ចូរប្រាប់ពួកគេថាអ្នកស្រឡាញ់ពួកគេ
បងស្រីអង់លីជាសាក្សីព្រះយេហូវ៉ាម្នាក់នៅប្រទេសប៊ុលហ្គារី។ គាត់បង្រៀនគម្ពីរដល់ស្ត្រីម្នាក់ឈ្មោះស្លាតកា ដែលមានប្ដីមិនរៀនគម្ពីរទេ។ បងស្រីអង់លីរៀបរាប់ថា៖«ពេលយើងពិភាក្សាអំពីជីវិតក្រុមគ្រួសារ ខ្ញុំបានបញ្ជាក់អំពីសារៈសំខាន់នៃការប្រាប់ប្ដីនិងកូនៗថាយើងស្រឡាញ់ពួកគេ។ ស្លាតកាបានមើលមុខខ្ញុំទាំងមានទឹកមុខក្រៀមក្រំ ហើយនិយាយថាគាត់មិនដែលប្រាប់ប្ដីនិងកូនស្រីអាយុ៩ឆ្នាំរបស់គាត់ថា គាត់ស្រឡាញ់ពួកគេទេ!»
ស្លាតកាបានពន្យល់ថា៖«ខ្ញុំសុខចិត្តធ្វើអ្វីៗទាំងអស់សម្រាប់ពួកគេ ប៉ុន្តែខ្ញុំមិនអាចនិយាយពាក្យទាំងនោះទេ»។ គាត់បន្ថែមថា៖«ម្ដាយខ្ញុំមិនដែលប្រាប់ថាគាត់ស្រឡាញ់ខ្ញុំទេ ហើយយាយខ្ញុំក៏មិនដែលនិយាយថាគាត់ស្រឡាញ់ម្ដាយខ្ញុំដែរ»។ បងស្រីអង់លីបានបង្ហាញស្លាតកាថា ព្រះយេហូវ៉ាបាននិយាយឮៗថាលោកស្រឡាញ់លោកយេស៊ូ។ (ម៉ាថាយ ៣:១៧) គាត់បានលើកទឹកចិត្តស្លាតកាឲ្យអធិដ្ឋានទៅព្រះយេហូវ៉ាអំពីរឿងនេះ ហើយដាក់គោលដៅដើម្បីប្រាប់ប្ដីនិងកូនរបស់គាត់ថាគាត់ស្រឡាញ់ពួកគេ។
បងស្រីអង់លីនិយាយថា៖«ពីរថ្ងៃក្រោយមក ស្លាតកាប្រាប់ខ្ញុំដោយរំភើបថាគាត់បានអធិដ្ឋានសុំជំនួយពីព្រះយេហូវ៉ា។ ពេលប្ដីគាត់មកផ្ទះវិញ គាត់ប្រាប់ប្ដីថាគម្ពីរបង្រៀនថាគឺសំខាន់ឲ្យប្រពន្ធគោរពនិងស្រឡាញ់ប្ដីរបស់ខ្លួន។ ក្រោយបានផ្អាកបន្តិច គាត់ប្រាប់ប្ដីថា៖‹អូនស្រឡាញ់បងណាស់!› ពេលកូនស្រីរបស់គាត់មកផ្ទះវិញ ស្លាតកាបានឱបកូនហើយប្រាប់នាងថា៖‹ម៉ាក់ស្រឡាញ់កូនណាស់!› ស្លាតកាប្រាប់ខ្ញុំថា៖‹ឥឡូវខ្ញុំពិតជាធូរចិត្តនិងសប្បាយជាង។ តាំងពីដើមខ្ញុំមិនមានទម្លាប់ប្រាប់អំពីអារម្មណ៍ថាខ្ញុំស្រឡាញ់ក្រុមគ្រួសារខ្ញុំទេ តែដោយមានជំនួយពីព្រះយេហូវ៉ា ឥឡូវខ្ញុំអាចនិយាយប្រាប់ពួកគេថាខ្ញុំស្រឡាញ់ពួកគេណាស់›។
បងស្រីអង់លីបន្តស្នើបង្រៀនគម្ពីរនៅតំបន់របស់គាត់
បងស្រីអង់លីបន្តថា៖«មួយសប្តាហ៍ក្រោយមក ខ្ញុំបានជួបប្ដីរបស់ស្លាតកា ហើយគាត់បានប្រាប់ខ្ញុំថា៖‹មនុស្សជាច្រើនប្រាប់ខ្ញុំថាស្លាតកាមិនគួររៀនគម្ពីរជាមួយបងទេ តែខ្ញុំដឹងច្បាស់ថាការរៀនគម្ពីរបានជួយក្រុមគ្រួសារយើង។ យើងមានចំណងអាពាហ៍ពិពាហ៍ដែលកក់ក្ដៅនិងសប្បាយជាង›»។