អត្ថបទសិក្សា៥០
ចម្រៀងលេខ៤៨ ដើរជាមួយនឹងព្រះយេហូវ៉ារាល់ថ្ងៃ
ចូរមានចិត្តរាបទាបដូចព្រះយេហូវ៉ា
«ចូរយកតម្រាប់ព្រះ ក្នុងនាមជាកូនជាទីស្រឡាញ់របស់លោក»។—អេភ. ៥:១
ចំណុចផ្ដោត
របៀបបួនយ៉ាងដែលយើងអាចមានចិត្តរាបទាបដូចព្រះយេហូវ៉ា។
១. ហេតុអ្វីចិត្តរាបទាបរបស់ព្រះយេហូវ៉ាគឺជាអ្វីមួយដែលគួរឲ្យកោតស្ងើច?
ពេលអ្នកគិតអំពីពួកអ្នកគ្រប់គ្រងក្នុងពិភពលោកនៅសព្វថ្ងៃនេះ តើអ្នកគិតថាពួកគេមានចិត្តរាបទាបឬទេ? អ្នកទំនងជាមិនគិតដូច្នេះទេ។ ផ្ទុយពីពួកគេ ព្រះយេហូវ៉ាដែលជាព្រះដែលមានឫទ្ធានុភាពខ្លាំងក្លាបំផុតមានចិត្តរាបទាប។ (ចសព. ១១៣:៥-៨) គ្មានអ្នកណាម្នាក់មានចិត្តរាបទាបដូចព្រះយេហូវ៉ាទេ។ លោកគ្មានអំណួតទាល់តែសោះ។ នៅក្នុងអត្ថបទនេះ យើងនឹងពិចារណាគុណសម្បត្តិបួនរបស់ព្រះយេហូវ៉ា និងរបៀបដែលគុណសម្បត្តិនីមួយៗទាំងនោះបង្ហាញថាព្រះយេហូវ៉ាមានចិត្តរាបទាបយ៉ាងខ្លាំង។ យើងក៏នឹងពិចារណាដែរអំពីរបៀបដែលលោកយេស៊ូបង្ហាញចិត្តរាបទាបដូចបិតាលោក។ ការពិចារណាអ្វីទាំងនេះនឹងជួយយើងឲ្យចូលកាន់តែជិតព្រះយេហូវ៉ា និងមានចិត្តរាបទាបដូចលោកកាន់តែខ្លាំង។
ព្រះយេហូវ៉ាគឺស្រួលទាក់ទង
២. តើចម្រៀងសរសើរព្រះ ៦២:៨បង្ហាញយ៉ាងណាអំពីព្រះយេហូវ៉ា? (សូមមើលរូបភាពផងដែរ)
២ តាមធម្មតា យើងមិនស្រួលចូលទៅជិតមនុស្សដែលមានអំណួតទេ។ ពួកគេច្រើនតែប្រព្រឹត្តដោយមិនសប្បុរសទៅលើអ្នកឯទៀត ដោយសារពួកគេគិតថាខ្លួនប្រសើរជាងអ្នកឯទៀត ហើយនោះធ្វើឲ្យអ្នកឯទៀតចង់ជៀសពីពួកគេ។ ព្រះយេហូវ៉ាខុសគ្នាស្រឡះពីពួកគេ! ដោយសារបិតារបស់យើងនៅស្ថានសួគ៌មានចិត្តរាបទាប លោកអញ្ជើញយើងឲ្យចូលទៅជិតលោក ហើយប្រាប់លោកអំពីអារម្មណ៍និងគំនិតរបស់យើង។ (សូមអាន ចម្រៀងសរសើរព្រះ ៦២:៨) ដូចឪពុកដែលស្រឡាញ់យកចិត្តទុកដាក់ចំពោះកូន ពិតជាចង់ឲ្យកូនប្រាប់គាត់អំពីការខ្វល់ខ្វាយ នោះព្រះយេហូវ៉ាពិតជាចង់ស្ដាប់ការអធិដ្ឋានរបស់ពួកអ្នកគោរពប្រណិប័តន៍លោក។ តាមពិត លោកបានឲ្យគេកត់ទុកសេចក្ដីអធិដ្ឋានជាច្រើនរបស់អ្នកគោរពប្រណិប័តន៍លោកក្នុងគម្ពីរ។ នេះបង្ហាញថាព្រះយេហូវ៉ាស្រួលទាក់ទង។ (យ៉ូស. ១០:១២-១៤; ១សាំ. ១:១០-១៨) ប៉ុន្តែ ចុះយ៉ាងណាបើជួនកាលយើងមានអារម្មណ៍ថាយើងមិនសមអធិដ្ឋានទៅព្រះយេហូវ៉ា?
