Utertitsis­sutitut akiliut qujamasuutigalugu qanoq ersersik­kusuppiuk?

1-2. Jiisusip utertitsis­sutitut pilliutaa qanoq iliornis­satsinnut kajumis­sissutigaarput, aamma sooq? (Korintimiunut 2. 5:14, 15) (Aamma asseq takuuk).

ILLUP qarmakuisa ataanniit annaanneqarsimaguit annaassisoq qanoq misigis­suseqarfigissaviuk? Qularnan­ngitsumik qujamasussaatit. Arlaliullusi annaanneqarsimagaluarus­siluunniit illit qujamasunnerit annaassisumut oqaatigerusus­sagunarpat, aamma iliuusia puiunngisaan­nassagunarpat.

² Allaaserisap siuliani nassuiar­neqartutut ajortimit toqumillu annaanneqas­sagutta ikiorneqar­tariaqarpugut. Jiisusilli utertitsis­sutitut pilliutaa pissutigalugu annaanneqarlutalu (1) ajortuliatsinnik isumakkeerfigineqarsin­naavugut, (2) siunissami naammal­luinnar­tunngorsin­naavugut aamma (3) Jehovamut qanimut attaveqarluarsin­naalluta. Taamaat­tumillu paratiisissami naassaan­ngitsumik inuunissamik neriuuteqarpugut. Jiisusip uagut pilluta imminut pilliutigigami inunnut asanningaarnini ersersippaa. Aamma nunarsuarmi inunngun­ngikkal­laramili inuit asajuarsimavai. (Uss 8:30, 31) Apustili Paulusi allappoq ‘Kristusip asanninnera kajumis­sissutigigipput’. (Korintimiunut 2. 5:14, 15 atuakkit). Tamanna isumaqarpoq Jiisusip asanninnera kajumis­sissutigalugu iliuuseqas­sasugut, tassa ersersis­sagipput utertitsis­sutitut pilliutaa qujamasuutigalugulu puiunngisaan­nassagipput.

3. Sooq inuit utertitsissummik qujamasuutigin­ninnertik assigiin­ngitsutigut ersersit­tarpaat?

³ Illit utertitsissummik qujamasuutigin­ninnerit qanoq ersersik­kusuppiuk? Immaqa illit ersersitseriaatsit allap ersersitseriaasianit allaanerussaaq. Sooq? Takorlooruk inuit pingasut assigiimmik ornitas­saqarlutik angalalertut, tamarmilli assigiin­ngitsunik aallartif­feqarput. Taamaattumik aqqutigisassaat assigiin­ngillat. Uagut apuuffissarput, tassa anguniagarput, suua? Utertitsissummik qujamasuutigin­ninnermik ersersitsinissarput. Tamattali inuttut atukkagut apeqqutaatillugit ersersitseriaatsigut assigiinneq ajorput. Tassami Biibilimik misissueqatigineqartartut, Nalunaajaasutut imermut morsutsin­neqarsimasut aamma ilagiinnit ungasil­lisimasut assigiin­ngitsutigut qujamasunnertik ersersis­sinnaavaat. Eqimattat taakkua arlaannut ilaaguit utertitsissummik qujamasuutigin­ninnerit qanoq ersersis­sinnaanerit allaaserisami matumani sammineqassaaq.

BIIBILIMIK MISISSUEQATIGINEQARTARTUT

4. Biibilimik misissueqatigineqartartut Jehovap qanoq misigis­suseqarfigai?

⁴ Biibilimik misissueqatigineqartaruit una eqqarsaatigiuk: Jehova Biibilimilu ilinniar­titsissutigineqartut pillugit ilinniarusukkavit erserpoq Jehovap illit imminut qanillisikkaatit ikinngutigerusul­lutillu. (Joh 6:44; ApS 13:48) Jehovap uummammiugisatit takusinnaavai. Tassa taanna pillugu ilinniarusullutit ilungersornitit maluginiartarpai, aamma maleruaqqusai maleruarumallugit allannguillutit siumukarnerit nuannaarutigivaa. (Uss 17:3; 27:11) Utertitsissut pissutigalugu Jehova qanimut ikinngutigisinnaavat. (Rom 5:10, 11) Tamanna taamaat­tussaannartut isiginiaqinagu.

