MWE LUTLUT 11
Efuh Kuht Wi Ke Toeni Luhlahp Nuhkewa Lasr?
Mexico
Germany
Botswana
Nicaragua
Italy
Efuh kuh muhtuhn mwet inge nuhkewa engan? Mweyen eltahl wi ke toeni luhlahp lasr uh. In oacna mwet kuhlwacnsap luhn God in pacl meet ah ma sapkinyuck in toeni pacl tolu ke yac se, kuht engan in wi ke toeni luhlahp lasr inge. (Deuteronomy 16:16) Oasr toeni luhlahp tolu ma orek ke kais sie yac: luo sin toeni inge pa toeni ke lwen fohn se (circuit assembly). Toeni se sahyac uh pa toeni luhlahp ke lwen tolu (regional convention). Ma wo fuhkah kuht engankihn ke toeni luhlahp inge nuhkewa?
Toeni inge ahkkweye fototo lasr nuh sin mwet lili wiyacsr uh. In oacna ke mwet Israel ah kaksakihn Jeova “inmahsrlon mwet lal,” kuht oacyacpac engan in tuhkweni ac alu nuh sel ke toeni na sacohk inge. (Psalm 26:12; 111:1) Toeni pucspucs inge use pacl na wowo se nuh sesr in tuhkweni ac asruoki nuh sin mwet lili ke congregation lasr uh ac kuhtuh pacl uh kuht ohsun nuh sin mwet ma tuhkuh ke acn sahyac. Ke infulwacn lwen, kuht tuhkweni muhta ac engankihn mongo ma mwet sifacna us nwacltahl nuh ke acn in toeni inge ac pa inge pac sie pacl wo in aetuhilac. (Orekma 2:42) Ke toeni luhlahp inge, kuht sifacna liye ac puhla luhngse se ma oracni ‘mwet luhlahlfongi wiyacsr’ fin facluh nohfohn nuh sie.—Sie Peter 2:17.
Toeni inge kahsre kuht in kapkapack ke moul in Christian lasr uh. Mwet Israel ah oacyacpac eis mwe engan yohk ke eltahl “kahlwem ke ma ritiyuck” nuh seltahl ke kahs ma ahkuhtweyucki ke ma suhmuhslah uh. (Nehemiah 8:8, 12) Kuht wi pac srui ke kahs in luti ke Bible ma kuht eis ke toeni nuhkewa lasr uh. Ke kais sie program inge, oasr sihfac yohk se kac ma tuhkuh ke ma suhmuhslah in Bible uh. Kuht etwaclah in oruh ma luhngse luhn God ke moul lasr uh ke pacl ma kuht lohng mwe sramsram na wowo ac mwe luhmah pucspucs. Mwe ahkkweye yohk kuht eis ke pacl ma kuht lohng ma sikyak nuh sin mwet ma kuhtanglah ma upac pucspucs ma eltahl sun ke moul in Christian laltahl ac ke pacl upac inge. Ke sie toeni luhlahp inge, mwe luhmah ma orek ke sie stage kahsre kuht in liye na pwacye ma pucspucs ma sikyak in Bible. Ma inge luti nuh sesr mwe lutlut pucspucs ma kuht kuh in orekmakihn ke moul lasr uh. Ke toeni luhlahp lasr inge, pa inge pacl ma oasr bacptais orek nuh sin mwet suc luhngse in ahkkahlwemye wuhlelah laltahl nuh sin God.
Meac oruh toeni luhlahp inge in pacl in engan?
Ma wo fuhkah kom ac kuh in engankihn kom fin wi ke toeni luhlahp inge?