Ruth ac Naomi

Ke sie pacl ma tuh oasr sracl fin acn Israel, muhtwacn Israel se pahngpahng Naomi inge el wi mukul tuhmwacl ac tuhlihk mukul luo nahtuhl uh som nuh Moab. Tok, mukul tuhmwacl Naomi ac misac. Wen luo nahtuhl inge pahyuckyak nuh sin muhtwacn Moab, ineltahl pa Ruth ac Orpah. Mwe ahsor se lah tok kuhtuh, wen luo nahtuhl Naomi inge misac.

Ke Naomi el lohngack lah wacngihnlac sracl se fin acn Israel ah, el sulaclah in fohlohk nuh yen sel uh. Ruth ac Orpah weluhl fuhfahsryucsr, tuhsruhktuh ke inkacnek uh Naomi el fahk nuh seltahl: ‘Komtacl muhtwacn pahyuck wowo nuh sin wen nuhtihk ac oacyacpac nuh sihk. Nga luhngse komtacl kewa in sifwil pahyuckyak. Fohlohklac nuh Moab.’ Muhtwacn inge fahk: ‘Kuht luhngse kom! Kuht sruhnga in siskomlac.’ Naomi el nuh fahk na eltahl in som. Na, Orpah el tari sulaclah in fohlohk, tuhsruhktuh Ruth el muhta na. Naomi el fahk nuh sel: ‘Orpah el ac fohlohk nuh yurin mwet lomtacl ac god lomtacl ingacn. Som weluhl.’ Tuhsruhktuh, Ruth el fahk: ‘Nga ac fah tiac siskomlac. Mwet lom fah mwet luhk, ac God lom fah God luhk.’ Kom nuhnkuh muh meac Naomi el puhla ke Ruth el fahk ohinge?

Ruth ac Naomi sun acn Israel ke muhtwacwaciyen pacl in kosracni barley. Sie lwen ah, Ruth el som twelacni barley ma mwet orekma tiac twelack ke imac luhn mukul se pahngpahng Boaz. El tuhlihk nahtuhl Rahab. El lohngack lah Ruth el sie mwet Moab suc oaru weluhl Naomi. El fahk nuh sin mwet orekma lal in fihliyac kuhtuh barley ke imac ma Ruth elan kuh in twelacni.

Ke fong sacn, Naomi el siyuck sel Ruth: ‘Luhn suc imac ma kom orekma kac mihsenge?’ Ruth el fahk: ‘Imac se ingacn ma lal Boaz.’ Naomi el fahk nuh sel: ‘Boaz el sie sin sucu luhn mukul tuhmuhk. Tahfwelah na orekma ke imac lal wi muhtwacn fuhsr sahyac. Kom ac wona we.’

Ruth el tahfwelah na orekma ke imac lal Boaz nwe ke na sahflah pacl in kosracni ke imac sac. Boaz el akihlen lah Ruth el alken ac sie muhtwacn na wo. In pacl sacn, fin sie mukul el misac ac wacngihn tuhlihk nahtuh, sucu lal ac kuh in pahyuck nuh sin muhtwacn kiyacl. Pwacnacng, Boaz el pahyuckyak nuh sel Ruth. Oasr tuhlihk mukul nahtuhltahl inel pa Obed, suc tok eklac pahpah mahtuhoh tuhmwacl Tohkohsrah David. Kawuck lal Naomi uh eltahl insewowo. Eltahl fahk: ‘Ma se meet, Jeova el usaclot Ruth, suc arlacna wo ac kuhlwacng nuh sum, ac ingena oasr wen se nuhtum. Lwelah in kaksakihnyuck Jeova.’