Sooq utertitsis­sutitut akiliut pisariaqar­tipparput?

1-2. Sooq annaanneqar­tariaqarpugut? (Romamiut 7:22-24) (Aamma asseq takuuk).

UNA takorlooruk. Angut illuminiitilluni illuni aserormat illup qarmakuisa ataanniilerpoq. Suli uumavoq nammineerlunili qarmakut piiarsin­naanngilai. Ikiortis­sarsiorluni suaartaan­narsinnaavoq neriulluni annaanneqas­salluni.

² Uagut taassumatulli annaanneqar­tariaqarpugut. Qanoq tassa? Adami Pinngor­titsisuminut pikitsitsigami ajortilin­ngorpoq. Uagullu ajortiliuneq taassumannga kingornupparput. Taamaattumik inuit tamarmik ajortiliupput, angullu illup qarmakuisa ataanniittoq assigalugu nammineerluta aniguisin­naanngilagut. Apustilip Paulusip ajortiliunerput Romamiunut allakkamini nassuiarpaa. (Romamiut 7:22-24 atuakkit). Ima aperivoq: “Kia … aniguisis­sinnaavaanga?” Paulusi ajortimit tiguagaasimasutut misigivoq, ajortimi toqumik kinguneqartarmat. (Rom 6:23) Uagut taassumatut ippugut, tassa annaanneqar­tariaqarpugut!

3. Utertitsissut pissutigalugu Jehova qanoq iliorsinnaava?

³ Paulusip pissutsit atukkagut ajortut eqqaareerlugit neriuutis­sippaatigut. Ima aperereerluni: “Kia … timinnit toqusus­saasumit aniguisis­sinnaavaanga?” ima allappoq: “Guuti, Jiisusi Kristusi Naalagarput aqqutigalugu annaassisoq, qujanarsili!” (Rom 7:25) Jiisusip utertitsis­sutitut pilliutaaa annassutaasoq pivaa. Utertitsissut pissutigalugu (1) ajortuliatsinnik isumakkeerfigineqarsin­naavugut, (2) siunissami naammal­luinnar­tunngorsin­naavugut, aamma (3) Jehovamut qanimut attaveqarluarsin­naavugut. Taakkua pingasut sammineranni Jehova, ‘Guutiusoq neriuuteqalersitsisoq’, asanerulis­savarput. (Rom 15:13) Aamma Jiisusimut qujamasun­nerulissaagut, taassumami ‘akiliulluta utertim­matigut aniguisin­neqarpugut’. – Kol 1:14.

ISUMAKKEERFIGINEQARSIN­NAAVUGUT

4-5. Sooq tamatta utertitsissut pisariaqar­tipparput? (Oqaluus­sisartup oqaasii 7:20)

⁴ Ajortuliatsinnik isumakkeerfigineqas­sagutta utertitsissut pisariaqar­tipparput. Inuit naammal­luinnan­ngitsut tamarmik oqalunnikkut iliuutsikkullu ajortuliortarput. (Oqaluus­sisartup oqaasii 7:20 atuaruk). Ajortuliat ilaat soorunami ingasan­nerupput. Assersuutigalugu allasiortoq inummillu toqutsisoq Moorsisip inatsisai naapertorlugit toqumik pillagaasussaavoq. (Mos 3. 20:10; Mos 4. 35:30, 31) Ajortuliat amerlasuut taakkunatulli ingasatsigin­ngikkaluarlutik suli ajortulior­nerupput. Assersuutigalugu Daavi tussiaasiorluni ima allappoq: “Qanoq inuuseqarnera sianigissavara oqqannik ajortuleq­qunanga.” (Tuss 39:2) Aap, allaat oqalunnikkut ajortuliorsin­naavugut. – Jaak 3:2.

