Srihkeyuck Luhlahlfongi Lal

Abraham el lotwel Isaac elan luhngse Jeova ac luhlahlfongi wuhlelah nuhkewa lal uh. Tuhsruhktuh, ke pacl se ma Isaac el sun yac 25 matwac, Jeova el sap Abraham elan oruh sie ma na upac. Meac se inge?

God el fahk nuh sel Abraham: ‘Us wen sefanna nuhtum an ac kihsackuhnuhllah ke finohl soko in acn Moriah.’ Abraham el tiac na kahlwem kac lah efuh Jeova el siyuck elan oruh ma inge. Tuhsruhktuh, el srackna ahkos Jeova.

Toang na in lotu tok ah, Abraham el eisacl Isaac ac mwet kuhlwacnsap luo weluhl ac eltahl fuhfahsryucsr som nuh Moriah. Tukun lwen se ahktolu, eltahl liyacack finohl uh. Abraham el fahk nuh sin mwet kuhlwacnsap lal inge eltahl in muhta inse ac soaneltahl, ke el ac Isaac ac som nuh finohl in oruh mwe kihsac uh. Abraham el sang Isaac elan us etong uh ac el us mitmit se. Isaac el siyuck sin pahpah tuhmwacl uh: ‘Piyac kosro ma kuht ac fah kihsackihn uh?’ Abraham el tohpohkuhl: ‘Wen nuhtihk, Jeova el ac fah acse.’

Ke eltahl sun tari finohl soko ah, eltahl etoack loang se. Na, Abraham el kapriyac pahol ac niyacl Isaac ac likilyac fin loang ah.

Abraham el sruhkwack mitmit sac. Ke pacl sac na, lipufacn se luhn Jeova el pahng nuh sel inkuhsrao me: ‘Abraham! Nikmet ahkngalye tuhlihk sacn! Ingena nga etuh lah oasr luhlahlfongi lom nuh sin God ke srihpen kom ahksol in kihsackihn wen nuhtum.’ Tukun ma inge, Abraham el liyacack sheep mukul soko sremlah koacl ke ipin sahk se. El suhlahklahk na tuhlahllah Isaac ac kihsackuhnlah sheep soko ah.

Muhtwacwacack in lwen sac, Jeova el pahnglol Abraham kawuck lal. Kom etuh lah efuh? Abraham el oruh ma nuhkewa ma Jeova el luhngse elan oruh, el finne tiac kahlwem kac lah efuh Jeova el siyuck elan oruh ma inge.

Jeova el sifwil kalweni wuhlelah lal nuh sel Abraham uh: ‘Nga ac fah ahkinsewowoye kom, ac nga fah ahkpuhsye tuhlihk nuhtum, kuh fihl in tuhlihk nuhtum.’ Kalmac pa, Jeova el ac fah ahkinsewowoye moul luhn mwet wo nuhkewa ke srihpen sucu lal Abraham