mwenmwen in loangekutla, tusruktu Jeova el karungin kut pal nukewa oana Met Lo lal ke inkanek lun ngun mutal lal a lipufan puspus lal. (Ridi Jon 14:15-17; Fwakyuk 14:6.) God el fwa tia som liki met nukewa su tia sangeng in kaskaskin kas lal.​—Filippai 1:14, 28.

Jeova E Fwa Karungin Met Kulansap Oaru Nukewa Lal

19, 20. (a) Efu kut ku in lulalfongi yok la Jeova el fwa tia som liki kut? (b) Kusensiyuk puspus fuka fwa akuteyuki ke me lutlut toko?

¹⁹ Jeova el God lasr su oaru a paye. (Fwakyuk 15:4; 16:5) El oaru a “kulang in orekma lal nukewa.” (Sam 145:17) A Baibel el akkalemye nu sesr ke kas in mwulela inge: “El karunganang inkanek lun met mwo lal.” (Soakas 2:8) Fwin oasr pal elos sun ma upa puspus ku me luti kikiap lun apostate ku fwin elos eis sie kunokon a sun ma upa, met kulansap oaru nukewa ku in lulalfongi la Jeova el fwa kasrelos a karunginelos.

²⁰ Kais sie sesr enenu in nunku yok pa ke kusensiyuk inge: Mea fwa kasreyu in sruokye oiyen oaru luk nu sin Jeova fwinne oasr me srufwe a ma upa puspus su nga sun? Ke kas saye, fuka Nga ku in akkeye oiyen oaru luk nu sin God?

[Footnote]

Kom E Topuk Fuka?

• Ke inkanek fuka Jeova el akkalemye la el tia som liki met kulansap oaru lal ke pal se elos sun me aktoasr lun met kol lalos?

• Oiya fuka kut enenu in akkalemye nu sin met puspus su som liki ma paye a ke me luti lalos?

• Fuka Jeova el karungin met kulansap oaru nukewa lal ke pal nukewa elos wi ke orekma lun met Kristian in luti peng mwo?

[Map/​Picture on page 9]

(For fully formatted text, see publication)

TOGUSRAI KE LEYEN AN EIR (Jeroboam)

Dan

SHECHEM

Bethel

TOGUSRAI KE LEYEN AN EPANG (Rioboam)

JERUSALEM

[Picture]

Jeova el tia som liki met kulansap oaru nukewa lal ke pal se Jeroboam el oakiye akwuk nu ke orekma in alu nu ke ma srolela kaf soko

[Picture on page 7]

Me insemwomwo su Solomon a met nukewa ye koko lal ku in oasr na fwin elos oaru nu sin God mukena