Eltahl Kuhnahoslah Wuhlelah Laltahl

Jeova el fahk nuh sel Moses: ‘Utyak nuh yuruk ke finohl uh. Nga ac fah suhmuhslah masap luhk uh ke yot tuhpahsrpahsr ac usot nuh sum.’ Moses el fanyak nuh finohl soko ac muhta ingo ke lwen 40 ac fong 40. Ke muhta lal we, Jeova el suhmuhslah Masap Singucul ke yot tuhpahsrpahsr luo ac el sang yot inge nuh sel Moses.

Tukun kuhtuh pacl uh, mwet Israel inge nuhnkuh na muh Moses el som luhkweltahl. Eltahl fahk nuh sel Aaron: ‘Kuht luhngse sie mwet in kol kuht. Oraclah sie god an nuh sesr! Aaron el fahk: ‘Use gold lomtacl an.’ El muhnanwack gold inge nwe ke kofwelihk ac el oraclah sie ma sruhloaclah in luhman soko cow mukul fuhsr. Mwet inge fahk: ‘Cow mukul soko inge pa God lasr suc pwenkuhtme liki acn Egypt!’ Eltahl alu nuhke cow soko ma oreklac ke gold inge ac oruh pac mwe ahkfuhlwact. Koluk ma eltahl oruh inge? Ahok, mweyen eltahl wuhlelah muh eltahl ac alu nuh sin Jeova muhkwena. Tuhsruhktuh, ingena eltahl kuhnahoslah wuhlelah laltahl uh.

Jeova el liye ma sikyak inge ac el fahk nuh sel Moses: ‘Tufoki nuh yurin mwet ingoh. Eltahl seahkos ma nga fahk ah ac eltahl alu nuh sin god kikiacp.’ Moses el suhlahklahk na tufoki ke finohl soko inge ac el us yot tuhpahsrpahsr luo ah.

Ke Moses el tuhkuh apkuhranyang nuh nien ahktuhktuhk uh, el lohng puhsren mwet on. Na el liyacack lah eltahl tacn ac epahsr nuhke cow gold soko ah. Moses el foloyak, ac el tolyac yot tuhpahsrpahsr luo ah nuh infohk uh ac ma inge muhsahlsahluh. El kuhnahoslah ma sruhloaclah sac. Na el siyuck sel Aaron: ‘Mwet inge kihfaslah fuhkah nuhnak lom an in oruh ma na kuluk se inge?’ Aaron el fahk: ‘Nikmet kasrkuhsrak. Kom etuh ohiyen mwet inge. Eltahl luhngse sie god ah pwacnacng nga sang gold laltahl uh nuh in e ah, ac cow mukul fuhsr soko inge pa tuhkuh kac uh!’ Tiac ma wo se pa Aaron el oruh ah. Moses el sifwil utyak ke finohl soko ah ac siyuck Jeova elan nuhnak muhnahs nuh sin mwet inge.

Jeova el nuhnak muhnahs nuh sin mwet suc luhngse in ahkos ma el fahk uh. Yac kom kuh in liye yohk srihpaciyac nuh sin mwet Israel inge in ukwe kolyuck lal Moses uh?