Jeova El Sramsram nuh sel Samuel

Oasr tuhlihk mukul luo nuhtin mwet tol fuhlwact Eli suc kuhlwacnsap oacna mwet tol ke lohm nuknuk muhtahl. Ineltahl pa Hophni ac Phinehas. Eltahl tiac ahkos masap luhn Jeova, ac eltahl oruh ma kuluk nuh sin mwet uh. Ke pacl ma mwet Israel ah us mwe kihsac laltahl nuh sin Jeova, Hophni ac Phinehas eltahl eis ikoac ma wo emeet in ma nwacltahl sifacna. Eli el lohng ke ma tuhlihk mukul nahtuhl inge oruh, a el tiacna ahksuwohsyeltahl. Yac Jeova el lwelah ma inge in tahfwelah na in orek?

Samuel el finne srihk luhkel Hophni ac Phinehas, el tiac na etaheltahl. Jeova el insewowo kacl Samuel. Sie fong ke pacl se ma el mutul, Samuel el lohng sie puhsra ma pahnglol inel. El tuhkahkwek, el kahsruhsr nuh yohrohl Eli, ac fahk: ‘Nga pa inge!’ Tuhsruhktuh Eli el fahk: ‘Nga tiac pahngon kom. Fohlohklac ac mutullac.’ Samuel el fohlohklac nuhke mwe oan kiyacl. Na, ma inge sulpac sikyak. Ke Samuel el lohng puhsra sac ke pacl se ahktolu, Eli el akihlenack lah Jeova pa pahnglol Samuel. El fahk nuh sel Samuel lah el fin sifwil lohng puhsra sac, el ac fah fahk ohinge: ‘Jeova, kom kahskahs, mwet kuhlwacnsap lom ac porongo inge.’

Samuel el fohlohklac ac mutullac. Na el lohng: ‘Samuel! Samuel!’ El topuk: ‘Kahskahs, tuh mwet kuhlwacnsap lohm el porongo.’ Jeova el fahk nuh sel: ‘Fahk nuh sel Eli lah Nga ac fah kael ac sucu lal uh. El etuh lah tuhlihk mukul nahtuhl inge oruh ma kuluk ke lohm nuknuk muhtahl luhk, tuhsruhktuh el tiac kutongoltahl.’ Ke lututacng tok ah, Samuel el ikacslah sruhnguhl in lohm sin Jeova, oacna el oruh pacl nuhkewa. El sahngweng in fahk nuh sin mwet tol fuhlwact ke ma Jeova el fahk ah. Tuhsruhktuh Eli el pahnglol ac siyuck: ‘Tuhlihk nuhtihk, meac Jeova el fahk nuh sum? Fahk nuh sihk ma nuhkewa.’ Pwacnacng, Samuel el fahk nuh sel Eli ma nuhkewa.

Ke Samuel el kapkapwack, Jeova el weluhl. Yen nuhkewa we, mwet Israel nuhkewa etuh lah Jeova el sulacllah Samuel in sie mwet pahluh ac mwet nuhnuhnkuh ah.