ដោយព្យាយាមយកតម្រាប់ព្រះយេហូវ៉ា ឪពុកម្នាក់បង្ហាញចិត្តរាបទាបពេលស្ដាប់កូនរបស់គាត់និយាយអំពីការធ្វើបែកថូផ្កាពេលរត់លេង (សូមមើលវគ្គ២)
៣. ហេតុអ្វីអ្នកអាចប្រាកដថាព្រះយេហូវ៉ាចង់ឲ្យអ្នកអធិដ្ឋានទៅលោកជាទៀងទាត់?
៣ យើងអាចអធិដ្ឋានទៅព្រះយេហូវ៉ា ទោះជាយើងមានអារម្មណ៍ថាយើងមិនសមឲ្យព្រះយេហូវ៉ាស្រឡាញ់ក៏ដោយ។ ហេតុអ្វីយើងអាចនិយាយដូច្នេះ? ក្នុងឧទាហរណ៍របស់លោកយេស៊ូអំពីកូនប្រុសដែលវង្វេងបាត់ លោកបានប្រដូចព្រះយេហូវ៉ាទៅនឹងឪពុកដ៏សប្បុរសដែលមានកូន ដែលបានធ្វើខុសជាច្រើន។ កូននោះមានអារម្មណ៍ថា ឪពុកនឹងមិនទទួលស្វាគមន៍គាត់មកក្រុមគ្រួសារវិញទេ។ ចំណែកឪពុកវិញ តើគាត់បានធ្វើយ៉ាងណាពេលកូនគាត់ត្រឡប់មកផ្ទះវិញ? លោកយេស៊ូបានមានប្រសាសន៍ថា ពេលឪពុកឃើញកូនប្រុសពីចម្ងាយ ឪពុកនោះ«រត់ទៅឱបកូន ហើយថើបដោយក្ដីស្រឡាញ់»។ (លូក. ១៥:១៧-២០) ព្រះយេហូវ៉ាគឺដូចឪពុកនោះ។ ពេលលោកឮយើងអធិដ្ឋានដោយសារយើងសោកស្ដាយអំពីកំហុសឆ្គងរបស់យើងឬមានការព្រួយបារម្ភ លោកស្ដាប់សេចក្ដីអធិដ្ឋានរបស់យើងយ៉ាងយកចិត្តទុកដាក់។ (បទំ. ៣:១៩, ២០) ព្រះយេហូវ៉ាមានចិត្តអាណិតមេត្តា ហើយដូចឪពុកក្នុងឧទាហរណ៍របស់លោកយេស៊ូដែលរត់មករកកូន លោកសម្រាលទុក្ខយើងនិងពង្រឹងទំនុកចិត្តយើងថាលោកស្រឡាញ់យើង។ (អេ. ៥៧:១៥) តើព្រះយេហូវ៉ាធ្វើដូច្នេះយ៉ាងដូចម្ដេច? គឺលោកច្រើនតែប្រើពួកអ្នកចាស់ទុំ សមាជិកក្រុមគ្រួសារដែលជាអ្នកជឿ និងបងប្អូនរួមជំនឿឯទៀត។ (យ៉ា. ៥:១៤, ១៥) ព្រះយេហូវ៉ាផ្ដល់ជំនួយទាំងនេះដល់យើងដោយសារលោកចង់ឲ្យយើងចូលទៅជិតលោក។
៤. តើលោកយេស៊ូបង្ហាញយ៉ាងណាថាលោកស្រួលទាក់ទង?
៤ លោកយេស៊ូយកតម្រាប់បិតាលោក។ ដូចបិតាលោក លោកយេស៊ូមានចិត្តរាបទាប។ ជាលទ្ធផល ពេលដែលលោកយេស៊ូនៅផែនដី មនុស្សមានអារម្មណ៍ស្រួលទាក់ទងជាមួយនឹងលោក។ ពួកគេមិនខ្លាចសួរសំណួរលោកទេ។ (ម៉ាក. ៤:១០, ១១) ដូច្នេះ ពេលលោកយេស៊ូសួរទស្សនៈរបស់ពួកគេ ពួកគេប្រាប់លោកដោយឥតលាក់លៀម។ (ម៉ាថ. ១៦:១៣-១៦) ពេលពួកគេធ្វើខុស ពួកគេមិនខ្លាចលោកយេស៊ូទេ ដោយសារពួកគេដឹងថាលោកសប្បុរស មានសេចក្ដីមេត្តាករុណា និងចិត្តអត់ធ្មត់។ (ម៉ាថ. ១៧:២៤-២៧) ដោយសារលោកយេស៊ូយកតម្រាប់បិតាលោកយ៉ាងល្អ នោះពួកអ្នកកាន់តាមលោកអាចស្គាល់ព្រះយេហូវ៉ាច្បាស់ជាង។ (យ៉ូន. ១៤:៩) ពួកគេរៀនថាព្រះយេហូវ៉ាមិនដូចពួកអ្នកដឹកនាំសាសនានៅសម័យនោះដែលគ្មានមេត្តា មានអំណួត និងមិនស្រួលទាក់ទង។ ផ្ទុយទៅវិញ លោកមានចិត្តរាបទាបនិងស្រួលទាក់ទង។
៥. តើតាមរបៀបណាចិត្តរាបទាបនឹងជួយយើងឲ្យទៅជាមនុស្សដែលស្រួលទាក់ទងជាង?
