Meac Kom Kuh in Konwacack Ke Toeni Lasr uh?

Mwet pucspucs tilac wi alu ke srihpen wacngihn kahs in kahsruh kuh kahs in ahkkweye eltahl eis kac. Ke ma inge, efuh yohk srihpac kom in wi ke toeni ma oakiyucki sin Mwet Loh luhn Jeova? Meac kom ac liye kuh lohng ke toeni laltahl uh?

Kom ac fah engan in asruoki nuh sin mwet suc luhngse ac nuhnkuh sie sin sie. Ke pacl luhn mwet sap ah, oasr oakwuck wo ma oreklac nuh sin mwet Christian ke kais sie congregation. Eltahl oruh toeni ac alu laltahl nuh sin God, in lutlut ke Ma Suhmuhslah, ac in ahkkweye sie sin sie. (Hebrew 10:24, 25) Ke eltahl toeni, eltahl puhla luhngse ma ahkkahlwemyeyuck inmahsrlon kawuck pwacye sin mwet lili wiyacltahl uh. (Luo Thessalonica 1:3; Tolu John 14) Pa inge pac oakwuck ma kuht ukwe ac pa pacna inge ma kom ac puhla we uh.

Kom ac lotwelah orekmakihnyen kahs in kahsruh wo luhn Bible. In oacna ma orek in pacl meet ah, mukul, muhtwacn, ac tuhlihk srihsrihk tuhkweni pac nuh sie ke pacl inge. Oasr mwet luti suc orekmakihn Bible in kahsre kuht ahkos ac orekmakihn kahs in kahsruh wo kac uh nuh ke moul lasr lwen nuhkewa. (Deuteronomy 31:12; Nehemiah 8:8) Mwet nuhkewa kuh in wi sang top ke pacl ma oasr kihsen siyuck ac top ac in wi yuck on, ma inge kewa fahkwack ke finsrak lasr.​—Hebrew 10:23.

Luhlahlfongi lom ke God ac fah ahkkweyeyuck. Mwet sap Paul el fahk kahs inge nuh sin sie congregation in pacl lal: “Nga kena liye kowos, . . . kuht kewa fah akacsruhi, luhlahlfongi lowos ac kasreyuc, ac luhlahlfongi luhk ac fah kahsre kowos.” (Rome 1:11, 12) Ke toeni inge, asruoki lasr pacl nuhkewa yurin mwet lili wiyacsr uh ahkkweye luhlahlfongi lasr ac in moulkihn moul fal nuh ke oakwuck wo luhn Bible.

Yac kom luhngse in liye ac puhla pac ohiyac wowo nuhkewa ma ahkkahlwemyeyuck tari inge? Kuht suli kom in wi ke toeni lasr uh. Kuht arlacna engan in paing kom. Kom sukohsohk in wi nuh ke toeni nuhkewa, wacngihn molo kuh ahluh in mani ma ac pahsiyuck.

• Toeni nuhkewa luhn congregation lasr uh ukwe mwe srihkasrak fuhkah?

• Ma wo fuhkah kuht ac kuh in eis ke pacl se kuht wi ke toeni lun mwet Christian uh?