5. Biibilimik misissueqatigineqartartut Filippimiut 3:16 qanoq maleruarsin­naavaat?

⁵ Biibilimik misissueqatigineqartaruit utertitsissut qujamasuutigalugu qanoq ersersis­sinnaaviuk? Ilaatigut Paulusip Filippimiunut allatai uku maleruarsin­naavatit: “[Qanoq] siumukar­tigisimanerput apeqqutaatinnagu toraakkatsinnut tassunga torersumik ingerlajuarta.” (Flp 3:16) Maanna eqqortup tungaanut ingerlalereerputit, taamatullu ingerlaan­nassaatit. Sunaluunniit siumukar­nissannut unissutigeqinagu. – Mat 7:14; Luk 9:62.

6. Biibilimik misissueqatigineqartartut paasiuminaatsitaqarunik unitsik­kuminaatsitamin­nilluunniit ileqqoqarunik susinnaappat? (Mosesimik 5. 30:11-14) (Aamma asseq takuuk).

⁶ Imaassinnaavoq Biibilimit ilikkakkavit ilaat paasiuminaatsikkit. Taamaappat susinnaavit? Sammisaq taanna misissor­nerusinnaavat, aamma paasiumallugu Jehovamut ikioqqusin­naavutit. (Tuss 86:11) Taamaalioreerlutit suli paasiuminaatsikkukku eqqarsaatigiun­naarallarlugu Biibilimik misissuinerit ingerlatiinnaruk. Aamma imaassinnaavoq Jehovap iluarin­ngisaanik ileqqoqartutit unitsik­kuminaatsitannik. Taamaappat susinnaavit? Eqqaamajuk Jehovap sapikkatsinnik ilioqqun­ngisaan­naraatigut. Iluarisaatut iliornissat sapinngilat! (Mosesimik 5. 30:11-14 atuakkit). Jehovalu neriorsuivoq ikiussallutit. (Es 41:10, 13; Kor 1. 10:13) Taamaattumik tunniutiin­naqinak. Ajornar­torsiutit eqqarsaatigival­laarnagu Jehovap ilinnut ajunngitsuliarpassui, ilaatigut utertitsis­sutitut akiliut, eqqarsaatigikkit. Jehova asanerujar­tortillugu ‘inassutaasa artornar­tuunnginnerat’ misigissavat. – Joh 1. 5:3.a

7. Meeqqat inuusut­tuaqqallu Nalunaajaasunik angajoq­qaallit suna eqqarsaatigisin­naavaat?

⁷ Taavami ilissi meeraasusi inuusut­tuaraasusilu Nalunaajaasunik angajoq­qaallit? Aamma ilissi Biibilimik misissueqatigineqar­tartuuvusi. Allaat angajoqqaassi Biibilimik misissueqatigisar­tagaanni pingaar­nerpaajuvusi. Biibilimi ima allassimavoq: “Guuti qanillisiuk, taava ilissinnut qanillissaaq.” (Jaak 4:8; Nal 1. 28:9) Illit Jehova ikinngutigiumallugu iliuuseqaruit aamma taanna illit ikinngutigiumallutit iliuuseqassaaq. Jehovap soqutigaatit, imaanngitsoq Nalunaajaasuni peroriar­toravit kisiannili illit ikinngutigerusuk­kamitit. Ikinngutigiin­niassagassilu Jehova qanoq iliorsimava? Ernini tunniuppaa. Asannit­tuliungaarnera tamanna qujamasuutigiuaruk. (Rom 5:1, 2) Ukioq manna eqqaaniaaneq sioqqullugu Jehovap Jiisusillu illit pillutit iliuusaat eqqarsaatigeq­qissaaruk. Taava qujamasun­nerulissaatit, tamannalu ersersis­sinnaavat anersaakkut anguniagaqarnikkut anguniak­kavillu sulissutigineratigut.b

