Ilumoortoq tusaruminartumik oqaatigisaruk

1. Jehovap ilaqutariis­sortaanut ilaasut qanoq pissuseqar­tariaqarpat?

UPPEQAT ilisarisimalerusullugu ima aperikkajut­tarpugut: “Sallusuissut qanoq nassaariviuk?” Ilaat oqartarput “sallusuissummi peroriar­torsimallutik”. Allat oqaluttuartarput aatsaat qanittukkut “sallusuissut nassaarisimallugu”. Taama oqartarpugut sallusuissut, tassa ilumoortoq Guutip oqaasianeersoq, inuunitsinnut sunniuteqarsimammat. Nalunngilarpullu aatsaat ilumoortoq nuannaringaarlugulu maleruarutsigu Jehovap ilaqutariis­sortaanut ilaasin­naalluta. Ilaatigut ilumoortumik oqaluttar­nitsigut sutigullu tamatigut unneqqarin­nitsigut taamaalior­tarpugut. – Tuss 15:1-3.

2. (a) Jiisusi qanoq ilisimaneqarpa? (b) Jiisusip ilinniar­titsinera inunnut qanoq sunniuteqarpa?

² Jiisusi tamatigut ilumoortumik oqaluttarpoq. Aamma akerlilersortaasa tusakkatik nuannarin­ngikkaluarlugit tamanna nassuerutigaat. (Mat 22:16) Jiisusi oqaluus­sinermi kingunerisinnaasai pillugit ima oqarpoq: “Erneriit, panigiit aamma ukuaq sakialu arnaq avissaar­tuutsik­kiartorlugit tikiuppunga.” (Mat 10:35) Soorunami Jiisusip siunertarinngilaa ilinniar­titanilu oqaluus­sissutigisartik inuit ajortumik qisuariarfigissagaat, piviusorli oqaatigiinnarpaa. (Mat 23:37) Nalunngilaa oqariar­tuutini inunnik avissaar­tuutsitsiumaartoq. Ilaasa ilumoortoq Biibilimeersoq nuannarissavaat, ilaasali nuannaris­sanngilaat. – Tes 2. 2:9-11.

3. Allaaserisami matumani suna sammissavarput?

³ Nuannarineqan­ngikkaluarut­taluunniit unneqqarin­nitsigut eqqortumillu oqalunnitsigut Jiisusi ilaarusupparput. Aamma oqaluus­sinitsinni taamaappoq. Tusarusut­toqanngik­kaluaraangal­luunniit ilumoortoq Biibilimeersoq oqaluus­sissutigiuarusupparput. Tassa imaappa oqaasissagut qanorlu oqaatigis­sanerlugit eqqarsaatigisariaqan­ngikkigut? Soorunami naamik. Allaaserisami apeqqut pingaarutilik una aallarniutigis­savarput: Jehova pillugu ilumoortoq sumi nassaarisin­naavarput? Taava sammissavarput sooq, qanoq aamma qaqugu ilumoortoq oqaatigis­sanerlugu. Taamaalilluta qanoq pissuserilluta piffissarlu eqqorlugu ilumoortoq oqaatigis­sanerlutigu paasissavarput.

JEHOVA PILLUGU ILUMOORTOQ SUMI NASSAARISIN­NAAVARPUT?

4. Sooq oqarsin­naavugut Jehova ‘Guutiusoq unneqqarissoq’?

⁴ Jehova ilumoortumik oqaluttuaannarpoq. Assersuutigalugu suut eqqunngitsuunerat suullu eqqortuunerat pillugit oqaasii ilumoorput. (Tuss 19:10; 119:142, 151) Siulittuutai eqquuttuaannarput neriorsuutaalu piviusun­ngortuaan­narlutik. (Mos 4. 23:19; Es 55:10, 11) Tassami Jehova sallusin­naanngilaq! (Hebr 6:18) Pissutis­saqarluartumik Biibilimi ‘Guutitut unneqqarissutut’ allaatigineqarpoq. – Tuss 31:6.

