Orekma Lasr uh Kahsreyuck Fuhkah Fin Facluh Nohfohn?

Ke yac nuhkewa, u lasr uh oraclah ac kihtaclihk million ke Bible ac kuhtuh pac mwe rit sahyac nuh sin mwet ke wacngihn molo. Kuht muhsahi ac ahkwoye Lohm in Toeni pucspucs wi branch ohfuhs pucspucs. Kuht kahsruh tausin sin mwet lili suc muhta ke Bethel ac missionary ac kuht sang pac kahsruh nuh ke pacl ma oasr mwe ongaiyac luhlahp. Pwacnacng sahp kom nuhnkuh, ‘Mwe kahsruh nuh ke molin ma inge nuhkewa tuhkuh oyac me?’

Kuht tiac oraclah oakwuck in sang sie tahfuh singucul kuh pahsi ahluh. Molin ma nuhkewa ma enenweyuck nuh ke orekma in luti pweng wo inge finne yohk na pwacye, kuht tiac ngihsre kuh siyuck kahsruh luhn mwet ke mani. Puhs liki yac siofok somlah ah, mwe lutlut se ahkluo ke mackuhsin inge Tower in San el ahkkahlwemye lah kuht luhlahlfongi lah Jeova pa kahsre kuht uh ac u lasr uh ac fah tiac “ngihsre kuh siyuck ke kahsruh luhn mwet.” Soenna oasr pacl se kuht oruh ma inge!​—Matthew 10:8.

Mwe kahsruh nuhkewa ke orekma lasr uh ma tuhkuh ke inse muhlahlah luhn mwet in kahsruh. Puhs mwet suc ahkkahlwemye srui la ke orekma in luti se lasr inge, pwacnacng eltahl sang kahsruh nuh kac. Oasr mwet Loh ma engan pac in sang pacl, kuh, mani ac kuhtuh pac ma sahyac in sang ahkfahsrye ma luhngse luhn God fin facluh. (Sie Chronicle 29:9) Ke Lohm in Toeni uh, oasr pohk in mani nuh sin mwet suc luhngse in sang kahsruh. Mwe kahsruh luhn mani inge kuh pac in orek ke inkacnek luhn website se lasr inge jw.org. Inkaiyen mani inge tuhkuh sin mwet ma suhkahsruhp, oacna muhtwacn katinmas se ma Jesus el sramsramkihn ac arlacna kaksakihn ke srihpen el finne suhkahsruhp, mwe sang lal ah ma tuhkuh ke insiacl. (Luke 21:1-4) Pwacnacng oacna sie mwet ac kuh in “srelah kuhtuh mani” ma el “sifacna sulaclah” ke insiacl.​—Sie Corinth 16:2; Luo Corinth 9:7.

Kuht luhlahlfongi na pwacye lah Jeova el ac fah tahfwelah na in mokle insiacn mwet suc luhngse in ‘ahkfuhlwactyacl ke mwe sang laltahl’ in sang kahsruh orekma nuh ke Tohkohsrahi uh, tuh ma luhngse lal uh in ahkpwacyeyuck.​—Soakas 3:9.

• Meac se oruh u lasr uh siena liki kuhtwena alu sahyac?

• Orekmakihnyuck fuhkah mwe sang ke mani luhn mwet uh?