Lohm Nuknuk Muhtahl Ma Orekmakihnyuck Nuhke Alu

Ke pacl se Moses el oasr Finohl Sinai, Jeova el fahk nuh sel elan muhsahelah sie lohm nuknuk na sacohk ma mwet Israel inge ac kuh in orekmakihn in alu nuh Sel. Eltahl ac kuh in us lohm nuknuk inge nuhke acn nuhkewa ma eltahl som nuh we.

Jeova el fahk: ‘Fahk nuh sin mwet ingacn in sang ma eltahl kuh an in kahsruh muhsah ke lohm nuknuk sacn.’ Mwet Israel inge sang gold, silver, osra bronze, yot sacohk ac mwe nahweyuck. Eltahl sang pac unen sheep, linen, kulun kosro ac ma pucspucs sahyac. Eltahl arlac engan in sang ma pucspucs pwacnacng Moses el fahk nuh seltahl: ‘Fal tari! Nikmet sifwil use kuhtwena ma.’

Puhkantwen mukul ac muhtwacn suc pihsrlac ke orekma ma kahsruh in muhsahelah lohm nuknuk se inge. Jeova el sang lahlmwetmwet nuh seltahl in orekma. Kuhtuh seltahl oraclah sucl, otwelah mwe lohl ac yucnwelah mwe srihkasrak ke nuknuk. Kuhtuh pac oakiyac yot, luhmahlah gold ac taflwelah sahk.

Mwet inge muhsahelah lohm nuknuk sac oacna ke Jeova el sapkihn nuh seltahl. Eltahl oraclah mwe lihsrlihsr na kahto in sraclihk lohm nuknuk se inge nuhke infuckihl luo, Acn Muhtahl ac Acn Muhtahl Na Muhtahl. Ke Acn Muhtahl Na Muhtahl inge, tucptucp in wuhleacng oasr we. Ma inge oreklac ke sahk acacia ac gold. Ke Acn Muhtahl, oasr mwe neinyuck lahm ma oreklac ke gold, tepuh se ac loang nuhke mwe kihsac fihrihr. Luun kalkal ac lihkihn lohm nuknuk uh, oasr pesin ma oreklac ke copper ac mwe loang na luhlahp se. Tucptucp in wuhleacng sac ahkacsmakihnye mwet Israel uh ke wuhlelah laltahl in ahkos Jeova. Kom etuh lah meac wuhleacng? Ma inge sie wuhlelah na sacohk.

Jeova el sulacllah Aaron ac wen nahtuhl uh in orekma ke lohm nuknuk inge oacna mwet tol. Eltahl ac karihngihn ac oruh mwe kihsac nuh sin Jeova we. Aaron muhkwena pa lweyucklac in utyak nuhke Acn Muhtahl Na Muhtahl mweyen el mwet tol fuhlwact. El oruh ma inge pacl se ke yac se in oruh mwe kihsac ke ma koluk lal, luhn sucu lal ac luhn muhtuhnfacl Israel nohfohn.

Ingena, oasr acn in alu laltahl nuh sin Jeova. Mwet Israel ahksahfyelah lohm nuknuk sac yac se tukun eltahl som liki acn Egypt. Jeova el engan ke lohm nuknuk sac pwacnacng el oraclah puhkuhnyeng se in tuyak fac. Ke pacl puhkuhnyeng se inge oan na fin lohm nuknuk sac, mwet Israel ac muhta na ke acn eltahl oasr we uh. Puhkuhnyeng se inge fin mukwilac na eltahl etuh lah pa inge pacl eltahl in mukwilac. Eltahl ac tuhlweyac lohm nuknuk sac ac ukwe puhkuhnyeng se inge.