Jacob Pa Eis Mwe Usru Sac

Isaac el yac 40 ke el pahyuckyak nuh sel Rebekah. El arlacna luhngse el. Tok, oasr tuhlihk luo nahtuhltahl, fak mukul se.

Tuhlihk mukul se ma mahtuh seltahl uh pa Esau, ac Jacob pa srihk uh. Esau el luhngse ac suhmaht ke sruhoh kosro uh. Tuhsruhktuh, Jacob el luhngse muhta luun lohm.

In pacl meet ah, ke pacl se ma pahpah se el misac, wen se ma mahtuh an pa ac ituckyang inkaiyen acn ac mani lal uh nuh se. Ma inge pahngpahng mwe usru. Tiac acn ac mani muhkwena pa oasr ke mwe usru nuh sin sucu lal Isaac. Wuhlelah luhn Jeova nuh sel Abraham uh oasr pac kac. Esau el tiac arlac ahksacohkye wuhlelah inge, tuhsruhktuh Jacob el etuh lah ma inge arlacna yohk srihpac.

Sie lwen ah, Esau el tuhkuh nuh lohm uh ac el arlacna ullac ke srihpen el sruhoh kosro ke lwen fohn se. El ngok folin mongo yucyuc ma Jacob el oraclah inge ac el fahk: ‘Nga masrinsracllah! Use nak kuhtuh soup sruhsrah sacn!’ Jacob el fahk: ‘Nga ac kihte kom. Tuhsruhktuh meet liki na, wuhlema nuh sihk mwe usru lom an.’ Esau el fahk: ‘Nga tiac elyah ke mwe usru luhk uh! Kom kuh in eis lom.’ Kom nuhnkuh muh wo ma Esau el oruh inge? Moh, tiac ma wo se. Esau el kihtaclah sie ma na sacohk ke na srihpen ahluh in mongo se.

Ke Isaac el mahtuhoh, pacl in sang mwe insewowo lal nuh sin wen se emeet nahtuhl uh. Tuhsruhktuh, Rebekah el kahsrel Jacob, wen se ma srihk ac in eis mwe insewowo inge. Ke pacl se ma Esau el lohngack ma inge, el arlacna kasrkuhsrak ac el oakiyac muh el ac uniyac fak se wiyacl inge. Isaac ac Rebekah luhngse in karuhnguhnuhl Jacob, pwacnacng eltahl fahk nuh sel: ‘Som ac muhta yohrohl Laban, tamuhlwel luhn ninac kiyom. Sano ne ke kasrkuhsrak lal Esau uh ohulac.’ Jacob el lohng kahs in kahsruh luhn pahpah ac ninac kiyacl uh ac el kahinglac.