⁵ Iliuuserisimasatit oqaatigisimasatillu eqqarsaatigikkit. Peqqissimis­sutigisannik oqaaseqar­nikuuit ilerasuutigisan­nilluunniit iliuuseqar­nikuullutit? Ilimanarluinnarpoq taamaas­simasutit. Biibilimimi ima allassimavoq: “Oqarutta ajortiliunata immitsinnut salloqit­tassallutalu ilumoortoq uatsinniis­sanngilaq.” – Joh 1. 1:8.

6-7. Suna pissutigalugu Jehovap ajortuliatsinnik isumakkeerfigisin­naavaatigut? (Aamma asseq takuuk).

⁶ Utertitsis­sutitut akiliut pissutigalugu Jehovap ajortuliatsinnik isumakkeerfigisin­naavaatigut. (Ef 1:7) Tamannali isumaqanngilaq Jehovap ajortuliornerput isiginngitsuusaaraa. Jehovammi ajortuliorneq uumigaa. (Es 59:2) Naapertuil­luartuugami isumakkeerfigis­sagunisigut tunngavis­saqartariaqarpoq.

⁷ Moorsisip inatsisaani piumasarineqarpoq ajortuliorsimasoq uumasumik saammaan­neqaatissatut pilliuteqassasoq. (Mos 3. 4:27-31; 17:11) Taamatut pilliuteqar­tuartariaqarmata erserpoq aaqqiis­sutissamik pitsaanerusumik pisariaqar­titsisut. Aaqqiissut tamanna tassaavoq Jiisusip pilliutaa, tamannalu inunnut nuanningaartunik nassataqassaaq. Tassa taassuma pilliutaa tunngavigalugu Jehovap ajortuliatsinnik isumakkeerfigisin­naavaatigut. Paulusip Korintimiunut allakkamini ersersippaa Jiisusip pilliutaata qanoq naleqar­tiginera paasilluarlugu. Allaffigisami ajortuliorsimaneri allaatigereerlugit ima allappoq: “[Guutip] minguiarlusi uffarpaasi, illernar­tippaasi Naalakkattalu Jiisusip Kristusip aqqani anersaaminillu naapertuil­luartuutillusi.” – Kor 1. 6:9-11.

8. Eqqaaniaanissamut isumakkut piareersarninni suna eqqarsaatigisin­naaviuk?

⁸ Eqqaaniaanissamut isumakkut piareersarninni eqqarsaatigiuk Jehovap isumakkeerfigin­ninnera ilinnut qanoq sunniuteqarnersoq. Assersuutigalugu utertitsissut pissutigalugu ajortuliatit peqqissimillutit nassuerutigisimasatit ilerasuutigiuar­tariaqan­ngilatit. Ilumut isumakkeerfigineqarsimanerlutit upperiuminaatsit­tarpiuk? Immaqa ima eqqarsarsimavutit: ‘Nalunngilara Jehova isumakkeerfigin­nissinnaasoq, uangali imminut isumakkeerfigisin­naanngilanga.’ Taama misigiguit una eqqaamajuk: Isumakkeerfigin­nittussaasoq tassaavoq Jehova. Eqqartuus­sinissarlu ernerminut suliassiis­sutigaa. Tassa kikkut nallittor­neqarnis­saannik aalajangiinissaq ilinnut inummul­luunniit allamut suliassiis­sutiginngilaa. Biibilimi ima allassimavoq: Jehovap ‘qaamanermiin­neratulli qaamanermi inuugutta ernerata Jiisusip aavata ajortuliagut tamaasa piissavai’. (Joh 1. 1:6, 7) Biibilimi ilinniar­titsissutigineqartut allat upperil­luinnaratsigit aamma isumakkeerfigineqarnerput upperil­luinnarsin­naavarput. Utertitsis­sutitut akiliut pissutigalugu Jehova uagutsinnik isumakkeerfigin­ninnissaminut tunngavis­saqarluarpoq, Biibilimilu allassimavoq taanna ‘isumakkeerfigin­nikkumasartoq’. – Tuss 86:5.

