Oswelah Sie Wen!

Abraham ac Sarah pahyuck ke lusen yac pucspucs. Eltahl som liki acn na wo se seltahl fin acn Ur inge ac muhtalac ke lohm nuknuk. Tuhsruhktuh Sarah el tiacna tohrkahskahs, mweyen el luhlahlfongi Jeova.

Sarah el luhngse na pwacye in oasr sie tuhlihk nahtuhl pasis el fahk nuh sel Abraham: ‘Fin Hagar, muhtwacn kuhlwacnsap luhk el orek tuhlihk nuh sum, tuhlihk sacn ac kuh in ma pacna nuhtihk.’ Tok, Hagar el oswelah tuhlihk mukul se. Inel pa Ishmael.

Yac pucspucs tohkoh, ke Abraham el yac 99 matwac ac Sarah el yac 89, oasr mwet muhtwacta tolu tuhkuh nuh yohrohltahl. Abraham el solwacltahl in monglac ye lulin sahk soko ac in mongo. Kom etuh lah suc mwet muhtwacta inge? Lipufacn pa inge! Eltahl fahk nuh sel Abraham: ‘Yac fahsruh uh ke kain in pacl se pacna inge, ac oasr wen se nuhtum ac muhtwacn kiyom.’ Sarah el oasr luun lohm nuknuk uh ac porongo. El isracsrlah ac nuhnkuh in el sifacna: ‘Yac pwacye kuh in oasr tuhlihk se nuhtihk ke nga mahtuhoh inge?’

Ke yac se tohkoh, Sarah el oswelah sie wen, in oacna ke ma lipufacn se luhn Jeova el tuh wuhlelah. Abraham el sang inel Isaac, kalmac pa “Isracsr.”

Ke Isaac el apkuhran in sun yac lihmekohsr matwac, Sarah el liye ke Ishmael el ahnglol. Sarah el ke karihngihn tuhlihk se nahtuhl inge, pwacnacng el som nuh yohrohl Abraham ac siyuck sel elan sap Hagar ac Ishmael in som liki acn we. Ke Abraham el tuhfahna lohng ma inge, el sruhnga in oruh. Tuhsruhktuh, Jeova el fahk nuh sel Abraham: ‘Porongo puhsracl Sarah. Nga ac fah karuhnguhnuhl Ishmael. Wuhlelah nuhkewa luhk ac fah ahkpwacyeyuck kacl Isaac.’