Ya Kut Moul Ke “Len Safla”?

1. Buk fuka akkalemye nu sesr ke pal fwasru?

YA KOM nu liye a long news su akkalemyeyuk ke television a srike in nunku ka la, ‘Mea fwa sikyak nu ke fwalu ke pal fwasru?’ Oasr ma upa puspus su sa in sikyak a tia eteyuk a wangin met ku in akkalemye ke ma fwa sikyak lutu. (Jemes 4:14) Tusruktu, Jeova el etu mea fwa sikyak ke pal fwasru. (Isaia 46:10) In pal meeta Baibel, el palye tari ke ma koluk nukewa su sikyak ke len lasr a el palye pa ke ma mwomwo su fwa sikyak ke pal na fototo fwasru.

2, 3. Kusensiyuk fuka met tuma lutlut elos siyuk nu sin Jisus, a me top fuka el akkalemye?

² Jisus Kraist el sramsramkin ke Togusrai lun God, su fwa aksafyela ma koluk nukewa a fwa oru fwalu nu ke sie paredais. (Luk 4:43) Metu elos lungse in etu la ngea Togusrai sa fwa tuku. Aok, met tuma lutlut lun Jisus elos siyuk sel: “A mea akulin oasr tari lom, a saflaiyen akwuk puspus lun fwalu?” (Mattu 24:3, NW) Jisus el topuk nu selos la Jeova God mukena pa etu na paye la ngea saflaiyen akwuk puspus lun fwalu fwa tuku. (Mattu 24:36) Ne ouinge Jisus el palye ke ma puspus su fwa sikyak fwin fwalu meet liki Togusrai sa fwa orala misla paye a moul mwomwo su wangin me sensen ka nu sin metu. Ma el palye inge el akpayeyuk ke pal inge!

³ Meet liki kut fwa tuni ke me akpayeye ka la kut moul ke “saflaiyen akwuk puspus lun fwalu,” inge lela kut in nunku a srike in akuteye ke sie meun su wangin kutena met ku in liye. Ma inge sikyak in kosrao, a fwokin meun inge oasr me elya yok sikyak nu sesr.

SIE MEUN IN KOSRAO

4, 5. (a) Mea sikyak in kosrao tokin Jisus el eis mwal lal oana Togusra? (b) In fwal nu ke Fwakyuk 12:12, mea fwako lun meun se inge su orek in kosrao?

⁴ Sapta se tari a ke buk inge el akuteye ka la Jisus el ekla Togusra in kosrao in yea 1914. (Daniel 7:13, 14) Tia pat tokin el eis ku lal ke Togusrai, Jisus el mutamwauk in orekma. Oasr “meun orek in kosrao,” Baibel el akkalemye. “Maikael [sie pa e kel Jisus] a lipufan lal elos som in meun nu sin dragon [Setan su Devil], a dragon el meun wi lipufan lal.”a Setan a lipufan koluk nukewa lal, su pangpang dimon puspus, elos kuf ke meun se inge a elos sisila liki in kosrao nu fwalu. Ke ma inge lipufan saye nukewa su oaru nu sin God elos enganak ke sripen Setan a dimon nukewa lal elos wanginla in kosrao. Tusruktu, nu sin metu elos tia pulakin kain engan inge. Meyen Baibel el palye tari: “We nu sin fwalu . . . tu Devil el oatuwot nu yurumwos, a el mulat ma lulap, tu el etu tu pal lal fototo.”​—Fwakyuk 12:7, 9, 12.

⁵ Nunak munas loang akmwoye nu ka la mea fwokin meun se su orek in kosrao. Ke kasrkusrak lal, Setan el lungse in oru me keok, ku ma upa, nu sin met nukewa fwin fwalu. Oana ma kom ku in liye, kut oasr tari ke pal su oasr me keok puspus inge. Tusruktu pal inge fwa tia loes, el oasr ke “pal fototo” na. Setan el etu pa ma inge. Baibel el akkalemye ke lusen pal se inge oana “len safla.” (2 Timote 3:1) Kut arlana insemwomwo meyen tia pat God el fwa akwanginyela me akkoluk nukewa su Devil el oru fwin fwalu! Lela kut in nunku ke kutu ma su palyeyuk in Baibel su akpayeyuk ke pal inge. Ma inge akpayeye la kut moul ke len safla a Togusrai lun God tia pat el fwa sang me insemwomwo puspus nu sin met nukewa su lungse Jeova. Ma se meet, lela kut in tuni me akul akosr su Jisus el fwak la ma inge sang me akilenye ke pal su kut moul ka inge.

