Sie Tempuhl Ma Muhsahiyuck nuh sin Jeova

Tukun Solomon el eklac tohkohsrah luhn acn Israel, Jeova el siyuck sel: ‘Meac kom luhngse ngan sot nuh sum?’ Solomon el fahk: ‘Nga srackna fuhsr, ac nga tiac etuh lah meac nga ac oruh. Nuhnak muhnahs use nuh sihk lahlmwetmwet ngan muh kuh in sang karihngihn mwet lom inge.’ Jeova el fahk: ‘Mweyen kom siyuck ke lahlmwetmwet ac tiac siyuck ke mwe kahsruhp, nga ac oruh tuh in kom pa mwet se ma lahlmwetmwet emeet fin facluh. Nga ac oacyacpac oruh tuh kom in arlacna kahsruhp. Ac kom fin ahkos yuc, ac loes moul lom.’

Solomon el muhtwacwacack in muhsahi tempuhl uh. El orekmakihn gold, silver, sahk ac yot ma wo emeet. Tausin sin mukul ac muhtwacn ma usrnguck ke kain in orekma nuhkewa eltahl orekma ke tempuhl uh. Tukun yac itkohsr, tempuhl uh muhsahiyucklac ac ahkolah in kihsackihnyuckyang nuh sin Jeova. Oasr mwe loang ac oasr mwe kihsac ma oan fac. Solomon el sikuckmuhtuhntei ye muhtuhn mwe loang uh ac puhruhe. ‘O Jeova, tempuhl se inge ma kuht oraclah nuh sum tiac na yohk kuh tiac na arlacna kahto, tuhsruhktuh nuhnak muhnahs lwelah kuht in alu nuh sum ac lohng puhruhe lasr uh.’ Meac Jeova el nuhnkuh ke tempuhl ac ke puhruhe lal Solomon? Tiac paht tukun Solomon el ahksahfyelah puhruhe lal, e se tuhkuh inkuhsrao me ac esuhkwack mwe kihsac nuhkewa fin mwe loang uh. Jeova el insewowo ke tempuhl. Ke pacl se mwet Israel inge liye ma inge, eltahl arlacna engan.

Tohkohsrah Solomon el etweyuck ke lahlmwetmwet lal fin acn Israel nohfohn ac finne nuhke acn ma oan loessuhlah. Mwet uh tuhkuh nuh yohrohl Solomon ac eis kahsruh nuhke ma upac laltahl uh. Finne ke kasra luhn acn Sheba el tuhkuh in tuh srihkacl ke kain in kihsen siyuck na upac. Ke pacl se ma el lohng top lal inge, el fahk: ‘Nga tiacna luhlahlfongi ke ma mwet uh fahk nuh sihk keim uh, tuhsruhktuh ingena nga liye lah kom lahlmwetmwet liki na ke ma eltahl sruhmuhn uh. God lom, Jeova el ahkinsewowoye kom.’ Arlacna wo moul luhn muhtuhnfacl Israel, ac mwet uh engan. Tuhsruhktuh, oasr ma eklac tohkoh.