Mwet Kol Sasuc Se ac Muhtwacn Puhlaik Luo

Tukun Joshua el kol mwet Israel ke lusen yac pucspucs, el misac ke el yac 110. Ke lusen pacl se ma el moul inge, mwet Israel eltahl alu nuh sin Jeova. Tuhsruhktuh, tukun Joshua el misac, eltahl alu nuhke ma sruhloaclah oacna mwet Canaan. Ke srihpen mwet Israel eltahl tilac ahkos masap luhn Jeova uh, El lwelah tohkohsrah se luhn acn Canaan suc pahngpahng Jabin elan oruh in upac moul laltahl uh. Mwet inge kwacfe sin Jeova elan kahsreltahl. Pwacnacng, Jeova el sang sie mwet kol sasuc laltahl, inel pa Barak. El pa ac kahsruh mwet inge in fohlohk nuh yurin Jeova uh.

Deborah, sie muhtwacn pahluh el saplah in utuckuh Barak nuh yohrohl, elan fahk nuh sel kahs inge sin Jeova me: ‘Eis 10,000 mwet ac som sun mwet mweun lal Jabin ke infacl Kishon. Ke acn we kom ac fah kuhtanguhllah Sisera, mwet kol ke un mwet mweun lal Jabin.’ Barak el fahk nuh sel Deborah: ‘Nga ac som kom fin wiyuc.’ Deborah el topuk: ‘Nga ac wi kom. Tuhsruhktuh, tiac kom pa ac unilyac Sisera uh. Jeova el fahk muh muhtwacn se pa ac unilyac uh.’

Deborah el weluhl Barak ac un mwet mweun lal uh som nuh Finohl Tabor in ahkolah nuhke mweun uh. Ke pacl se na ma Sisera el lohngack ma inge, el oracni un mwet mweun lal wi chariot nahtuhl uh ke sie infahlfahl ma oan nuh ten. Deborah el fahk nuh sel Barak: ‘Mihsenge, Jeova el usot kuhtanglah nuh sum.’ Barak ac mukul 10,000 lal uh kahsruhsr puhtati ke finohl soko ah in ohsun nuh sin un mwet mweun na kuh se lal Sisera inge.

Jeova el oraclah infacl Kishon in sronot. Chariot lal Sisera sremlah ke fohk fuhrahrrahr uh. Sisera el ahtulac liki chariot nahtuhl uh ac el kahsruhsr. Barak ac un mwet mweun lal uh kuhtanglah un mwet mweun lal Sisera uh, tuhsruhktuh Sisera el kahinglac! El som wihklac ke lohm nuknuk se sin sie muhtwacn suc pahngpahng Jael. El sang milk nihmacl ac Sisera el nihmyac, ac Jael el afihnilyac ke kaot se. Sisera el tohtohlah ac mutullac. Na, Jael el mahsrihkyak siskacl ac sang kwi soko ma orekmakihnyuck in sruokyac lohm nuknuk sac fakihsyac insifacl Sisera. Na el misac.

Ke Barak el som sokol Sisera, Jael el tufoki liki lohm nuknuk sel uh ac fahk: ‘Fahsruh, mwet se ma kom suk an oasr inge.’ Barak el utyak nuh loac ac liyacack lah Sisera el oan misac. Barak ac Deborah sang kaksak nuh sin Jeova ke on ke el lwelah mwet Israel in kuhtanglah. Ke lusen yac 40 tohkoh, oasr mislac fin acn Israel.