៥ តើយើងអាចយកតម្រាប់ព្រះយេហូវ៉ាយ៉ាងដូចម្ដេច? ពេលយើងបណ្ដុះឲ្យមានចិត្តរាបទាប យើងនឹងទៅជាបុគ្គលដែលស្រួលទាក់ទងជាង។ បើយើងមិនមានចិត្តរាបទាបទេ យើងអាចច្រណែនអ្នកឯទៀត មានអារម្មណ៍ថាខ្លួនប្រសើរជាងអ្នកឯទៀត និងមិនអភ័យទោសឲ្យអ្នកឯទៀតពេលពួកគេធ្វើឲ្យយើងឈឺចិត្ត។ អ្វីទាំងនោះជាគុណវិបត្តិដែលធ្វើឲ្យមនុស្សមិនចង់ចូលមកជិតយើងទេ។ ប៉ុន្តែ ចិត្តរាបទាបនឹងជួយយើងឲ្យប្រព្រឹត្តដោយសប្បុរស មានចិត្តអត់ធ្មត់ និងអភ័យទោសឲ្យអ្នកឯទៀត ដែលជាគុណសម្បត្តិដែលទាក់ទាញអ្នកឯទៀត។ (កូឡ. ៣:១២-១៤) ជាពិសេស ពួកអ្នកចាស់ទុំត្រូវព្យាយាមធ្វើជាបុគ្គលដែលស្រួលទាក់ទង។ ដើម្បីធ្វើដូច្នេះ ពួកអ្នកចាស់ទុំត្រូវចំណាយពេលជាមួយបងប្អូនជាញឹកញយ។ នេះមានន័យថាពួកគេចង់ចូលរួមកិច្ចប្រជុំដោយផ្ទាល់បើអាចធ្វើបាន ជាជាងចូលរួមតាមប្រព័ន្ធវីដេអូ។ ម្យ៉ាងទៀត ពេលដែលអាចធ្វើបាន ពួកគេព្យាយាមផ្សព្វផ្សាយជាមួយនឹងបងប្អូនពីផ្ទះមួយទៅផ្ទះមួយ។ កាលដែលបងប្អូនកាន់តែស្គាល់ពួកអ្នកចាស់ទុំ ពួកគេនឹងមានអារម្មណ៍ស្រួលប្រាប់ពួកអ្នកចាស់ទុំពេលណាដែលត្រូវការជំនួយ។
ព្រះយេហូវ៉ាគឺសមហេតុផល
៦-៧. សូមលើកឧទាហរណ៍អំពីរបៀបដែលព្រះយេហូវ៉ាធ្វើតាមសំណូមពររបស់អ្នកបម្រើលោក។
៦ មនុស្សដែលមានអំណួតច្រើនតែប្រព្រឹត្តចំពោះអ្នកឯទៀតដោយមិនសមហេតុសមផល។ ប៉ុន្តែ ព្រះយេហូវ៉ាដែលតែងតែដឹងអំពីអ្វីដែលល្អបំផុតមិនធ្វើដូច្នោះទាល់តែសោះ។ ដោយសារលោកមានចិត្តរាបទាប លោកសុខចិត្តស្ដាប់អ្នកឯទៀត ហើយថែមទាំងផ្លាស់ប្ដូរការសម្រេចចិត្តរបស់លោកទៀតផង។ សូមគិតអំពីរបៀបដែលលោកប្រព្រឹត្តទៅលើមីរៀមដែលជាបងស្រីរបស់ម៉ូសេ។ មីរៀមនិងអេរ៉ុននិយាយប្រឆាំងម៉ូសេដែលជាតំណាងព្រះយេហូវ៉ា។ ដោយធ្វើដូច្នេះ មីរៀមមិនបានបង្ហាញការគោរពចំពោះព្រះយេហូវ៉ាទេ។ ជាលទ្ធផល ព្រះយេហូវ៉ាខឹងមីរៀមយ៉ាងខ្លាំង ហើយធ្វើឲ្យមីរៀមកើតជំងឺឃ្លង់។ ប៉ុន្តែ ពេលអេរ៉ុនអង្វរម៉ូសេឲ្យជួយ ហើយម៉ូសេអង្វរសុំព្រះយេហូវ៉ាធ្វើឲ្យមីរៀមជាសះស្បើយ តើលោកមានប្រតិកម្មយ៉ាងណា? បុគ្គលមានអំណួតនឹងមិនផ្លាស់ប្ដូរការសម្រេចចិត្តរបស់ខ្លួនទេ។ ប៉ុន្តែ ព្រះយេហូវ៉ាមិនធ្វើដូចនោះឡើយ។ ដោយសារព្រះយេហូវ៉ាមានចិត្តរាបទាប លោកបានស្ដាប់ម៉ូសេ ហើយធ្វើឲ្យមីរៀមជាសះស្បើយ។—ជប. ១២:១-១៥
