Abraham ac Sarah Elos Ahkos God

Oasr sie siti ma fototo nuh Babel, pahngpahng Ur. Mwet we inge alu nuh sin god pucspucs sahyacl Jeova. Tuhsruhktuh, oasr mukul se fin acn Ur suc alu nuh sin Jeova muhkwena. Inel pa Abraham.

Jeova el fahk nuh sel Abraham: ‘Tuyak fahlac liki lohm sum ac sucu lom an, som nuhke sie acn ma nga ac fah ahkkahlwemye nuh sum.’ Tukun ma inge, God el wuhlelah: ‘Kom ac fah eklac sie muhtuhnfacl luhlahp, ac nga ac fah sang ma wo nuh sin mwet pucspucs fin facluh nohfohn ke srihpom.’

Abraham el tiac etuh lah Jeova el ac suhpwacllah nuh oyac, tuhsruhktuh el srackna ahkos mweyen el luhlahlfongi Jeova. Pwacnacng Abraham, Sarah suc muhtwacn kiyacl, Terah suc pahpah tuhmwacl, ac Lot suc ac ma nahtuhl, eltahl nohfohn apweni ma laltahl uh ac muhtwacwacack ke fuhfahsryucsr na loeloes se laltahl uh.

Abraham el yac 75 matwac ke pacl se ma el ac sucu lal uh sun acn se ma Jeova el luhngse eltahl in liye. Canaan pa inen acn se inge. Ke acn se inge, God el sramsram nuh sel Abraham ac oraclah wuhlelah se inge: ‘Acn nuhkewa ma kom liye raunikomlac inge, ma nga ac sang nuh sin tuhlihk nuhtum uh.’ Tuhsruhktuh, Abraham ac Sarah eltahl mahtuhoh tari ac wacngihn tuhlihk nahtuhltahl. Pwacnacng, Jeova el ac ahkpwacyeye fuhkah wuhlelah se inge?