IMERMUT MORSUTSIN­NEQARSIMASUT

8. Imermut morsutsin­neqarsimasut utertitsissummik qujamasuutigin­ninnertik qanoq ersersis­simavaat?

⁸ Nalunaajaasutut imermut morsutsin­neqarsimaguit utertitsissummik qujamasuutigin­ninnerit arlalitsigut ersersereerpat. Assersuutigalugu Jehova qanilliniarlugu taassumalu iluarisaanik inooriaaseqarumallutit iliuuseqarputit. Jiisusip peqqussutaa naalallugu upperisat pillugu oqaluus­sisalerputit. Aamma Jehovamut tunniul­luinnarputit imermullu morsutsin­neqarlutit. Jehovamut kiffartornerit pissutigalugu akerlilersor­neqarnikuuit? (Tim 2. 3:12) Imaannaan­ngitsorsior­taraluarlutit aalajaat­tuarninnit erserpoq Jehova asagit erneratalu utertitsis­sutitut pilliutaa qujamasuutigigit. – Hebr 12:2, 3.

9. Imermut morsutsin­neqarsimasut suna mianersuutigissavaat?

⁹ Imermut morsutsin­neqarsimagutta mianersuutis­saqarpugut. Piffissap ingerlanerani utertitsissummik qujamasuutigin­ninnerput annikil­lisinnaavoq. Qanoq taamaat­toqarsinnaava? Kristumiut siulliit Efesossimiittut pinertusaarnerat pillugu Jiisusip nersualaarpai, aammali ima oqarpoq: ‘Aallaqqaammut asannis­simanittut asannik­kunnaarsimagavit oqaaqqis­saarpakkit.’ (Saqq 2:3, 4) Jiisusip oqaasiinit erserpoq piffissap ingerlanerani asanninneq kajumis­sissutiginagu ileqqoriin­narluguli Jehovamut kiffartor­toqalersinnaasoq. Inuk taamaaliortoq sungiusimasamisut qinusarsinnaavoq, ataatsimiigiar­tarsinnaavoq oqaluus­seqataasarsin­naallunilu. Taamaalior­nissaminulli asanninneq kajumis­sissutigiun­naarpaa. Jehovamut asannin­nikillisimaguit qanoq iliorsinnaavit?

10. Paulusip Timuutiusimut siunnersuutaa qanoq maleruarsin­naaviuk? (Timuutiusimut 1. 4:13, 15)

¹⁰ Paulusip Timuutiusi allaffigaa eqqarsaatigin­neqqissaar­tassasoq Jehovamullu kiffartornini aalluttuassagaa. (Timuutiusimut 1. 4:13, 15 atuakkit). Siunnersuut tamanna maleruarlugu illit qanoq kiffartorninnik aallussiuarsinnaavit? (Rom 12:11) Ataatsimiinnernut piareersarnerit piffissaqarfiginerugukku taakku pissarsiaqarfiginerus­savatit. Aamma eqqissisimasumi nammineq Biibilimik misissuisaruit paasisatit eqqarsaatigeq­qissaar­nerusin­naassavatit. Taamaalil­lutillu misissuisarnerit pissarsiaqarfigil­luarnerusinnaavat. Ikumatitaq assersuutigisin­naavarput. Ikumatiin­nassagutsigu tassunga qisunnik ilioraajuar­tariaqarpugut. Tamatumunnga assingusumik Jehovamut kiffartornerput aalluttuarlugulu utertitsissut Jehovallu ajunngitsuliarpassui allat qujamasuutigiuas­sagutsigit iliuuseqar­tuartariaqarpugut. Maannamiit eqqaaniaanerup tungaanut eqqarsaatigeq­qissaarsinnaavat Jehovamut kiffartornerit pillugu qanoq pilluaq­quneqar­tartutit. Qularnan­ngitsumik taamaalioruit utertitsissut qujamasuutiginerulissavat. Taannami pissutigalugu Jehovamut ikinngutaasin­naavutit.

