Tohkohsrah Se Meet luhn Mwet Israel

Jeova el sang mwet nuhnuhnkuh nuh sin mwet Israel in kololtahl, tuhsruhktuh eltahl luhngse sie tohkohsrah. Eltahl fahk nuh sel Samuel. ‘Muhtuhnfacl nuhkewa sahyac ma raunikuhtlac uh oasr tohkohsrah laltahl. Kuht luhngse pac sie tohkohsrah lasr.’ Samuel el puhla muh ma inge suhtuhuh, pwacnacng el puhruhe nuh sin Jeova kac uh. Jeova el fahk nuh sel: ‘Tiac kom pa eltahl pihlesreyuck, a nga pa eltahl pihlesruh. Fahk nuh seltahl lah ac kuh in oasr sie mwet in tohkohsrah laltahl, tuhsruhktuh tohkohsrah se ac fah oakiyac ac sapkihn ma pucspucs nuh seltahl in oruh.’ Mwet uh fahk nuh sel: ‘Macnsis el fin ac oakiyac ma pucspucs. Kuht luhngse na pwacye sie tohkohsrah!’

Jeova el fahk nuh sel Samuel lah sie mukul suc pahngpahng Saul pa eklac tohkohsrah se meet. Ke pacl se ma Saul el muhtwacta nuh yohrohl Samuel in Ramah, Samuel el akmuhsraellah Saul oacna tohkohsrah ke el okoila oil fin sifacl.

Tok kuhtuh, Samuel el pahngon mwet Israel uh in ahkkahlwemye nuh seltahl tohkohsrah sasuc laltahl. Tuhsruhktuh eltahl tiac kuh in konwaclwack Saul. Kom etuh lah efuh? Mweyen el wihkwihk inmahsrlon ap uh. Ke pacl se ma eltahl konwaclwack Saul, eltahl usacllah nuh yurin mwet uh, ac el tuyak inmahsrlon mwet uh. Saul el fuhlwact luhkeltahl nuhkewa, ac el arlac oaskuh. Samuel el fahk: ‘Pa inge mwet se suc Jeova el sulaclah.’ Mwet nuhkewa wowoyak ac fahk: ‘In paht moul lal tohkohsrah!’

Ke muhtwacwacack ah, Tohkohsrah Saul el porongel Samuel ac el ahkos Jeova. Tuhsruhktuh el eklac. Ke sie mwe puhpuhlyuck, tiac orekma luhn tohkohsrah in kihsackihn mwe kihsac uh. Ke sie pacl ah, Samuel el fahk nuh sel Saul elan soanel in tuhkuh, tuhsruhktuh Samuel el pahtlac in tuhkuh. Pwacnacng, Saul el sifacna kihsackihn mwe kihsac uh. Ohiyac fuhkah Samuel el ahkkahlwemye nuh kac? El fahk nuh sel: ‘Efuh kuh kom tiac ahksol Jeova?’ Yac Saul el lotwelah ke ma tahfonglac lal inge?

Tok, ke pacl se ma Saul el som in mweuni mwet Amalek, Samuel el fahk nuh sel in tiac fihliyac kuhtwena ma, uniyac mwet nuhkewa. Tuhsruhktuh, Saul el sulaclah in tiac uniyac tohkohsrah Agag. Jeova el fahk nuh sel Samuel: ‘Saul el forlah likiyuc, ac el tiac porongeyuc.’ Samuel el arlac ahsor, ac el fahk nuh sel Saul: ‘Ke srihpen kom tilac ahkos Jeova, el ac sulaclah tohkohsrah sahyac.’ Ke Samuel el forlah in fohlohk, Saul el sruokilyac ac sruokyac nuknuk lal Samuel ah twe mihsaclihk. Na, Samuel el fahk nuh sel Saul: ‘Jeova el seyac tohkohsrahi liki kom.’ Jeova el ac sang tohkohsrahi inge nuh sin sie mwet suc luhngse el ac ahksol.