Jacob ac Esau Orek Mislac Inmahsrloltahl

Jeova el wuhlelah nuh sel Jacob lah el ac fah karuhnguhnuhl, in oacna ke el karuhnguhnuhl Abraham ac Isaac. Jacob el muhta fin acn Haran, acn se ma el pahyuckyak we, oraclah sucu lal uh ac kahsruhpi.

Jeova el fahk nuh sel Jacob: ‘Fohlohk nuh yen sum ac.’ Pwacnacng, Jacob ac sucu lal uh oruh fuhfahsryucsr na loeloes se laltahl inge. Ke eltahl srackna fahsr inkacnek uh, oasr mukul se suc tuhkuh nuh yohrohl Jacob ac fahk: ‘Esau, tamuhlwel wiyom el ac tuhkuh, ac oasr mwet 400 lal weluhl!’ Jacob el sahngweng muh Esau el ac luhngse in ahkngalyacl ac sucu lal uh. El puhruhe nuh sin Jeova ac fahk: ‘Nuhnak muhnahs, moliyuclac liki tamuhlwel wiyuck.’ Ke lwen tohkoh ah, Jacob el suhpwaclah sheep, goat, cow, camel ac donkey pucspucs nuh yohrohl Esau in oacna mwe sang.

Ke Jacob el muhkwena muhta in fong sac, el liyacack lipufacn se! Lipufacn se inge muhtwacwacack in apihrack nuh sel. Eltahl apihrack nwe ke apkuhran in lwenelihk. Finne Jacob el ngalyak, el tiac fuhlweack. Lipufacn sac fahk: ‘Fihliyuclac ngan som.’ Tuhsruhktuh Jacob el fahk: ‘Moh, nga ac tiac fihlikomlac nwe ke na kom ahkinsewowoyeyuclac.’

Lipufacn sac ahkinsewowoyacl Jacob. Ingena, Jacob el etuh lah Jeova el ac tiac lwelah Esau elan ahkngalyacl.

Ke lututacng sac, Jacob el ngwetlah te liyaclack Esau wi mukul 400 lal. Jacob el som na meet liki sucu lal uh ac epahsrlah ye muhtuhn tamuhlwel se wiyacl inge pacl itkohsr. Esau el kahsruhsr nuh yohrohl Jacob ac sruokilyac. Tamuhlwel luo inge muhtwacwacack in tuhng ac wolac inmahsrloltahl. Meac kom nuhnkuh muh Jeova el puhla ke inkacnek lal Jacob in ahkwoyelah ma upac inge?

Tok, Esau ac Jacob fahsrelihk ac som nuh yen seltahl uh. Oasr wen 12 nohfohn nahtuhl Jacob. Ineltahl pa Reuben, Simeon, Levi, Judah, Dan, Naphtali, Gad, Asher, Issachar, Zebulun, Joseph, ac Benjamin. Joseph, sie sin wen nahtuhl Jacob inge orekmakihnyuck sin Jeova in molwelah mwet lal uh. Kom etuh lah el oruh fuhkah? Kuht srihke liye.