គ្រូគង្វាលទទួលបានចម្លើយ
នៅថ្ងៃមួយពេលអ៊ីលីសូដែលជាសាក្សីព្រះយេហូវ៉ាកំពុងដឹកនាំការសិក្សាគម្ពីរនៅផ្ទះស្ត្រីម្នាក់ មានភ្ញៀវមកលេងផ្ទះស្ត្រីនោះ។ ភ្ញៀវនោះគឺជាគ្រូគង្វាលនិងប្រពន្ធរបស់គាត់។ អ៊ីលីសូបានឮថាកូនប្រុសតែមួយរបស់ពួកគាត់ទើបតែស្លាប់។
ពេលអ៊ីលីសូបានចូលរួមរំលែកទុក្ខពួកគាត់ នោះគ្រូគង្វាលនិងប្រពន្ធចាប់ផ្ដើមយំយ៉ាងខ្លាំង។ ក្រោយមក គ្រូគង្វាលនិយាយដោយកំហឹងថា៖«ខ្ញុំអត់យល់ហេតុអ្វីព្រះអនុញ្ញាតឲ្យខ្ញុំរងទុក្ខបែបនេះ! ហេតុអ្វីលោកយកកូនប្រុសតែមួយរបស់ខ្ញុំទៅ? ខ្ញុំបានបម្រើព្រះអស់រយៈពេល២៨ឆ្នាំហើយ ខ្ញុំបានធ្វើអំពើល្អជាច្រើន តែលោកបែរជាតបស្នងខ្ញុំបែបនេះវិញ! ហេតុអ្វីបានជាព្រះសម្លាប់កូនប្រុសរបស់ខ្ញុំ?»។
អ៊ីលីសូពន្យល់ពួកគាត់ថាព្រះមិនបានសម្លាប់កូនរបស់ពួកគាត់ទេ ហើយគាត់ក៏បានពន្យល់អំពីប្រធានបទផ្សេងៗដូចជាថ្លៃលោះ ការប្រោសមនុស្សស្លាប់ឲ្យរស់ឡើងវិញ និងមូលហេតុដែលព្រះអនុញ្ញាតឲ្យមានរឿងអាក្រក់កើតឡើងដែរ។ គ្រូគង្វាលនិងប្រពន្ធរបស់គាត់បានប្រាប់អ៊ីលីសូថា ពួកគាត់បានអធិដ្ឋានអំពីរឿងនេះ ហើយនាងបានផ្ដល់ចម្លើយចំពោះសំណួរដែលពួកគាត់ឆ្ងល់។
នៅសប្ដាហ៍បន្ទាប់ គ្រូគង្វាលនិងប្រពន្ធរបស់គាត់បានមកចូលរួមសិក្សាគម្ពីរជាមួយស្ត្រីនោះដែរ។ អ៊ីលីសូកំពុងបង្រៀនស្ត្រីនោះនូវមេរៀនដែលមានចំណងជើងថា«សេចក្ដីសង្ឃឹមពិតសំរាប់មនុស្សជាទីស្រឡាញ់ដែលបានស្លាប់» ក្នុងសៀវភៅតើព្រះគម្ពីរពិតជាបង្រៀនយ៉ាងណា? ពេលពួកគាត់ពិគ្រោះគ្នាអំពីរឿងនេះ ប្ដីប្រពន្ធមួយគូនោះរំភើបចិត្តយ៉ាងខ្លាំង។
ក្រោយមក ប្ដីប្រពន្ធមួយគូនេះបានចូលរួមមហាសន្និបាតពិសេសរបស់សាក្សីព្រះយេហូវ៉ានៅក្រុងទីប៊ីលីស៊ី ប្រទេសហ្សកហ្ស៊ី។ មហាសន្និបាតនោះមានឥទ្ធិពលខ្លាំងណាស់មកលើពួកគាត់ ដោយសារពួកគាត់បានឃើញសេចក្ដីស្រឡាញ់និងសាមគ្គីភាពដ៏អស្ចារ្យនៅទីនោះ។ គុណសម្បត្តិបែបនេះជាគុណសម្បត្តិដែលពួកគាត់ព្យាយាមជួយសមាជិកក្នុងវិហាររបស់ពួកគាត់ឲ្យមាន ប៉ុន្តែមិនបានផលទេ។