៧ ព្រះយេហូវ៉ាក៏បង្ហាញចិត្តរាបទាបក្នុងករណីរបស់ស្ដេចហេសេគាដែរ។ តាមរយៈអ្នកប្រកាសទំនាយ ព្រះយេហូវ៉ាបានប្រាប់ស្ដេចហេសេគាថាគាត់នឹងស្លាប់។ ឮដូច្នេះ ហេសេគាយំ ហើយអង្វរសុំព្រះយេហូវ៉ាធ្វើឲ្យគាត់ជាសះស្បើយ។ ជាលទ្ធផល ព្រះយេហូវ៉ាឲ្យហេសេគារស់នៅ១៥ឆ្នាំទៀត។ (២បស. ២០:១, ៥, ៦) ព្រះយេហូវ៉ាពិតជាមានចិត្តអាណិតមេត្តាចំពោះមនុស្ស ហើយដោយសារលោកមានចិត្តរាបទាប លោកសុខចិត្តស្ដាប់ពួកគេ។
៨. សូមលើកឧទាហរណ៍ផ្សេងៗដែលបង្ហាញថាលោកយេស៊ូសមហេតុសមផល។ (ម៉ាកុស ៣:១-៦)
៨ លោកយេស៊ូយកតម្រាប់បិតាលោក។ ពេលលោកយេស៊ូនៅផែនដី លោកធ្វើអ្វីល្អៗសម្រាប់អ្នកឯទៀតពេលដែលលោកអាចធ្វើបាន។ ជាឧទាហរណ៍ លោកធ្វើឲ្យមនុស្សជាសះស្បើយនៅថ្ងៃឈប់សម្រាក ទោះជាពួកអ្នកដឹកនាំសាសនាគិតថាលោកមិនគួរធ្វើដូច្នេះក្ដី។ លោកយេស៊ូមិនតឹងរឹងទេ តែលោកសមហេតុផលនិងមានចិត្តអាណិតមេត្តា។ (សូមអាន ម៉ាកុស ៣:១-៦) នៅសព្វថ្ងៃនេះ លោកយេស៊ូជាប្រមុខនៃក្រុមជំនុំ ហើយលោកបន្ដប្រព្រឹត្តដោយសមហេតុសមផល។ ជាឧទាហរណ៍ ពេលមានបងប្អូនណាម្នាក់នៅក្នុងក្រុមជំនុំប្រព្រឹត្តអំពើខុសឆ្គងធ្ងន់ធ្ងរ លោកមានចិត្តអត់ធ្មត់នឹងគាត់ដើម្បីគាត់មានឱកាសកែប្រែ។—បប. ២:២-៥
៩. តើយើងអាចបង្ហាញថាយើងជាមនុស្សសមហេតុសមផលយ៉ាងដូចម្ដេច? (សូមមើលរូបភាពផងដែរ)
៩ តើយើងអាចយកតម្រាប់ព្រះយេហូវ៉ាយ៉ាងដូចម្ដេច? យើងត្រូវខំព្យាយាមឲ្យមានរបៀបគិតគូរនិងការប្រព្រឹត្តដ៏សមហេតុសមផលដូចព្រះយេហូវ៉ា។ (យ៉ា. ៣:១៧) ជាឧទាហរណ៍ ឪពុកម្ដាយដែលសមហេតុសមផលមិនបណ្ដោយកូនទេ តែក៏មិនតម្រូវឲ្យកូនធ្វើអ្វីដែលហួសពីសមត្ថភាពរបស់កូនដែរ។ យ៉ាកុបគឺជាគំរូដ៏ល្អស្ដីអំពីរឿងនេះ ដូចដែលបានបង្ហាញនៅដើមកំណើត ៣៣:១២-១៤។ ឪពុកម្ដាយដែលមានចិត្តរាបទាបនិងសមហេតុសមផល ក៏មិនគួរប្រៀបធៀបកូនម្នាក់ទៅនឹងកូនម្នាក់ទៀតដោយអយុត្តិធម៌ដែរ។ ម្យ៉ាងទៀត អ្នកចាស់ទុំត្រូវជាមនុស្សសមហេតុសមផល។ របៀបមួយដែលពួកគេអាចធ្វើដូច្នោះគឺដោយចុះចូលតាមការសម្រេចចិត្តរបស់អ្នកចាស់ទុំភាគច្រើនក្នុងក្រុមអ្នកចាស់ទុំ ពេលដែលនោះមិនបំពានគោលការណ៍គម្ពីរ។ (១ធី. ៣:២, ៣) មួយវិញទៀត យើងទាំងអស់គ្នាអាចព្យាយាមយល់អំពីទស្សនៈរបស់អ្នកឯទៀត ទោះជានោះខុសពីទស្សនៈរបស់យើងក៏ដោយ។ (រ៉ូម ១៤:១) ពិតណាស់ យើងគ្រប់គ្នាក្នុងក្រុមជំនុំគួរព្យាយាម«ឲ្យមនុស្សទាំងអស់ឃើញថា[យើង]ជាមនុស្សសមហេតុសមផល»។—ភី. ៤:៥
ឪពុកម្នាក់បង្ហាញភាពសមហេតុសមផលចំពោះអ្វីដែលគាត់តម្រូវពីកូនរបស់គាត់ក្នុងកិច្ចបម្រើផ្សាយ (សូមមើលវគ្គ៩)
ព្រះយេហូវ៉ាគឺអត់ធ្មត់
១០. តើព្រះយេហូវ៉ាបានបង្ហាញចិត្តអត់ធ្មត់តាមរបៀបណាខ្លះ?