MA SIKYAK YOK PUSPUS KE LEN SAFLA INGE

6, 7. Fuka kas lal Jisus ke meun a sral akpayeyuk ke pal inge?

⁶ “Mutanfwal fwa tuyuk lain mutanfwal a togusrai lain togusrai.” (Mattu 24:7) Oasr million puspus sin met su anwuki ke meun puspus su orek ke century puspus somla. Sie met sim fwin an Britain el simusla: “Oasr met puspus su anwuki ke meun su orek ke century ak 20 inge yok liki kutena pal ke me sramsram lun fwalu. . . . Century se inge oasr meun su sikyak apkuran in pal nukewa, oasr pal na srisrik a pal fototo su wangin meun ke kutena an.” Pa inge kas su akkalemyeyuk ke sie report lun Worldwatch Institute: “Pus liki pal tolu ke pisen met su akkolukyeyuk ke meun ke century [ak 20] inge yok liki kutena pisen met akkolukyeyuk ke meun nukewa su orek mutamwauk in century se meet C.E. nu ke yea 1899.” Pus liki 100 million sin met elos mise ke sripen meun su mutamwauk in yea 1914. Million puspus sin met elos pulakin asor yok a ngal upa meyen met su elos lungse mise ke meun inge. Saap kom pulakin pa oiya inge meyen sie sin met su kom lungse el mise pa ke meun.

⁷ “E fwa oasr sral.” (Mattu 24:7) Met su oru lutlut yok elos fwak mu oasr kapkapek yok ke akwuk mwomwo in orek imae in oasr kain in fwako puspus in sang kasru me mongo ke lusen yea 30 somla. Ne ouinge, srakna oasr sral sikyak meyen oasr met puspus su wangin mani in moli mongo nelos, ku wangin an selos su elos ku in eoki fwokun sak sunalos we. Ke mutanfwal puspus su sekasrup, oasr met puspus su piselos pus liki billion se elos eis tala se ku srik liki tala se ke molin orekma lalos ke len se. Pus sin met inge elos keok ke sripen sral upa. U se inge su pangpang World Health Organization el motko mu mongo su arlana srikla a sufwal pa paenang mise lun tulik su piselos oasr ke million limekosr ke kais sie yea.

8, 9. Mea akkalemye la kas palu lal Jisus ke kusrusr a me lokwalok ku kain in mas upa akpayeyuk?

⁸ “E fwa oasr kusrusr lulap.” (Luk 21:11) Fwal nu ke sie report, mutamwauk in yea 1990 mukena oasr kusrusr su fukoko na paye su oasr ke kusrusr 17 kais sie yea su ku in akkolukye loom lulap puspus a ku in oru foku in sroasrelik ku mangelik. (U.S. Geological Survey) A ke pal puspus oasr kusrusr lulap sikyak yea nukewa su ku in kunausla loom lulap puspus. Oasr sie pa report el akkalemye: “Oasr kusrusr lulap puspus su uniye foko foko tausan sin met ke lusen yea 100 somla a me kasru su tuku ke yokyokelik lun technology in aksrikyela pisen met mise tusruktu sufwal a arlana srikla.”

⁹ “E fwa oasr . . . me lokwalok [“mas upa,” NW].” (Luk 21:11) Fwinne oasr kapkapek nu ke akwuk lun ono, oasr mas su sikyak tari in pal meeta a kain in mas sasu su akkeokye metu. Sie report el akkalemye la oasr kain in mas 20 su arlana eteyuk, wekunang tuberculosis, malaria, a cholera, su sikyak pal nukewa ke yea puspus somla, a kutu pa kain in mas inge arlana upa in unweyukla ke inkanek lun ono. Aok, oasr mas sasu 30 su sikyak. Kutu mas inge soenna oasr ono su eteyuk nu ka in sang unwela ma inge a arlana sensen.

