ಯೆಹೋವನ ಸಾಕ್ಷಿಗಳ ಆಡಳಿತ ಮಂಡಲಿ ಅಂದರೆ ಏನು?

ಆಡಳಿತ ಮಂಡಲಿ ಪ್ರೌಢ ಕ್ರೈಸ್ತರ ಒಂದು ಚಿಕ್ಕ ಗುಂಪಾಗಿದೆ. ಅವರು ಯೆಹೋವನ ಸಾಕ್ಷಿಗಳಿಗೆ ಬೇಕಾದ ಮಾರ್ಗದರ್ಶನಗಳನ್ನು ಕೊಡ್ತಾರೆ. ಇದನ್ನು ಎರಡು ವಿಧದಲ್ಲಿ ಮಾಡ್ತಾರೆ.

• ಪ್ರಕಾಶನಗಳ, ಕೂಟಗಳ, ಶಾಲೆಗಳ ಮೂಲಕ ಬೈಬಲಾಧಾರಿತ ನಿರ್ದೇಶನಗಳನ್ನು ಕೊಡೊ ಜವಾಬ್ದಾರಿ ಇವರಿಗಿದೆ.—ಲೂಕ 12:42.

• ಯೆಹೋವನ ಸಾಕ್ಷಿಗಳು ಮಾಡ್ತಿರೋ ಲೋಕವ್ಯಾಪಕ ಕೆಲಸವನ್ನು ನೋಡ್ಕೊಳ್ತಾರೆ. ಅಂದ್ರೆ ಹೇಗೆ ಸೇವೆ ಮಾಡಬೇಕು ಮತ್ತು ಕಾಣಿಕೆಗಳನ್ನು ಒಳ್ಳೇ ರೀತಿಯಲ್ಲಿ ಹೇಗೆ ಬಳಸೋದು ಅಂತ ತೀರ್ಮಾನಿಸ್ತಾರೆ.

ಒಂದನೇ ಶತಮಾನದಲ್ಲಿ ‘ಯೆರೂಸಲೇಮಲ್ಲಿದ್ದ ಅಪೊಸ್ತಲರು ಮತ್ತು ಹಿರಿಯರು’ ಸಭೆಗೋಸ್ಕರ ತೀರ್ಮಾನಗಳನ್ನು ಮಾಡ್ತಿದ್ರು. ಅದೇ ಮಾದರಿಯನ್ನ ಇವತ್ತು ಆಡಳಿತ ಮಂಡಲಿಯವರು ಪಾಲಿಸ್ತಿದ್ದಾರೆ. (ಅಪೊಸ್ತಲರ ಕಾರ್ಯ 15:2) ಆದರೆ ಆಡಳಿತ ಮಂಡಲಿಯ ಸದಸ್ಯರು ನಮ್ಮ ಸಂಘಟನೆಯ ನಾಯಕರಲ್ಲ. ಅವರು ಯೆಹೋವ ದೇವರು ನೇಮಿಸಿರೋ ಯೇಸು ಕ್ರಿಸ್ತನೇ ಸಭೆಯ ಯಜಮಾನ ಅಂತ ಒಪ್ಪಿಕೊಳ್ತಾರೆ. ಅಷ್ಟೇ ಅಲ್ಲ ಮಾರ್ಗದರ್ಶನಕ್ಕಾಗಿ ಬೈಬಲ್‌ ಏನು ಹೇಳುತ್ತೆ ಅಂತ ನೋಡ್ತಾರೆ.—1 ಕೊರಿಂಥ 11:3; ಎಫೆಸ 5:23.

ಆಡಳಿತ ಮಂಡಲಿಯ ಸದಸ್ಯರು ಯಾರು?