១០ អ្នកទំនងជាបានកត់សម្គាល់ថាមនុស្សដែលមានអំណួតមិនចូលចិត្តរង់ចាំទេ។ អំណួតនាំឲ្យពួកគេមិនមានចិត្តអត់ធ្មត់។ នេះខុសគ្នាស្រឡះពីព្រះយេហូវ៉ា។ លោកមានចិត្តអត់ធ្មត់ជាងនរណាទាំងអស់។ ជាឧទាហរណ៍ នៅសម័យណូអេ ព្រះយេហូវ៉ាបានប្រកាសថាលោកនឹងចាំ១២០ឆ្នាំមុនលោកបំផ្លាញមនុស្សអាក្រក់។ (ដក. ៦:៣) ម្ល៉ោះហើយ ណូអេមានពេលដើម្បីចិញ្ចឹមអប់រំកូន ហើយសង់ទូកធំជាមួយនឹងក្រុមគ្រួសាររបស់គាត់។ នៅពេលក្រោយមក ទេវតាដែលជាតំណាងរបស់ព្រះយេហូវ៉ាបានស្ដាប់ដោយចិត្តអត់ធ្មត់ ពេលដែលអាប្រាហាំសួរសំណួរអំពីការបំផ្លាញក្រុងសូដុមនិងក្រុងកូម៉ូរ៉ា។ បុគ្គលដែលមានអំណួតប្រហែលជាតបថា ‹ម៉េចបានហ៊ានសួរសំណួរខ្ញុំ!›។ ប៉ុន្តែ ដោយយកតម្រាប់ព្រះយេហូវ៉ា ទេវតានោះមានចិត្តអត់ធ្មត់នឹងអាប្រាហាំ។—ដក. ១៨:២០-៣៣
១១. ដូចបានចែងនៅពេត្រុសទី២ ៣:៩ ហេតុអ្វីព្រះយេហូវ៉ាបង្ហាញចិត្តអត់ធ្មត់នៅសព្វថ្ងៃនេះ?
១១ នៅសព្វថ្ងៃនេះ ព្រះយេហូវ៉ាក៏បង្ហាញចិត្តអត់ធ្មត់ដែរ។ លោកកំពុងរង់ចាំដល់ពេលកំណត់របស់លោកឲ្យទីបញ្ចប់មកដល់។ ហេតុអ្វីលោកមានចិត្តអត់ធ្មត់? «ពីព្រោះលោកមិនចង់ឲ្យអ្នកណាម្នាក់ត្រូវបំផ្លាញចោលឡើយ តែចង់ឲ្យមនុស្សទាំងអស់មានឱកាសប្រែចិត្ត»។ (សូមអាន ពេត្រុសទី២ ៣:៩) តើចិត្តអត់ធ្មត់របស់ព្រះយេហូវ៉ាមិនមានប្រយោជន៍ឬទេ? មិនមែនទេ! មនុស្សដែលមានចិត្តស្មោះរាប់លាននាក់បានចូលទៅជិតលោក ហើយយើងសង្ឃឹមថាមនុស្សរាប់លាននាក់ទៀតក៏នឹងធ្វើដូច្នេះដែរ។ ប៉ុន្តែ ចិត្តអត់ធ្មត់របស់ព្រះយេហូវ៉ាមានកំណត់ក្នុងន័យថា លោកនឹងមិនទុកពេលឲ្យមនុស្សធ្វើអ្វីតាមតែចិត្តរបស់ពួកគេរហូតទេ។ ព្រះយេហូវ៉ាស្រឡាញ់មនុស្ស ប៉ុន្តែលោកនឹងមិនឲ្យមនុស្សអាក្រក់នៅផែនដីជារៀងរហូតឡើយ។—ហាប. ២:៣
១២. តើតាមរបៀបណាលោកយេស៊ូមានចិត្តអត់ធ្មត់ដូចព្រះយេហូវ៉ា?
