«ខ្ញុំធ្វើអ្វីដែលខ្ញុំអាចធ្វើបាន»
បងស្រីអៀម៉ារស់នៅប្រទេសអាល្លឺម៉ង់ ហើយគាត់មានអាយុជិត៩០ឆ្នាំ។ ក្រោយគាត់បានជួបគ្រោះថ្នាក់ធ្ងន់ធ្ងរពីរដង ហើយក្រោយពីវះកាត់អស់ជាច្រើនដង គាត់មិនអាចផ្សព្វផ្សាយពីផ្ទះមួយទៅផ្ទះមួយដូចពីមុនទេ។ ឥឡូវបងអៀម៉ាប្រាប់អ្នកឯទៀតអំពីជំនឿរបស់គាត់ដោយសរសេរសំបុត្រទៅកាន់សាច់ញាតិនិងអ្នកដែលគាត់ស្គាល់។ សំបុត្ររបស់គាត់បានលើកទឹកចិត្តនិងសម្រាលទុក្ខអ្នកឯទៀតខ្លាំងដល់ម្ល៉េះ បានជាច្រើនតែមានគេទូរសព្ទសួរគាត់ថា ពេលណាគាត់នឹងផ្ញើសំបុត្រមកពួកគេទៀត។ គាត់ក៏បានទទួលសំបុត្រអរគុណជាច្រើន ហើយពួកគេស្នើសុំឲ្យគាត់បន្តសរសេរផ្ញើមកទៀត។ បងអៀម៉ានិយាយ៖«អ្វីទាំងនេះធ្វើឲ្យខ្ញុំសប្បាយចិត្តណាស់ ហើយជួយខ្ញុំឲ្យជាប់រវល់ក្នុងកិច្ចការផ្សព្វផ្សាយ»។
បងអៀម៉ាក៏បានផ្ញើសំបុត្រទៅបុគ្គលខ្លះដែលស្នាក់នៅមណ្ឌលថែទាំមនុស្សចាស់ដែរ ហើយគាត់រៀបរាប់ថា៖«ស្ត្រីវ័យចាស់ម្នាក់បានទូរសព្ទមកខ្ញុំថា សំបុត្ររបស់ខ្ញុំបានសម្រាលទុក្ខគាត់ណាស់ក្រោយពីប្ដីរបស់គាត់ស្លាប់។ គាត់បានទុកសំបុត្រនោះក្នុងគម្ពីររបស់គាត់ ហើយគាត់ចូលចិត្តយកមកអាននៅពេលល្ងាច។ ស្ត្រីម្នាក់ទៀតដែលប្ដីរបស់គាត់ទើបតែបានស្លាប់ក៏បាននិយាយដែរថា សំបុត្រខ្ញុំបានជួយគាត់ច្រើនជាងអ្វីដែលគ្រូគង្វាលរបស់គាត់បានថ្លែងនៅវិហារទៅទៀត។ គាត់មានសំណួរជាច្រើន ហើយគាត់សុំមកលេងខ្ញុំដើម្បីទទួលចម្លើយចំពោះសំណួរទាំងនោះ»។
ស្ត្រីម្នាក់ដែលមិនមែនជាសាក្សីដែលធ្លាប់ស្គាល់បងអៀម៉ា បានរើទៅកន្លែងឆ្ងាយ ដូច្នេះគាត់សុំបងអៀម៉ាឲ្យសរសេរសំបុត្រទៅគាត់។ បងអៀម៉ាប្រាប់ថា៖«ស្ត្រីនោះបានរក្សាទុកសំបុត្រទាំងអស់របស់ខ្ញុំ។ ក្រោយគាត់ស្លាប់ កូនស្រីរបស់គាត់បានទូរសព្ទមកខ្ញុំ។ កូនស្រីនោះបានអានសំបុត្រទាំងអស់ដែលខ្ញុំបានសរសេរដល់ម្ដាយរបស់គាត់ ហើយសុំឲ្យខ្ញុំបន្តសរសេរសំបុត្រដូចនោះ ដែលមានបទគម្ពីរផ្សេងៗដល់គាត់ដែរ»។
បងអៀម៉ាពិតជាសប្បាយនឹងកិច្ចបម្រើរបស់គាត់ណាស់។ គាត់និយាយថា៖«ខ្ញុំអង្វរសុំព្រះយេហូវ៉ាផ្ដល់កម្លាំងដល់ខ្ញុំ ដើម្បីឲ្យខ្ញុំអាចបន្តបម្រើលោក។ ទោះជាខ្ញុំមិនអាចផ្សព្វផ្សាយពីផ្ទះមួយទៅផ្ទះមួយក៏ដោយ ខ្ញុំធ្វើអ្វីដែលខ្ញុំអាចធ្វើបាន»។