Sie Wuhlelah nuh sin Jeova

Mahlwem luo tukun mwet Israel uh som liki acn Egypt, eltahl sun Finohl Sinai ac tulohkuhnwack lohm nuknuk we. Jeova el pahnglol Moses elan utyak ke finohl soko ah ac el fahk nuh sel: ‘Nga molwelah mwet Israel inge. Eltahl fin ahkos na masap luhk uh, eltahl ac fah mwet luhk suc nga sulaclah.’ Moses el sifwil tufoki ac fahk nuh seltahl ma Jeova el fahk uh. Meac top laltahl? Eltahl fahk: ‘Kuht ac fah oruh ma nuhkewa ma Jeova el fahk nuh sesr in oruh.’

Moses el sifwil utyak ke finohl soko ah. Na Jeova el fahk: ‘Tukun lwen tolu, nga ac fah sramsram nuh sum. Fahk nuh sin mwet uh in tiac utyak nuh Finohl Sinai.’ Moses el tufoki ac fahk nuh sin mwet Israel eltahl ahkolah in lohng ma Jeova el ac fahk uh.

Lwen tolu tohkoh, mwet Israel inge liyacack sahrom ac puhkuhnyeng na mahtoltol se ke finohl ah. Eltahl lohng puhsra yohk ma tuhkuh ke puhlahl ac mwe ukuk. Na Jeova el puhtati nuh finohl sac oacna luhman e. Mwet Israel elos arlac rarrar ke sahngweng. Finohl na fohn sac nuklac ke kuhlasr ac arlac kusrusryak. Puhsren mwe ukuk uh yohkyohkwelihk na. Na God el fahk: ‘Nga pa Jeova. Nik komtacl alu nuh sin kuhtwena god sahyac.’

Moses el sifwil utyak ke finohl soko ah ac Jeova el sang masap lal nuh sel, tuh mwet Israel in etuh inkacnek suwohs in alu nuh sel, ac ke ohiyac eltahl enenuh in ahkkahlwemye. Moses el suhmuhslah masap inge ac riti nuh sin mwet Israel. Eltahl wuhlelah ac fahk: ‘Kuht ac fah oruh ma nuhkewa ma Jeova el fahk nuh sesr in oruh.’ Ahok, eltahl oraclah sie wuhlelah nuh sin Jeova. Yac eltahl ac ahkpwacyeye?