OIYEN MET KE LEN SAFLA

10. Kain in oiya fuka palyeyuk in 2 Timote 3:1-5 su kom ku in liye ke met puspus ke pal inge?

¹⁰ Sayen akkalemyeyen ma puspus su sikyak fwin fwalu inge, Baibel el palye pa la len safla fwa akilenyuk ke ekla lulap nu ke oiya lun metu. Met sap Poul el akkalemye ke oiya puspus su metu elos fwa akkalemye. In 2 Timote 3:1-5, kut ku in ridi: “Tu in len safla pal in ongoiye lulap fwa tuku.” Ke fus inge, Poul el fwak la metu elos fwa

• met su lungselos sifwana

• lungse mani

• seakos papa a nine

• seoaru

• tia lungse met in sou lalos sifwana

• tia sifwana leum fwelos

• met lemnak

• met lungse me akengan yok liki lungse God

• met su sruokye luman sumwosmwos a lafwekin ku lun sumwosmwos insielos

11. Fuka Sam 92:7 el akkalemye ke ma e fwa sikyak nu sin met koluk nukewa?

¹¹ Ya met in an sum an elos akkalemye kain in oiya ouinge? Wangin alolo ka la elos akkalemye oiya inge. Oasr met puspus yen nukewa su oasr oiya koluk lalos. Ma inge akkalemye la tia pat God el fwa akwanginyela ma inge, meyen Baibel el akkalemye: “Ke met koluk elos kapek oana maa, a ke met orek ma koluk nukewa elos kapkapek, ma inge tu elos fwa wanginla ma patpat.”​—Sam 92:7.

MA MWO PUSPUS SU SIKYAK!

12, 13. Fuka “etauk” sumwos el yokelik ke “pal safla” inge?

¹² Paye la len safla el nenela ke me keok upa, oana ma Baibel el palye tari. Aok fwalu nenela ke ma koluk, tusruktu oasr ma mwomwo puspus su sikyak in masrlon met nukewa su alu nu sin Jeova.

¹³ “Etauk fwa yokelik,” buk se inge in Baibel su pangpang Daniel el palye. Kas palu inge el sramsramkin etauk paye a sumwos ke God. Ma inge fwa sikyak ngea? Ke lusen “pal safla.” (Daniel 12:4) Yokna in yea 1914, Jeova el sang kasru nu sin met puspus su lungse na paye in kulansap nu sel in kapkapek ke etauk lalos ke Baibel. Etauk a kalem lalos yokelik ke ma paye ke inen God a ke akwuk lal, ke me kise lun lango lun Jisus Kraist, ke ma sikyak nu sin met mise, a ke sifwil moulyuk. Sayen ma inge, met nukewa su alu nu sin Jeova elos lotela la fuka in moulkin moul lalos ke inkanek su akinsemwomwoyelos a sang kaksak nu sin God. Elos eis pa kalem mwomwo ke orekma ku kunokon lun Togusrai lun God a la fuka ma inge fwa aksumwosye ma puspus fwin fwalu. Mea elos oru ke etauk inge? Kusensiyuk inge kol kut nu ke sie pa kas palu su akpayeyuk ke len safla inge.

14. Fuka lupan orekma in sulkakin peng mwo lun Togusrai ke pal inge, a su sulkakin ma inge?

¹⁴ “Mwosasu inge lun Togusrai fwa sulkakinelik fwin fwalu nufon,” Jisus Kraist el akkalemye ke kas palu ke “saflaiyen akwuk puspus lun fwalu.” (Mattu 24:3, 14, NW) Fwin fwalu nufon, peng mwo lun togusrai el sulkakinyukelik in an pus liki 230 a ke kas su pus liki 400 in akkalemye nu sin metu la mea kalmeyen togusrai, mea el fwa oru, a fuka kut ku in eis me insemwomwo su tuku ka. Million sin Met Lo lun Jeova elos moniyuk in sulkakin peng mwo lun Togusrai. Elos tuku liki “mutanfwal nukewa a sruf nukewa a met a loa nukewa.” (Fwakyuk 7:9) Met Lo elos oru lutlut ke Baibel ke wangin molo nu sin million met in loom selos su lungse in etu ka la mea Baibel el luti na paye. Sie me akpayeye mwolana lun kas palu, yokna ke sripen Jisus el palye la met Kristian paye elos fwa “srungeyukla sin met nukewa”!​—Luk 21:17.