១២ លោកយេស៊ូយកតម្រាប់បិតាលោក។ អស់រាប់ពាន់ឆ្នាំ លោកយេស៊ូបានបង្ហាញចិត្តអត់ធ្មត់ដូចព្រះយេហូវ៉ា។ ជាឧទាហរណ៍ លោកយេស៊ូបានឃើញពេលដែលសាថាននិយាយបង្កាច់បង្ខូចព្រះយេហូវ៉ានិងមនុស្សស្មោះត្រង់។ (ដក. ៣:៤, ៥; យ៉ូប ១:១១; បប. ១២:១០) លោកយេស៊ូក៏បានឃើញមនុស្សជាច្រើនរងទុក្ខវេទនាដែរ។ លោកច្បាស់ជាចង់«បំផ្លាញស្នាដៃរបស់មេកំណាច»យ៉ាងខ្លាំង! (១យ៉ូន. ៣:៨) ហេតុអ្វីលោកយេស៊ូអាចចាំដោយចិត្តអត់ធ្មត់រហូតដល់ព្រះយេហូវ៉ាប្រាប់លោកថា ជាពេលដែលលោកត្រូវនាំឲ្យមានការបំផ្លាញនោះ? មូលហេតុមួយគឺដោយសារលោកយេស៊ូមានចិត្តរាបទាប។ លោកដឹងថាព្រះយេហូវ៉ាគឺជាបុគ្គលតែមួយគត់ដែលសម្រេចចិត្តថាពេលណាទីបញ្ចប់នឹងមកដល់។—សកម្ម. ១:៧
១៣. តើតាមរបៀបណាលោកយេស៊ូមានចិត្តអត់ធ្មត់ចំពោះពួកសាវ័ក ហើយហេតុអ្វី?
១៣ ពេលលោកយេស៊ូនៅផែនដី លោកក៏បង្ហាញចិត្តអត់ធ្មត់ចំពោះពួកសាវ័កដែរ។ ជាឧទាហរណ៍ ពេលពួកសាវ័កប្រកែកគ្នាម្ដងហើយម្ដងទៀតថាអ្នកណាធំជាងគេ លោកយេស៊ូមិនបានឈប់ព្យាយាមជួយពួកគេទេ។ ផ្ទុយទៅវិញ លោកបន្ដមានចិត្តអត់ធ្មត់។ (លូក. ៩:៤៦; ២២:២៤-២៧) លោកជឿជាក់ថា នៅពេលក្រោយមក ពួកគេនឹងធ្វើការផ្លាស់ប្ដូរដែលចាំបាច់។ ចុះអ្នកវិញ តើអ្នកធ្លាប់ធ្វើខុសដដែលៗឬទេ? បើអ្នកធ្លាប់ អ្នកទំនងជាសប្បាយចិត្តជាខ្លាំងដែលអ្នកមានស្ដេចដែលមានចិត្តរាបទាបនិងអត់ធ្មត់បែបនេះ មែនទេ?
១៤. តើយើងអាចបណ្ដុះឲ្យមានចិត្តអត់ធ្មត់យ៉ាងដូចម្ដេច?
