Efuh Kuh Kuht Pahngpahng Mwet Loh luhn Jeova?

Puhs mwet pahngon muh inen alu sasuc se pa Mwet Loh luhn Jeova. Tuhsruhktuh, ahluhkwelah yac 2,700 somlah ah, Bible uh ahkuhtweyac lah mwet kuhlwacnsap luhn God pwacye sefanna eltahl pahngpahng “mwet loh” lal. (Isaiah 43:10-12) Nwe ke yac 1931, kuht etweyuck oacna Mwet Lutlut Bible. Efuh kuh kuht muhtwacwacack orekmakihn ine se inge Mwet Loh luhn Jeova?

Ine se inge fahkwack God lasr uh. Fal nuh ke kuhtuh ma suhmuhslah in pacl meet ah, inen God, Jeova, oasr in Bible pacl tausin kuhtuh. Ke lweng pucspucs ine se inge aholyucklac nuh ke wal pucspucs oacna Leum kuh God. Tuhsruhktuh, God pwacye el fahk inel nuh sel Moses. Jeova el fahk nuh sel, “Pa inge Inek nuh tok.” (Exodus 3:15) Ke ma inge, el ahkkahlwemye lah el siena liki god kikiacp nuhkewa sahyac. Kuht arlac engan in fahkwack ine muhtahl se luhn God inge.

Ine se inge fahkwack orekma lasr uh. Fihl nuh ke fihl ke mwet in pacl meet ah, muhtwacwacack kacl Abel, eltahl sang ma loh ke luhlahlfongi laltahl nuh sin Jeova. Ac ke lusen yac pucspucs somlah ah, Noah, Abraham, Sarah, Moses, David ac kuhtuh pac sahyac eltahl wi pac “un mwet loh na luhlahp” se inge. (Hebrew 11:4–12:1) Fin pa utuckyak mwet se nuh in court ke sie ma el tiac oruh, kuht ac ke sang kahsruh nuh sel in fahkwack ma pwacye kacl uh. In oacpacna, kuht ke oruh in kahlwem ma pwacye ke God lasr uh.

Kuht etahel Jesus. Bible uh pahnglol “mwet loh oaru ac pwacye.” (Fwackyuk 3:14) Jesus el fahk “Nga fahkkomyak tuh elos in etwekom” ac tahfwelah na “kahskahs ke ma pwacye” ke God. (John 17:26; 18:37) Ohinge mwet tuhma lutlut pwacye luhn Christ uh enenuh in fahkwack inen Jeova in etweyuck. Pa inge ma Mwet Loh luhn Jeova eltahl kwacfeacng in oruh uh.

• Efuh kuh Mwet Lutlut Bible uh muhtwacwacack orekmakihn ine se inge Mwet Loh luhn Jeova?

• Ngac me oasr mwet loh luhn Jeova fin facluh?

• Suc Mwet Loh se ma wo emeet luhn Jeova?