NAAMMAL­LUINNAR­TUNNGORSIN­NAAVUGUT

9. Biibilimi oqaaseq “ajorti” atorneqaraangat suna pineqartarpa? (Tussiaat 51:7)

⁹ Biibilimi oqaaseq “ajorti” atorneqaraangat iliuuseq pineqaan­narnani aamma naarmiuunitsinnit naammal­luinnan­ngitsuunerput pineqartarpoq. (Tussiaat 51:7 atuaruk). Naammal­luinnan­ngitsuugatta ajortulioq­qajaasarpugut timikkullu sanngiis­suteqarluta, taamaat­tumillu napparsimasarlutalu utoqqalisarlutalu toqusarpugut. Inuit tamarmik naammal­luinnan­ngitsuummata allaat naalungiarsuit ajortuliorsiman­ngikkaluarlutik napparsimalerlutillu toqusin­naapput. Aamma inuit ajunngitsut naammal­luinnan­ngitsuunertik pissutigalugu naalliul­lutillu toqusarput. Tassa Adamip ajortuliornera pissutigalugu tamatta tamakkuninnga nalaataqar­tarpugut.

10. Adami Evalu ajortulioreeramik qanoq misigippat?

¹⁰ Adami Evalu ajortulioreerlutik naammal­luinnan­ngitsun­ngoramik qanoq misiginersut eqqarsaatigiuk. Nuanniil­liuuteqalerput. Adami Evalu pikitsitsereeramik Guutip inatsisaanik ‘uummatiminni allassimasunik’ unioqqutitsinerup kingunipilui ingerlaannaq misigivaat. (Rom 2:15) Allanngorsimallutik malugivaat. Atisaqan­nginnertik kanngusuutigilerpaat, misigippullu Pinngor­titsisiminnut toqqortariaqarlutik. (Mos 1. 3:7, 8) Aatsaavissuaq Adami Evalu kanngusupput, ernumapput pisuusutullu misigalutik. Toqunis­samillu tungaannut taamatut misigis­suseqar­tarumaarput. – Mos 1. 3:16-19.

11. Naammal­luinnan­ngitsuunitsinnit qanoq sunnerneqar­tarpugut?

¹¹ Aamma uagut naammal­luinnan­ngitsuugatta kanngusut­tarpugut, ernumasarpugut pisuusutullu misigisarluta. Kiisalu timikkut misigis­sutsikkullu anniaateqar­tarpugut. Ilungersoraluarluta nammineerluta aaqqissin­naanngisatsinnik ajornar­torsiuteqar­tuassaagut. Sooq taamaappa? Biibilimi nassuiar­neqarpoq Adamikkut ajortuliornerisa kingorna inuit ajornar­torsiuteqar­tuartassasut. (Rom 8:20) Inuttut ataasiakkaatut ajornar­torsiuteqar­tarpugut aammali inuiaqatigiit ajornar­torsiuteqar­tarlutik. Assersuutigalugu eqqarsaatigiuk inuit pinngor­titarsuaq paariniarlugu, pinerlut­tuliornerit annikil­lisarniarlugit, piitsuus­suseerutsitsiniaallutik inuiaqatigiillu akornanni eqqisseqatigiis­sitsiniarlutik qanoq iliuuseqar­tigisimasut. Imaassinnaavoq annikitsutigut siumukar­toqartoq, kisianni ajornar­torsiutit taakku aaqqivin­neqarsiman­ngillat. Utertitsissulli pissutigalugu neriuuteqarpugut. Sumik?

12. Utertitsis­sutitut akiliut sumik neriuuteqalersitsiva?

¹² Utertitsissut pissutigalugu ‘mikiarnermut inussiaajun­naarsin­neqarnis­satsinnik’ neriuuteqarpugut. (Rom 8:21) Utertitsissut paratiisissami tamakkiisumik iluaqutigis­savarput. Naammal­luinnar­tunngus­sagatta timikkut, eqqarsar­taatsikkut misigis­sutsikkullu napparsimasarun­naassaagut. Aamma kanngusut­tarunnaarlutalu ernumasarun­naarlutalu pisuusutut misigisarun­naassaagut. Taamanik­kussamut “Eqqissinermut Naalagaaneq” Jiisusi, utertitsissummik akiliussisoq, naalakkersuilissaaq. Taassumalu ajornar­torsiutinik nammineq aaqqissin­naanngisatsinnik aaqqiiniar­nitsinni ikiussavaatigut. – Es 9:5, 6.