5. Sooq Jehova nassaariuminaatsuunngila? Nassuiaruk. (Apustilit Suliaat 17:27)

⁵ Guuteqan­nginneraasut amerlaqaat, aamma oqartoqartarpoq Guuteqarpat taanna ilisarisimaler­neqarsin­naanngitsoq. Tamannali ilumuunngilaq. Jehovap piuneranik pinngor­titaani uppernarsaaterpas­suaqarpoq. (Rom 1:20) Athenimiunut ilinniarsimasunut Paulusi oqarpoq Guutip kissaatigigaa nanissagitsinni Guutilu tamatsinnut ungasin­ngitsuusoq. (Apustilit Suliaat 17:27 atuaruk). Tassami Biibilimi allassimavoq Jehovap inuit ilumoortumik ujaasisut imminut qanillisittarai. – Joh 6:44.

6. Biibili ilumoortunik sunik imaqarpa, aamma sooq qujamasuutigaagit?

⁶ Ilaatigut Biibilip misissor­neratigut Jehova nassaarineqarsinnaavoq. Biibilimik allattut anersaamit illernartumit siulersor­neqarput. (Pet 2. 1:20, 21) Taamaattumik Biibilip imai tamarmik eqqortuupput uppernarlutillu. Assersuutigalugu avataarsuup nunarsuullu pinngor­tinneqarneri pillugit allassimasut upperil­luinnarsin­naavagut. (Mos 1. 1:1, 26) Sooq kukkoqqajaasar­nersugut aamma toqup naalliuutillu atuunneri pillugit allassimasut ilumoor­tuunerat tatigil­luinnarsin­naavarput. (Rom 5:12; 6:23) Biibilimi allassimammat Jehovap ernini aqqutigalugu pissutsit ajortut ‘sallumut ataataasup’ pilersitai tamaasa iluarsissagai upperil­luinnarsin­naavarput. (Joh 8:44; Rom 16:20) Aamma upperisin­naavarput Biibilimi neriorsuutigineqarmat Jiisusip ajortut tamaasa peerumaarai, toqusimasut makitik­kumaarai, nunarsuaq paratiisin­ngortik­kumaaraa naammal­luinnar­tunngor­nissatsinnullu ikiorumaaraatigut. (Joh 11:25, 26; Joh 1. 3:8) Tupinnarluinnarpoq Jehovap ilumoortunik tamakkuninnga tamanik paasitim­matigut allanullu oqaluus­sisinnaatim­matigut. – Mat 28:19, 20.

SOOQ ILUMOORTOQ OQAATIGIS­SAGIPPUT

7-8. Ilumoortup oqaatiginissaanut pissutiginiagarput Jehovamut pingaaruteqarpa? Nassuiaruk. (Makkorsi 3:11, 12) (Aamma assit takukkit).

⁷ Eqqaaneqareersutut Jehovap ilaqutariis­sortaanut ilaasut tamatigut ilumoortumik oqaluttassapput. Taamaalior­nitsinnullu pissutiginiagarput Jehovap aamma pingaartippaa. Jiisusip nunarsuarmi kiffartornerata nalaani pisimasoq eqqarsaatigiuk. (Makkorsi 3:11, 12 atuakkit). Galiliiap Tasersuata eqqaani oqaluus­sitillugu inuppassuit ornillugu ussagarfigaat, aamma taakkua akornan­niipput anersaapilunnit pulaneqarsimasut. Jiisusip saavanut aqullaaginnarput suaarlutillu: “Illit Guutip erneraatit!” Jiisusi pillugu ilumoortoq sooq oqaatigaat? Immaqa allanit tatigineqar­nissartik siunertaralugu taamaaliorput kingornatigullu inuit Jehovamit qimagutitin­niarlugit. Tassa anersaapiluit eqqortumik oqalupput, pissutiginiagaalli namminis­sarsior­neruvoq. Jiisusili uukapaatin­neqarsin­naanngilaq, taamaat­tumillu kinaanini allanut oqaluttuareqqunagu naalakkerpai.