ಆಡಳಿತ ಮಂಡಲಿಯ ಸದಸ್ಯರು ಯಾರಂದ್ರೆ ಕೆನೆತ್‌ ಕುಕ್‌, ಗೇಜ್‌ ಫ್ಲೀಗಲ್‌, ಸ್ಯಾಮ್ಯೆಲ್‌ ಹರ್ಡ್‌, ಜೆಫ್ರಿ ಜ್ಯಾಕ್ಸನ್‌, ಜೋಡಿ ಜೆಡೇಲ್‌, ಸ್ಟೀಫನ್‌ ಲೆಟ್‌, ಗೆರಿಟ್‌ ಲಾಶ್‌, ಜೇಕಬ್‌ ರಂಫ್‌, ಮಾರ್ಕ್‌ ಸ್ಯಾಂಡರ್ಸನ್‌, ಡೇವಿಡ್‌ ಸ್ಪ್ಲೇನ್‌ ಮತ್ತು ಜೆಫ್ರಿ ವಿಂಡರ್‌. ಇವರು ಅಮೆರಿಕದ ವಾರ್ವಿಕ್‌ನಲ್ಲಿರೋ ಮುಖ್ಯ ಕಾರ್ಯಾಲಯದಲ್ಲಿ ಇದ್ದಾರೆ.

ಆಡಳಿತ ಮಂಡಲಿ ಹೇಗೆ ಸಂಘಟಿತವಾಗಿದೆ?

ಎಲ್ಲ ಕೆಲಸಗಳನ್ನು ಚೆನ್ನಾಗಿ ಮಾಡೋಕೆ ಆಡಳಿತ ಮಂಡಲಿಗೆ ಆರು ಕಮಿಟಿಗಳು ಸಹಾಯಮಾಡುತ್ತೆ. ಆಡಳಿತ ಮಂಡಲಿಯ ಸದಸ್ಯರು ಒಂದು ಅಥವಾ ಅದಕ್ಕಿಂತ ಹೆಚ್ಚು ಕಮಿಟಿಗಳಲ್ಲಿ ಕೆಲಸ ಮಾಡ್ತಾರೆ.

• ಸಂಯೋಜಕರ ಸಮಿತಿ: ಕಾನೂನಿಗೆ ಸಂಬಂಧಪಟ್ಟ ವಿಷಯಗಳನ್ನು ನೋಡಿಕೊಳ್ಳುತ್ತೆ. ವಿಪತ್ತಿನ ಸಮಯದಲ್ಲಿ ಮತ್ತು ಹಿಂಸೆ ವಿರೋಧ ಬಂದಾಗ ಸಹಾಯ ಮಾಡುತ್ತೆ. ಅಲ್ಲದೆ ತುರ್ತು ಕೆಲಸಗಳನ್ನೂ ನೋಡಿಕೊಳ್ಳುತ್ತೆ.

• ಸಿಬ್ಬಂದಿ ಸಮಿತಿ: ಬೆತೆಲ್‌ ಕುಟುಂಬದವರ ಅಗತ್ಯಗಳನ್ನು ನೋಡಿಕೊಳ್ಳುತ್ತೆ.

• ಪ್ರಕಾಶಕರ ಸಮಿತಿ: ಬೈಬಲ್‌ ಸಾಹಿತ್ಯಗಳನ್ನು ತಯಾರಿಸಿ ಅದನ್ನು ಸಾಗಿಸುತ್ತೆ. ರಾಜ್ಯ ಸಭಾಗೃಹಗಳ, ಭಾಷಾಂತರ ಕಛೇರಿಗಳ ಮತ್ತು ಶಾಖಾ ಕಛೇರಿಗಳ ನಿರ್ಮಾಣ ಕೆಲಸ ನೋಡಿಕೊಳ್ಳುತ್ತೆ.

• ಸೇವಾ ಸಮಿತಿ: ‘ದೇವರ ಆಳ್ವಿಕೆಯ ಸಿಹಿಸುದ್ದಿಯ’ ಸಾರುವ ಕೆಲಸ ನೋಡಿಕೊಳ್ಳುತ್ತೆ.—ಮತ್ತಾಯ 24:14.

• ಶಿಕ್ಷಣ ಸಮಿತಿ: ಕೂಟಗಳಲ್ಲಿ, ಶಾಲೆಗಳಲ್ಲಿ, ಆಡಿಯೋ ಮತ್ತು ವಿಡಿಯೋ ಪ್ರೋಗ್ರಾಮ್‌ಗಳಲ್ಲಿ ಬರೋ ಆಧ್ಯಾತ್ಮಿಕ ಆಹಾರವನ್ನು ತಯಾರಿಸೋಕೆ ಮಾರ್ಗದರ್ಶಿಸುತ್ತೆ.

