MWE LUTLUT 25
Muhsahiyucklac Fuhkah Lohm in Toeni Lasr uh ac Efuh?
Bolivia
Nigeria, meet ac ingena
Tahiti
Inen acn ma kuht toeni we inge pa Lohm in Toeni luhn Mwet Loh luhn Jeova. Ke acn inge, Tohkohsrahi luhn God pa ma se ma lutiyuck yohk kac, in oacna ma Jesus el fahkwack ke el forfor luti.—Luke 8:1.
Pa inge acn luhn alu pwacye ke sie acn. Ke acn inge, orekma in fahkwack pweng wo ke Tohkohsrahi luhn God kuh in oakiyucki. (Matthew 24:14) Oreklac kain in luhpah ac atac ke kais sie Lohm in Toeni, pwacnacng yucn ke kais sie lohm inge tiac orek ahluhkwelah ma fal ac muhsahiyuck yohklac. Ke inkaiyen Lohm in Toeni inge, puhs liki congregation se kuh in orekmakihn. Ke yac ekahsr somlah ah nuh ke pacl inge, sun tari tausin ke Lohm in Toeni ma kuht muhsahelah uh (lohm lihmekosr ke kais sie lwen) tuh kuht in kuh in sun kapkapack ke pihsen mwet in congregation lasr inge. Ma inge orek fuhkah?—Matthew 19:26.
Ma inge muhsahiyucklac in fal nuh ke mwe kahsruh luhn mwet ke mani ma som nuh ke orekma in muhsah. Mwe kahsruh inge ma suhpweyucklac nuh ke branch ohfuhs, tuh in orekmakihnyuck nuh sin congregation ma enenuh in muhsah kuh ahksasucye Lohm in Toeni laltahl uh.
Ma inge muhsahiyucklac sin mwet ke kain in acn ma engan in oruh ac tiac moul nuh seltahl. Ke acn pucspucs, oakiyucki U Pucspucs in Muhsahi Lohm in Toeni (Kingdom Hall Construction Groups) nuhkewa inge. U pucspucs ma wi kuhlwacnsap ke orekma in muhsah ac mwet suc sang pacl ac kuh la (volunteer) inge som nuh ke congregation se nuh ke sie pac na congregation ke muhtuhnfacl se, ac eltahl som pac nuh ke acn ma srenglah in kahsruh congregation ke acn pucspucs inge in muhsahi Lohm in Toeni laltahl. Ke kuhtuh sin muhtuhnfacl inge, oasr Mwet Loh suc srihsrngiyucki in liyacacng orekma nuhkewa nuh ke muhsah kuh ahksasucyaciyen Lohm in Toeni ke acn inge. Finne puhs mwet suc suhmaht ke orekma luhn paho ac suhpweyuck me nuh ke acn inge in kahsruh ke orekma uh, oasr pac mwet ke congregation suc engan in kahsruh ac oruh orekma ma enenweyuck uh. Nguhn luhn Jeova ac wi kwacfeacng luhn mwet lal in tuhkweni orekma ke kuhiyacltahl kewa pa oruh ma inge nuhkewa in kuh in fahlac wo.—Psalm 127:1; Colossae 3:23.
Efuh kuh acn in toeni lasr inge pahngpahng Lohm in Toeni?
Kuht muhsahi fuhkah Lohm in Toeni nuhkewa lasr fin facluh nohfohn uh?