David ac Goliath

Jeova el fahk nuh sel Samuel: ‘Som nuhke lohm sel Jesse. Sie sin wen nahtuhl ac fah tohkohsrahlac tohkoh luhn mwet Israel uh.’ Pwacnacng, Samuel el som nuhke lohm sel Jesse. Ke pacl se ma el liye tuhlihk mukul mahtuh se emeet, el nuhnkuh: ‘Mukul fuhsr se inge pa mwet sac.’ Tuhsruhktuh, Jeova el fahk nuh sel Samuel lah tiac el pa mwet sac. Jeova el fahk: ‘Nga liye ma oan ke insiacn sie mwet, ac tiac atacl lihk uh muhkwena.’

Jesse el use wen ohnkohsr sahyac nahtuhl nuh yohrohl Samuel. Tuhsruhktuh Samuel el fahk: ‘Jeova el tiacna sulaclah kuhtwena selos. Yac oasr pac tuhlihk mukul sahyac nuhtum?’ Jesse el fahk: ‘Oasr pac wen sahyac nuhtihk, el pa ma fuhsr emeet, inel pa David. El oasr ke imac uh liyacacng sheep nuhtihk.’ Ke pacl se ma David el tuhkuh, Jeova el fahk nuh sel Samuel: ‘El pa mwet sac!’ Samuel el okoaclah oil fin sifacl David, ac akmuhsraellah oacna sie tohkohsrah luhn mwet Israel tok.

Tukun kuhtuh pacl tohkoh, mweun se orek inmahsrlon mwet Israel ac mwet Philistia, suc oasr mwet mweun se laltahl ma yohk ac arlac fuhlwact suc pahngpahng Goliath. Lwen nuhkewa, Goliath el ahngon mwet Israel inge. El wowoyak ac fahk: ‘Sulaclah sie mwet lomtacl an in tuhkuh lainyuc. El fin kuhtanglah, kuht ac fah mwet kohs lomtacl. Tuhsruhktuh nga fin kuhtanglah, komtacl ac fah mwet kohs lasr.’

David el tuhkuh nuhke nien ahktuhktuhk luhn mwet mweun luhn Israel in us mongo nwacn tamuhlwel wiyacl, suc wi un mwet mweun ah. David el lohng ma Goliath el fahk inge, na el fahk: ‘Nga ac som acnwuck nuh sel!’ Saul el fahk: ‘Kom srackna tuhlihk.’ David el topuk: ‘Jeova el ac kahsreyuc.’

Tohkohsrah Saul el sang nuh sel David mwe loeyuck lal sifacna elan nokomacng. Tuhsruhktuh David el fahk: ‘Nga tiac kuh in mweun ke ma inge oan keik uh.’ David el eis fuht se nahtuhl ac som nuhke infacl ah. El sulaclah eot fwel lihmekohsr ac isongyac nuh in pack lal ah. Na, David el kahsruhsr nuh yohrohl Goliath. Koht se inge el wowoyak ac fahk: ‘Fahsruh tuhlihk mukul srihsrihk. Nga ac fah sang monum nuh sin won yen engyeng uh ac kosro lwemnak in kang.’ David el tiacna sahngweng. El wowoyak pac nuh sel ac fahk: ‘Kom tuhkuh wi cutlass ac osra, a nga tuhkuh ke inen Jeova. Kom tiacna tuhkuh lain kuht, a kom tuhkuh lain God. Ac mwet nuhkewa inge fah liye lah Jeova el fokoko liki cutlass kuh osra ngacn. El ac fah fihlikowosme nuh in pahosr.’

David el isongyac sie eot nuhke mwe fuht se nahtuhl ah ac furokacng na pwacye ma inge. Ke kahsruh luhn Jeova, eot sac sun motonsrol Goliath ac tilyang nuh kac. Mukul na yohk ac fuhlwact se inge el ikori infohk ah ac misac. Na, mwet Philistia eltahl kahinglac. Yac kom luhlahlfongi Jeova, oacna David?