១៤ តើតាមរបៀបណាយើងអាចយកតម្រាប់ព្រះយេហូវ៉ា? ពេលយើងបណ្ដុះឲ្យមាន«ចិត្តគំនិតរបស់គ្រិស្ត» នោះយើងនឹងមានគំនិតនិងការប្រព្រឹត្តកាន់តែដូចព្រះយេហូវ៉ា។ (១កូ. ២:១៦) តើយើងអាចយល់កាន់តែច្បាស់អំពីចិត្តគំនិតរបស់គ្រិស្តយ៉ាងដូចម្ដេច? មិនមានផ្លូវកាត់ទេ។ យើងត្រូវអានសៀវភៅដំណឹងល្អ។ ក្រោយមក យើងត្រូវទុកពេលដើម្បីរំពឹងគិតអំពីរបៀបដែលកំណត់ហេតុនោះបង្ហាញអំពីចិត្តគំនិតរបស់គ្រិស្តក្នុងរឿងផ្សេងៗ។ ម្យ៉ាងទៀត យើងក៏ត្រូវសុំព្រះយេហូវ៉ាជួយយើងឲ្យមានចិត្តរាបទាបនិងចិត្តអត់ធ្មត់ដូចលោកយេស៊ូដែរ។ ការដែលយើងរៀនឲ្យកាន់តែមានចិត្តគំនិតរបស់គ្រិស្ត យើងនឹងកាន់តែយកតម្រាប់ព្រះយេហូវ៉ាដោយបង្ហាញចិត្តអត់ធ្មត់ចំពោះអ្នកឯទៀតនិងចំពោះខ្លួនឯង។—ម៉ាថ. ១៨:២៦-៣០, ៣៥
ព្រះយេហូវ៉ាចាប់អារម្មណ៍ពួកអ្នកដែលមានចិត្តរាបទាប
១៥. សូមលើកឧទាហរណ៍ដែលបង្ហាញថាព្រះយេហូវ៉ាស្រឡាញ់មនុស្សរាបទាប។ (ចម្រៀងសរសើរព្រះ ១៣៨:៦)
១៥ សូមអាន ចម្រៀងសរសើរព្រះ ១៣៨:៦។ គឺជាឯកសិទ្ធិណាស់ដែលព្រះយេហូវ៉ាជាព្រះដ៏ខ្ពង់ខ្ពស់បំផុតលើសកលលោកទាំងមូល យកចិត្តទុកដាក់ចំពោះមនុស្សដែលមានចិត្តរាបទាប! ជាឧទាហរណ៍ សូមគិតអំពីបុគ្គលមួយចំនួននៅសម័យបុរាណដែលមានចិត្តរាបទាប។ អ្នកឯទៀតប្រហែលជាមើលរំលងពួកគេ ប៉ុន្តែព្រះយេហូវ៉ាចាប់អារម្មណ៍ពួកគេ។ បុគ្គលខ្លះយើងប្រហែលជាមិននឹកឃើញភ្លាមៗទេ ប៉ុន្តែព្រះយេហូវ៉ាបានឲ្យគេកត់ទុកអំពីបុគ្គលទាំងនោះនៅក្នុងគម្ពីរ។ ព្រះយេហូវ៉ាបានបណ្ដាលឲ្យម៉ូសេកត់ទុកអំពីមេដោះម្នាក់ឈ្មោះដេបូរ៉ាដែលរស់នៅសម័យរបស់ពួកបុព្វបុរស។ នាងបានបម្រើយ៉ាងស្មោះត្រង់នៅក្នុងផ្ទះរបស់អ៊ីសាកនិងផ្ទះរបស់យ៉ាកុបអស់ប្រមាណ១២៥ឆ្នាំ! ទោះជាយើងមិនដឹងច្រើនអំពីស្ត្រីដ៏ស្មោះត្រង់នេះក៏ដោយ ព្រះយេហូវ៉ាបានឲ្យម៉ូសេសរសេរចំណុចមួយដែលបង្ហាញថា នាងជាបុគ្គលដែលបានត្រូវគេស្រឡាញ់។ (ដក. ២៤:៥៩; ៣៥:៨, កំ.ស.) ច្រើនឆ្នាំក្រោយមក ព្រះយេហូវ៉ាបានជ្រើសរើសក្មេងឃ្វាលចៀមម្នាក់ឈ្មោះដាវីឌឲ្យធ្វើជាស្ដេចលើប្រជាជាតិអ៊ីស្រាអែល។ (២សាំ. ២២:១, ៣៦) ម្យ៉ាងទៀត មិនយូរក្រោយពីលោកយេស៊ូបានកើត ព្រះបានចាត់ទេវតាឲ្យទៅប្រាប់ពួកគង្វាលមុនគេឲ្យដឹងថាមេស្ស៊ីបានកើតមកនៅក្រុងបេថ្លេហិម។ នោះជាកិត្តិយសណាស់! (លូក. ២:៨-១១) មួយវិញទៀត ពេលយ៉ូសែបនិងម៉ារៀនាំលោកយេស៊ូទៅវិហារ ព្រះយេហូវ៉ាបានឲ្យស៊ីម្មាននិងអាណាដែលជាមនុស្សវ័យចាស់ មានឯកសិទ្ធិឃើញបុត្ររបស់លោក។ (លូក. ២:២៥-៣០, ៣៦-៣៨) ពិតណាស់«ទោះជាព្រះយេហូវ៉ាខ្ពង់ខ្ពស់យ៉ាងណាក៏ដោយ លោកចាប់អារម្មណ៍មនុស្សដែលមានចិត្តរាបទាប»!
១៦. តើលោកយេស៊ូប្រព្រឹត្តចំពោះអ្នកឯទៀតដូចបិតាលោកយ៉ាងដូចម្ដេច?