13. Eqqaaniaanissamut isumakkut piareersarninni aamma suna eqqarsaatigisin­naaviuk?

¹³ Naammal­luinnar­tunngoruit inuunerit qanoq issanersoq takorlooruk. Ullut tamaasa peqqilluin­narlutit itertassaatit. Aamma perlilernissat, napparsimalernissat toqunis­salluunniit – imaluunniit asasavit taamatut misigisaqar­nissaat – ernumagisariaqas­sanngilat. Aamma maanna eqqissineq misigisinnaavat neriuut aalajangiusimagukku, neriuummi taanna “tarnimut kitsatut, isumannaatsutut nikinneq ajortutut,” immat. (Hebr 6:18, 19) Soorlu kisaq umiarsuarmik patajaal­lisitsisartoq neriuut Biibilimeersoq uppernikkut nakussatsis­sutigalugulu qanorluunniit misilin­neqarninni pinertusaar­nissamut iluaqutigissavat. Jehovap ‘qamannga pisumik ujarlersiminik akissarsisitsisarnera’ upperil­luinnarsinnaavat. (Hebr 11:6) Utertitsissut pissutigalugu maanna tuppallersar­neqarlutillu siunissamut neriuuteqarputit.

JEHOVAMUT QANIMUT ATTAVEQARLUARSIN­NAAVUGUT

14. Ajortiliunerput Jehovamut attaveqar­nitsinnut qanoq sunniutipiloqarsimava, aamma sooq?

¹⁴ Adami Evalu ajortuliormatali inuit Jehovamut qanimut attaveqarsin­naajunnaarput. Allaat Biibilimi allassimavoq tamatta Guutimut takornar­taallutalu akeraasugut. (Rom 8:7, 8; Kol 1:21) Sooq taamaappa? Jehova naammal­luinnar­tuugami ajortiliunerput isiginngitsuusaagin­narsinnaanngilaa. Jehova pillugu Biibilimi ima allassimavoq: ‘Illit iseqarputit ajussutsimik isigisaqas­sallutit minguip­pallaartunik.’ (Hab 1:13) Tassa inuit naammal­luinnan­ngitsuugamik soorlulusooq Jehova ungasilligaat, nammineerlutillu qanillisin­naanngilaat. Jehovamut attaveqarluarsin­naanngilagut ikiorneqan­ngikkutta. Qujanar­tumilli utertitsissut pissutigalugu taassumunnga qanillinissarput ajornarun­naarpoq.

15. Sooq utertitsissut iluaqutigalugu inuit Jehovamut attaveqarluaq­qilersin­naappat?

¹⁵ Biibilimi allassimavoq Jiisusi ‘ajortuliagut pillugit saammaan­neqaatissatut pilliutaasoq’. (Joh 1. 2:2) Jiisusip pilliutaa inuit Jehovamut attaveqarluaq­qilernis­saminnut qanoq iluaqutigaat? Jiisusip toqunera pissutigalugu Guutip tunngavis­saqarluarluni inuit imminut qanimut attaveqarluaq­qilersin­naatippai. (Rom 3:23-26) Allaat kiffani aalajaatsut Jiisusip toqunera sioqqullugu inuusut naapertuil­luartutut isigisinnaavai. (Mos 1. 15:1, 6) Qanoq taamaaliorsinnaava? Utertitsis­sutitut pilliutaajumaartoq tunngavigalugu. Jehovap ernini imminut pilliutigiumaartoq qularin­ngilluinnarpaa. (Es 46:10) Utertitsissut Guutimut attaveqarluar­nissatsinnik ajornarun­naarsitsivoq.

