MWE LUTLUT 3
Ma Pwacye ke Bible uh Sifwil Konweyuckyak Fuhkah?
Mwet Lutlut Bible, ke yac 1870 kuhtuh
Tower in San se meet oreklac ke yac 1879
Tower in San ke pacl inge
Bible uh palye lah tukun misac lal Christ, ac fah oasr mwet luti kikiacp suc ac tuhkuh nuh inmahsrlon mwet Christian ac kiacpwelah mwe luti pwacye ke Bible. (Orekma 20:29, 30) Tok, ma inge ahkpwacyeyuck oacna ke palyeyuck ah. Eltahl oracni mwe luti lal Jesus ac mwe luti luhn mwet suc tiac alu nuh sin God ac oraclah alu luhn mwet Christian kikiacp. (Luo Timothy 4:3, 4) Kuht ac etuh fuhkah lah ma kuht luti mihsenge uh pa mwe luti pwacye luhn Bible?
Pacl fal Jeova elan ahkkahlwemye ma pwacye uh. El palye lah ke lusen pacl sahflah, ‘etwacack pwacye ac fah yohkwelihk.’ (Daniel 12:4, BMK) Ke 1870, u srihsrihk se muhtwacwacack in suk ma pwacye ke Bible uh. Eltahl akihlen lah mwe luti pucspucs luhn alu in pacl sac tiac fal nuh ke Bible. Pwacnacng, eltahl muhtwacwacack suk in kahlwem na pwacye ke mwe luti pwacye luhn Bible, ac Jeova el kahsreltahl in kahlwem kac.
Mukul oaru pucspucs eltahl lihksreni lohacng in lutlut ke Bible. Mwet Lutlut oaru luhn Bible inge, suc etweyuck ke pacl inge oacna Mwet Loh luhn Jeova, eltahl orekmakihn sie inkacnek in lutlut ma kuht orekmakihn na ne mihsenge. Eltahl lutlut ke kain in sihfac ke Bible. Ke pacl se eltahl sun sie fuhs ma eltahl tiacna kahlwem kac, eltahl suk kuhtuh fuhs sahyac ma ac kahsreltahl in ahkuhtweyac. Ke pacl se eltahl sun sie mwe luti ma fal nuh ke ip nuhkewa ke koanon ma Suhmuhslah uh, eltahl suhmuhslah ma inge. Ke srihpen eltahl orekmakihn Bible in sifacna topuk ma eltahl tiac kahlwem kac uh, ma inge kahsreltahl in sifwil pac konwacack ma pwacye ke inen God ac ke Tohkohsrahi lal, oakwuck lal nuh sin mwetuh ac nuh facluh, ohiyen mwet misac, ac ke finsrak in sifwil moulyak ke pacl fahsruh uh. Ma eltahl konwacack inge ahksukohsohkyacltahllah liki mwe luti kikiacp ac orekma suhtuh.—John 8:31, 32.
Ke yac 1879, Mwet Lutlut Bible eltahl muhtwacwacack akihlen lah pacl fal in ahkkahlwemye ma pwacye uh nuh sin mwet nuhkewa. Pwacnacng ke yac sac me, eltahl muhtwacwacack orek mackuhsin ma srackna fahsr na ne mihsenge. Ma inge pahngpahng, Tower in San Fahkwack Tohkohsrahi luhn Jeova. Ke pacl inge kuht fahkwack ma pwacye ke Bible uh nuh sin mwet pucspucs, ahluhkwelah acn 240 ac kahs 750 kuhtuh. Etwacack pwacye yohkwelihk liki na meet ah!
Meac sikyak nuh ke ma pwacye in Bible tukun misac lal Jesus?
Meac kahsre kuht in sifwil konwacack ma pwacye ke Kahs luhn God?