11-12. Piffissap ilaani Jehovamut kiffartor­nitsinni kajumis­suseqarun­naarsimagutta qanoq eqqarsas­sanngilagut? (Aamma asseq takuuk).

¹¹ Piffissap ilaani Jehovamut kiffartorninni kajumis­suseqarun­naartutut misigiguit tunniutiin­nassanngilatit. Eqqarsas­sanngilatillu Jehovap anersaaminik tunisarun­naarsimagaatit. Paulusip kiffartornini pillugu Korintimiunut allataa eqqarsaatigiuk. Ima allappoq: ‘Kajuminnanga taamaalioraluaruma suli nakkutil­liisuutitatut akisussaaf­feqarpunga.’ (Kor 1. 9:17) Taamatut allakkami suna pivaa?

¹² Paulusi ilaannikkut oqaluus­sinissaminut kajumis­suseqarneq ajorpoq. Kisianni misigis­sutsiminit aqunneqarusun­nginnami oqaluus­siuarnissani aalajangiusimavaa. Illit aamma taassumatut aalajangiusiman­nitsigisin­naavutit. Allaat kajumis­suseqan­ngikkaluarlutit eqqortuliornissat aalajangiusimajuk. Jehovap ‘iluarisamisut ilioqqullutit piumassuseqalersis­sinnaammatit pissatsis­sinnaam­matillu’ ikioqqullutit qinnuigisaruk. (Flp 2:13) Anersaakkut ittunik sammisaqar­tarnerit ingerlatiinnaruk. Taava qularis­sanngilat piffissap ingerlanerani kiffartorninni nuannaaleq­qissinnaasutit asannin­nerillu kajumis­sissutigileq­qissinnaagit.

13. ‘Uppernermiin­nerluta paasiumallugu’ qanoq imminut misilis­sinnaavugut?

¹³ Pitsaassaaq isiginnit­taaserput misissor­tarutsigu. Paulusi ima allappoq: “Uppernermiin­nersusi paasiumallugu imminut misilit­tuaritsi. Inuttut qanoq ittuunerlusi misissor­tuarsiuk.” (Kor 2. 13:5) Assersuutigalugu apeqqutit uku eqqarsaatigisin­naavagut: ‘Inooriaatsinnit erserpa Jehovamut kiffartornera pingaar­nerpaatikkiga?’ (Mat 6:33) ‘Aliikkutarisar­takkannit erserpa ajortoq uumigigiga?’ (Tuss 97:10) ‘Ilagiinni ataasioqatigiin­nerulersitsisunik eqqisseqatigiis­sitsisunillu oqaaseqar­tarpunga iliuuseqar­tarlungalu?’ (Ef 4:2, 3) Eqqaaniaanerup siorna kingornalu tamakku eqqarsaatigis­sallugit pitsaassaaq. Jehovap Jiisusillu uagut pilluta iliuusii eqqarsaatigisarutsigit qujamasunnerput ersersik­kusulis­savarput. Aamma imminut pinnata Jiisusi pillugu inoorusussaagut, soorlu Paulusi taama allattoq.c

ILAGIINNIT UNGASIL­LISIMASUT

14. Sooq qatanngutitta ilaat ataatsimiigiar­tarunnaarsimappat?

¹⁴ Qatanngutitta ilaat, immaqa ukiorpassuarni aalajaallutik kiffartorsimagaluarlutik, ataatsimiigiar­tarunnaarsimapput. Sooq? Ilaat ‘inuunermi isumakuluutit’ pissutigalugit nanertisimapput. (Luk 21:34) Allat uppeqatimik ilaata oqaasii iliuusiiluunniit ajuallaatigisimavaat. (Jaak 3:2) Allallu ingasattumik ajortuliorsimapput ikioqqunissarlu kanngusuutigalugu. Qanorluunniit pissuteqaraluarlutit ilagiinnit ungasil­lisimaguit susinnaavit? Jehovap Jiisusillu asannit­tuliornerat, tassa utertitsissummik akiliutaat, illit sunissamut kajumis­sissutigaajuk?