• ಲೇಖಕರ ಸಮಿತಿ: ಮುದ್ರಿತ ರೂಪದಲ್ಲಿ ಮತ್ತು ವೆಬ್‌ಸೈಟಿನಲ್ಲಿ ಬರೋ ಆಧ್ಯಾತ್ಮಿಕ ಆಹಾರವನ್ನು ತಯಾರಿಸೋಕೆ ನಿರ್ದೇಶಿಸುತ್ತದೆ. ಭಾಷಾಂತರ ಕೆಲಸವನ್ನು ನೋಡಿಕೊಳ್ಳುತ್ತೆ.

ಈ ಕಮಿಟಿಗಳ ಜೊತೆ ಮಾಡೋ ಕೆಲಸಗಳಲ್ಲದೇ ಸಂಘಟನೆಯ ಅಗತ್ಯಗಳನ್ನು ನೋಡಿಕೊಳ್ಳೋಕೆ ಪ್ರತಿ ವಾರ ಆಡಳಿತ ಮಂಡಲಿ ಸೇರಿಬರುತ್ತೆ. ಈ ಕೂಟಗಳಲ್ಲಿ ಆಡಳಿತ ಮಂಡಲಿಯ ಸದಸ್ಯರು ಬೈಬಲ್‌ ಏನು ಹೇಳುತ್ತೆ ಅಂತ ನೋಡುತ್ತಾರೆ ಮತ್ತು ಒಳ್ಳೇ ತೀರ್ಮಾನಗಳನ್ನು ತಗೊಳ್ಳೋಕೆ ಪವಿತ್ರ ಶಕ್ತಿಗಾಗಿ ಕೇಳಿಕೊಳ್ತಾರೆ.—ಅಪೊಸ್ತಲರ ಕಾರ್ಯ 15:25.

ಆಡಳಿತ ಮಂಡಲಿಯ ಸಹಾಯಕರು ಯಾರು?

ಆಡಳಿತ ಮಂಡಲಿಗೆ ಸಹಾಯ ಮಾಡ್ತಿರೋ ಈ ಸಹೋದರರು ನಂಬಿಗಸ್ತ ಕ್ರೈಸ್ತರಾಗಿದ್ದಾರೆ. (1 ಕೊರಿಂಥ 4:2) ಇವರು ಕೆಲಸ ಮಾಡ್ತಿರೋ ಕಮಿಟಿಗಳಲ್ಲಿ ತಮ್ಮ ಅನುಭವ ಮತ್ತು ಸಾಮರ್ಥ್ಯವನ್ನು ಚೆನ್ನಾಗಿ ಬಳಸ್ತಾರೆ. ಅಷ್ಟೇ ಅಲ್ಲ ಇವರಿಗೋಸ್ಕರ ಏರ್ಪಡಿಸಿರೋ ಪ್ರತಿ ವಾರದ ಕೂಟಗಳಿಗೂ ಹೋಗ್ತಾರೆ. ಇವರು ನಿರ್ಣಯ ಮಾಡಲ್ಲ ನಿಜ. ಆದರೆ ಒಳ್ಳೇ ನಿರ್ಣಯಗಳನ್ನು ಮಾಡೋಕೆ ಬೇಕಾದ ಸಲಹೆ, ಹಿನ್ನೆಲೆಗಳನ್ನ ಕೊಡ್ತಾರೆ. ಕಮಿಟಿಯವರ ಜೊತೆ ಚರ್ಚೆ ಮಾಡಿದ ಮೇಲೆ ಒಂದು ತೀರ್ಮಾನ ತಗೊಳ್ತಾರೆ, ಅಲ್ಲದೇ ಅದರ ಪ್ರಗತಿಯನ್ನು ಈ ಸಹಾಯಕರು ನೋಡಿಕೊಳ್ತಾರೆ. ಇವರನ್ನ ಪ್ರಪಂಚದ ಬೇರೆ ಬೇರೆ ಕಡೆಯಲ್ಲಿರೋ ಸಹೋದರರನ್ನು ಭೇಟಿಮಾಡೋಕೆ ಮತ್ತು ವಾರ್ಷಿಕ ಕೂಟ ಅಥವಾ ಗಿಲ್ಯಡ್‌ ಪದವಿಪ್ರದಾನ ಸಮಾರಂಭದಲ್ಲಿ ಭಾಷಣ ಕೊಡೋಕೆ ಆಡಳಿತ ಮಂಡಲಿ ನೇಮಿಸುತ್ತೆ.