MEA KOM FWA ORU?

15. (a) Ya kom lulalfongi la kut moul in len safla, a efu? (b) Mea kas se inge “safla” fwa kalmekin nu sin met nukewa su lain Jeova a nu sin met nukewa su akpusiselyelos nu ke kolyuk lun Togusrai lun God?

¹⁵ Ke sripen oasr kas palu puspus lun Baibel su akpayeyuk ke pal inge, ya kom tia insese ka la kut moul ke len safla? Tokin peng mwo el sulkakinyuk fwal nu ke lupa su Jeova el lungse, na “safla” e fwa tuku na paye. (Mattu 24:14) Kalmeyen “safla” pa ke pal se su God el fwa akwanginyela ma koluk nukewa fwin fwalu. Jeova el fwa orekmakunul Jisus a lipufan nukewa lal in kunausla met nukewa su lungse na paye in lainul. (2 Tessalonika 1:6-9) Setan a lipufan nukewa lal elos fwa tia sifwil kiapela mutanfwal nukewa. Tokin ma inge, Togusrai lun God fwa use me insemwomwo puspus nu sin met nukewa su akpusiselyelos ke me kolyuk sumwosmwos lun togusrai inge.​—Fwakyuk 20:1-3; 21:3-5.

16. Ma mwo fuka kom enenu in oru?

¹⁶ Ke sripen saflaiyen akwuk lal Setan el apkuran, kut enenu in siyuk sesr sifwana, ‘Mea Nga enenu in oru?’ Sie orekma mwo pa in tafwela in lutlut yok kel Jeova a ke ma el siyuk sesr. (Jon 17:3) Akkalemye la kom nunku yok ke orekma lom in lutlut Baibel. Kom kafweang in asrouki pal nukewa nu sin met puspus su suk inkanek in oru ma lungse lun Jeova. (Hibru 10:24, 25) Eis etauk yok su Jeova God el akola in sang nu sin met fwin fwalu nufon, a oru me aksumwos su eneneyuk nu ke moul lom tu kom in pulakin me insemwomwo lun God.​—Jemes 4:8.

17. Efu ku kunanela lun met koluk fwa me lut yok nu sin met nukewa?

¹⁷ Jisus el palye la met puspus fwa tia loang akmwoye nu ke me akpayeye nukewa su fwakak la kut moul ke len safla. Kunanela lun met koluk nukewa fwa sa tuku ke pal metu elos tia nunku ka. Oana sie met pusrapasr ke fong, met puspus elos fwa lut ka. (1 Tessalonika 5:2) Jisus el sang kas in sensen inge: “A oana in len lal Noa, a fwa ouinge ke Mwen nutin met el tuku. Tu oana in len ingo meet liki sronot elos mongo a nim, elos mari a sang in mari, nu ke len se ke Noa el sroak nu fwin oaku; a elos tia etu nu ke pal se sronot tuku, a wiselosla nukewa, a fwa ouinge ke oasr tari lun Mwen nutin met.”​—Mattu 24:37-39, NW.

18. Kas in sensen fuka lun Jisus kut enenu in esam a nunku ka?

¹⁸ Ke ma inge, Jisus el fwak nu sin met nukewa su longol: “A komwos in sifwana sismouk, saap insiomwos sesesla ke oasras, a srui, a nunkala lun fwal se inge, a len sa sa tuku nu fwomwos oana sie me kaisrip. Tu ouinge a fwa tuku nu fwelos nukewa su muta fwin mutun fwalu nufon. A komwos in sano pal e nukewa, a pre, tu komwos in ku in kaengla liki ma inge nukewa su fwa sikyuk, a in tu ye mutun Mwen nutin met.” (Luk 21:34-36) Sie inkanek lalmetmet in esam pal nukewa ke kas lun Jisus inge. Efu? Meyen met nukewa su oasr yurolos me insemwomwo lun Jeova God a lun “Mwen nutin met,” Jisus Kraist, oasr fwinsrak lalos in moliyukla ke saflaiyen akwuk lun ma puspus lal Setan inge a in moulla nu ke sie fwalu sasu su apkuran me!​—Jon 3:16; 2 Piter 3:13.