16. Eqqaaniaanissamut isumakkut piareersarninni aamma suna eqqarsaatigisin­naaviuk? (Aamma asseq takuuk).

¹⁶ Jehovamut qanimut attaveqarluaravit qanoq iluaqutigisar­nerlugu eqqarsaatigiuk. Assersuutigalugu imaassinnaavoq Jiisusip ilinniar­titsissutigisaatut Jehova Ataatattut taasarit. (Mat 6:9) Ilaannikkullu immaqa allaat Jehova Ikinngutittut taasarpat. Jehovali Ataatatsitut Ikinngutitsitullu taagaangatsigu maniguulluta ataqqin­ningaarlutalu taamaalior­tassaagut. Sooq? Ajortiliugatta ikiorneqan­ngikkuttalu Jehova qanillisin­naanngin­natsigu. Aatsaat utertitsissummik akiliun­neqaratta Jehovamut qanimut attaveqarsin­naavugut. Jiisusip ‘qisummi naalliutsitsiviliami aavanik kuisinikkut allat nunarsuarmiittut qilammiittullu tamarmik imminut eqqisseqateqar­nissaat saammaan­neqarnissaallu’ Jehovap ajornarun­naarsippaa. (Kol 1:19, 20) Taamaat­tuminguna Jehovamut qanimut attaveqarluarsin­naasugut – allaat naammal­luinnan­ngitsuugaluarluta.

UTERTITSISSUT JEHOVAP NALLITTUINERANUT ERSIUTAAVOQ

17. Utertitsis­sutitut akiliut Jehovap nallittuisuuneranut qanoq ersiutaava? (Efesossimiut 2:4, 5)

¹⁷ Utertitsissut Jehovap nallittuingaar­neranik ersersitsivoq. “Unioqqutitsinigut pissutigalugit toqungagaluartugut … inuulersip­paatigut.” (Efesossimiut 2:4, 5 atuakkit). Angutitut illup qarmakuisa ataanniittutut ‘eqqortumik pissutiginiagaqarlutik naassaan­ngitsumik inuuneqalerusuttut’ ikioqqupput nalunngin­namikku ajortiliullutik annaanneqar­tariaqarlutillu. (ApS 13:48) Jehovap kunngeqarfimmik nutaarsiassat nuannersut oqaluus­sissutigineqarnerat aqqutigalugu taakku ikiortarpai. Oqaluus­siffigineqarunimmi Jehova erneralu Jiisusi ilisarisimalersin­naavaat. (Joh 17:3) Saatani isumaqaruni Adami Evalu ajortulior­tikkamigit Guutip siunertaa maangaan­nartillugu kukkorujus­suarpoq.

18. Utertitsissut eqqarsaatigitillugu suna eqqaamas­savarput?

¹⁸ Utertitsissutip uagutsinnut iluaqutaanera eqqarsaatigitillugu aamma eqqaamas­savarput Jehovap taamaalior­neranut suna pissutaanerpaanersoq. Utertitsissut uagutsinnut iluaqutaasutut isigiin­narnagu eqqaamas­savarput Jehovap tamanna aqqutigalugu Saatanip Edenimi unnerluussutaa akigaa. (Mos 1. 3:1-5, 15) Utertitsissut aqqutigalugu Jehovap atini illernarsisippaa Saatanillu salluliuutaasa ilumuun­nginnerat uppernarsarlugu. Aamma ajortimit toqumillu annaakkamitigut ersersippaa Guutiulluni asannittoq. Jehovallu ajunngisaarfigingaarluta naammal­luinnan­ngitsuugaluartugut Saatanip salluliuutaasa ilumuun­nginnerinut uppernarsaaqataanis­satsinnut periarfis­sippaatigut. (Uss 27:11) Utertitsissut qujamasuutigalugu qanoq ersersis­sinnaaviuk? Allaaserisami tulliuttumi tamanna akineqassaaq.