15. Jehovap savanut tammarsimasunut asanninnini qanoq ersersippaa? (Ezekieli 34:11, 12, 16)

¹⁵ Jehova savatut tammarsimasutut ittut pillugit qanoq misiginersoq eqqarsaatigiuk. Puiorsimanngilai, soqutigalugillu ujartarpai. Imminut uternissamut ikiortarpai nerisit­tarlugillu. (Ezekieli 34:11, 12, 16 atuakkit). Jehova aamma illit pillutit taamaaliorpa? Aap! Allaaserisamik matuminnga atuarnivit ersersippaa eqqortuliorusuttutit. Soorlu taamani Jehova pillugu ilinnialeq­qaaravit taassuma ajunngitsortatit takullugit qanillisikkaatit, ajunngitsortatit suli takusinnaavai. Imaassinnaava maanna imminut qanilliseq­qikkaatit ilagiinnullu uternissamut ikiorlutit?

16. Ilagiinnit ungasil­lisimasup Jehovamut uternis­saminut suut iluaqutigisinnaavai? (Aamma asseq takuuk).

¹⁶ Quppersakkami Jehovamut uterit-mi qiimmaal­lannartumik ima allassimavoq: “Qularis­sanngilat uterniarninni Jehovap tapersersorumaaraatit. Isumakuluk­kunnaar­nissannut, aliatsaq­qajunnaar­nissannut, ilerasuuteqarun­naarnerup pianik isumakkut uummatikkullu eqqissinissannut ikiorumaarpaatit. Taava uppeqatitit peqatigalugit Jehovamut kiffartoq­qilernissannut piumassuseqalissaatit.” Aamma eqqaamajuk utoqqaanertat ikiorusungaaraatsit. Taakku ‘anorersuarmut oqquiffittut sialussuarmullu oqqiffittut’ issinnaapput. (Es 32:2) Nalunngilarput utertitsissut qujamasuutigigit qujamasun­nerillu Jehovamut ersersik­kusukkit. Taamaattumik eqqarsaatigiuk Jehovamut uterniarlutit maanna susinnaanerlutit. (Es 1:18; Pet 1. 2:25) Assersuutigalugu naalagaaf­filersaarfim­mukarlutit ataatsimiigiarsinnaavit? Utoqqaanertat ilaat paasitis­sinnaaviuk Jehovamut uterniarlutit ikiorneqarusuttutit? Imaassinnaavoq piffissap ilaani Biibilimik misissueqatigineqarnissat aaqqissussagaa. Qularis­sanngilat Jiisusip utertitsis­sutitut pilliutaanik qujamasuutigin­ninnerit ersersin­niarlugu iliuutsitit Jehovap pilluaq­qussagai.

QANOQ ILIORUSUPPIT?

17-18. Eqqaaniaaneq sioqqullugu piffissarput qanoq atorluarsin­naavarput?

¹⁷ Jiisusi oqarpoq utertitsissut pissutigalugu ‘kinaluunniit taassumunnga uppertoq suujunnaarsin­neqarnani naassaan­ngitsumik inuusinnaasoq’. (Joh 3:16) Tassa utertitsissut pissutigalugu Jehovap ajortimit toqumillu annaassin­naavaatigut. Tamanna qujamasuutigiuartigu! (Rom 3:23, 24; Kor 2. 6:1) Maannamiit eqqaaniaanerup tungaanut Jehovap Jiisusillu asannit­tuliungaarnerat aamma qujamasunnerput qanoq ersersis­sinnaaneripput eqqarsaatigeq­qissaarsin­naavarput.

¹⁸ Illit qujamasunnerit qanoq ersersik­kusuppiuk? Ersersitseriaatsit inuup allap ersersitseriaasianit immaqa allaaneruvoq. Qularis­sanngilalli Jehovap najorumaaraatit, neriorsuivormi ‘imminnik pillutik inuujun­naarlutik imminnilli toqqutiginnittoq [tassa Jiisusi] pillugu inuusut’ tamaasa pilluaq­qussallugit. – Kor 2. 5:15.