Jeova El Oracl Samson In Arlacna Fokoko

Mwet Israel pucspucs eltahl sifwilpac alu nuhke mwe sruhloaclah, ke ma inge Jeova el lwelah mwet Philistia in leum faclos. Tuhsruhktuh, oasr kuhtuh mwet Israel suc luhngse Jeova. Sie sin mwet inge pa Manoah. Wacngihn tuhlihk nahtuhl ac muhtwacn kiyacl ah. Sie lwen ah, Jeova el suhpwaclah sie lipufacn nuh yurin muhtwacn kiyacl Manoah. Lipufacn sac fahk nuh sel: ‘Kom ac fah oswelah sie wen. El ac fah molwelah mwet Israel liki mwet Philistia. El ac fah sie mwet Nazirite.’ Yac kom etuh suc mwet Nazirite? Eltahl mwet kuhlwacnsap sacohk luhn Jeova. Mwet Nazirite uh tiac lwelah in kal aunsifacltahl.

Pacl se tuhkuh, isuslac wen se nahtuhl Manoah, ac el pahnglol Samson. Ke Samson el mahtuhlah Jeova el oracl in arlacna kuh. El kuh in uniyac lion soko ke pahol na. Ke sie pacl ah, Samson el sifacna uniyac mwet Philistia 30. Mwet Philistia sruhngwacl ac pacl nuhkewa suk inkacnek in unilyac. Ke sie fong ah, Samson el mutullac nuh Gaza, eltahl som nuhke muhtuhnpot luhn siti sac ac soano we nuhke lwenelihk in unilyac. Tuhsruhktuh ke infulwacn fong, Samson el tuhkahkack som nuhke muhtuhnpot luhn siti sac, ac kuhnahoslah pot uh ac el lippisauk ma inge ac usack nwe ke mahngon ohl soko oan ngweti nuh Hebron!

Tok, mwet Philistia ah som nuh yurin muhtwacn suc Samson el ahkoo nuh se, inel pa Delilah, ac fahk nuh sel: ‘Kuht ac fah moli kom tausin pucspucs ke silver kom fin konwacack lah efuh Samson el arlacna fokoko. Kuht luhngse in sruokilye ac fihlilyac nuh in presin.’ Delilah el luhngse mani sac, pwacnacng el insese kac. Ke muhtwacwacack ah, Samson el sruhnga in fahk nuh sel srihpen kuh lal. Tuhsruhktuh, el kwacfel ne ke na el ullac sel ac fahkwack nuh sel srihpac ah. El fahk nuh sel: ‘Wacngihn sie pacl insifuhk kalkuhllah mweyen nga sie mwet Nazarite. Fin kalkuhllah sifuhk, na kuh luhk uh ac wacngihnlac.’ Yac Samson el oraclah ma tahfonglac ke el fahkwack nuh sel Delilah ma el tiac enenuh in etuh?

Ac tiac paht Delilah el fahk nuh sin mwet Philistia: ‘Nga etuh ma lukmac lal ah.’ El ahkmotulyacl Samson finyepal, na el sap sie mwet ah in kallah aunsifacl. Delilah el wowoyak: ‘Samson mwet Philistia pa tuhkuh inge!’ Ke pacl se ma Samson el nguhtelihk, kuh lal ah wacngihnlac. Mwet Philistia sruokilyac, tipalla ahtron muhtahl, ac usacllah nuh in presin.

Sie lwen ah, tausin pucspucs sin mwet Philistia uh tuhkweni nuh sie luun tempuhl se luhn god se laltahl inge pahngpahng Dagon. Eltahl wowoyak ke puhsra luhlahp: ‘God lasr uh eisaclma Samson! Usacllah Samson! Elan ahkpwacrye kuht.’ Eltahl oruh Samson elan tu inmahsrlon sru luhlahp lukwac ah, ac eltahl ahksruhksruhk el. Samson el puhruhe ac fahk: ‘O Jeova, nga kwacfe sum tuh kom in sifwilpac acse kuh nuh sihk ke pacl sefanna luhlah inge.’ Ke pacl inge aunsifacl Samson sifwilpac kapwack. El sihnuckihn sru luhlahp ke tempuhl ke kuhiyacl nohfohn. Lohm nohfohn rahki, uniyac mwet nuhkewa luun tempuhl ah, ac Samson el misac pac.