១៦ លោកយេស៊ូយកតម្រាប់បិតាលោក។ ដូចបិតារបស់លោក លោកយេស៊ូចាប់អារម្មណ៍និងឲ្យតម្លៃមនុស្សដែលមានចិត្តរាបទាប។ លោកបានបង្រៀនសេចក្ដីពិតអំពីរាជាណាចក្ររបស់ព្រះដល់«ជនសាមញ្ញ ហើយមិនបានរៀនសូត្រ»។ (សកម្ម. ៤:១៣; ម៉ាថ. ១១:២៥) លោកយេស៊ូក៏បានធ្វើឲ្យមនុស្សឈឺជាសះស្បើយ ហើយលោកធ្វើដូច្នោះតាមរបៀបដែលធ្វើឲ្យពួកគេមានអារម្មណ៍ថាទទួលសេចក្ដីស្រឡាញ់និងការគោរព។ (លូក. ៥:១៣) នៅយប់ចុងក្រោយមុនលោកយេស៊ូស្លាប់ លោកបានលាងជើងពួកសាវ័កដែលធម្មតាជាកិច្ចការរបស់ខ្ញុំបម្រើ។ (យ៉ូន. ១៣:៥) ម្យ៉ាងទៀត មុនលោកយេស៊ូឡើងទៅស្ថានសួគ៌ លោកបានប្រគល់កិច្ចការដ៏សំខាន់បំផុតដល់ពួកអ្នកកាន់តាមលោកទាំងអស់ រួមទាំងយើងនៅសព្វថ្ងៃនេះដែរ គឺយើងមានឯកសិទ្ធិជួយអ្នកឯទៀតឲ្យទទួលជីវិតដែលគ្មានទីបញ្ចប់។—ម៉ាថ. ២៨:១៩, ២០
១៧. តើតាមរបៀបណាយើងអាចលើកកិត្តិយសអ្នកឯទៀត? (សូមមើលរូបភាពផងដែរ)
១៧ តើតាមរបៀបណាយើងអាចយកតម្រាប់ព្រះយេហូវ៉ា? យើងលើកកិត្តិយសអ្នកឯទៀត ដោយប្រាប់មនុស្សទាំងអស់អំពីដំណឹងល្អមិនថាពួកគេមានពណ៌សម្បុរ ការអប់រំ ឬមានប្រវត្តិបែបណាក្ដី។ ម្យ៉ាងទៀត យើងបង្ហាញសេចក្ដីស្រឡាញ់និងការគោរពចំពោះបងប្អូនរបស់យើង ទោះជាយើងមានឯកសិទ្ធិនៅក្នុងក្រុមជំនុំច្រើនជាងពួកគេ ឬអាចធ្វើអ្វីផ្សេងៗប្រសើរជាងពួកគេក៏ដោយ។ (ភី. ២:៣) ព្រះយេហូវ៉ាពេញចិត្តពេលយើងបង្ហាញចិត្តរាបទាប ហើយប្រព្រឹត្តចំពោះគ្នាទៅវិញទៅមកដោយសេចក្ដីស្រឡាញ់និងការគោរពតាមរបៀបទាំងនេះព្រមទាំងតាមរបៀបផ្សេងទៀត។—រ៉ូម ១២:១០; សេផ. ៣:១២
យើងមានចិត្តរាបទាបដូចព្រះយេហូវ៉ា ដោយផ្សព្វផ្សាយដំណឹងល្អដល់មនុស្សគ្រប់ប្រភេទ (សូមមើលវគ្គ១៧)a
១៨. ហេតុអ្វីអ្នកចង់មានចិត្តរាបទាបដូចព្រះយេហូវ៉ា?
១៨ ពេលយើងព្យាយាមមានចិត្តរាបទាបដូចបិតាស្ថានសួគ៌ដែលប្រកបដោយសេចក្ដីស្រឡាញ់ យើងនឹងទៅជាមនុស្សដែលកាន់តែស្រួលទាក់ទង សមហេតុសមផល និងមានចិត្តអត់ធ្មត់ជាង។ ម្យ៉ាងទៀត យើងក៏នឹងលើកកិត្តិយសអ្នកឯទៀតដូចព្រះយេហូវ៉ាធ្វើដែរ។ សូមចាំថាពេលយើងខំអស់ពីសមត្ថភាពដើម្បីមានចិត្តរាបទាបដូចព្រះរបស់យើង យើងនឹងកាន់តែមានតម្លៃចំពោះលោក!—អេ. ៤៣:៤
ចម្រៀងលេខ១៥៩ ចូរសរសើរតម្កើងព្រះយេហូវ៉ា
a ការពណ៌នាអំពីរូបភាព៖ បងប្អូនស្រីមានសេចក្ដីស្រឡាញ់ដូចព្រះយេហូវ៉ាចំពោះមនុស្សទាំងអស់ ដោយបង្រៀនគម្ពីរដល់ស្ត្រីដែលជាប់គុក។