⁸ Oqaluttuaq taanna qanoq ilinniarfigisin­naavarput? Eqqortumik pissutiginiagaqarluta ilumoortumik oqaluttar­nissarput Jehovap pingaartippaa. Tassa allanut oqaluus­sinissatsinnut pissutaasoq tassaassaaq Jehovamik asanninnerput. Oqaluus­sissutigisarput pissutigalugu nersualaar­neqarutta imminut pinnata Jehova ataqqinaatis­sikkusupparput! – Mat 5:16; aamma takukkit Apustilit Suliaat 14:12-15.

9. Qanoq iliussan­ngilagut, aamma sooq?

⁹ Imminut malugeq­qusaaleqqunata suna alla pingaarutilik eqqarsaatigis­savarput? Takorlooriaruk qatanngutip angutip angisuumik akisussaaffillip tatigalutit allanut oqaatigeq­qusaanngitsumik oqaluttuukkaatit. Taava illit allanut ingerlateq­qillugu oqaluttuarputit. Oqaluttuarfigisavillu kingusin­nerusukkut paasilerunikku oqaatigisatit ilumoortuusut isumaqalersin­naapput pingaarutilinnik allanik ilisimasarpas­suaqartutit, immaqalu tupigutsallutik ajasoorutigaatsit. Jehovalli tamanna nuannarinngilaa, aliasuutigis­savaami. (Uss 11:13) Sooq? Allanut oqaatigeq­qusaanngitsumik ingerlatitseq­qiigavit ajortumillu pissutiginiagaqarlutit ilumoortoq oqaatigigakku.

ILUMOORTOQ QANOQ OQAATIGIS­SAGIPPUT

10. “Tusaruminartumik” oqalunneq qanoq isumaqarpa? (Kolossimiut 4:6)

¹⁰ Kolossimiut 4:6 atuaruk. Paulusip kristumiut Kolossimiut kajumis­saarpai “tamatigut tusaruminartumik” oqaluttaq­qullugit. Grækerisut oqaaseq “tusaruminartumik” nutserneqartoq arlalinnik isumaqarsinnaavoq. Tassa asannip­paluttumik, inussiar­nersumik iluaqutaasin­naasumillu oqalunneq pineqarpoq.

11-12. Sooq eqqarsaatigil­luassavarput ilumoortoq qanoq saqqummiutis­sanerlutigu? (Aamma assit takukkit).

¹¹ Paulusip kajumis­saarutaa malillugu inussiar­nersumik, asannip­paluttumik iluaqutaasin­naasumillu ilumoortoq ilinniar­titsissutigerusut­tarparput. Ilumoortut Biibilimeersut panamut ipittumut assersuun­neqarput. Tassa Biibilip tarneq anersaarlu avissaar­tissinnaavai – allatut oqaatigalugu misigis­sutsigut pissutiginiak­kagullu qulaarsinnaavai. (Hebr 4:12) Biibilili eqqortumik atunngik­kutsigu oqaloqatigisarput narrujuum­misittoorsin­naavarput assortuinialersillugulu. Qanoq pisoqarsin­naagami?

¹² Takorlooruk oqaluus­sitilluta angummik inussiar­nersumik naapitsisugut. Taanna oqaluttuarpoq assilissat inuusaliallu guutisior­nermini atortarlugit aamma ilaquttani ilagalugit juullisiorneq poorskisiornerlu pingaar­tingaarlugit. Taava Biibili atorlugu takutis­sinnaagaluarparput uumassuseqan­ngitsunut qinusarneq sianiitsulior­nerusoq nassuiarlugulu juullisiorneq poorskisiornerlu Biibilimi ilinniar­titsissutigineqartunut naapertuutin­ngitsut. (Es 44:14-20; Kor 2. 6:14-17) Oqaloqatigeeq­qaarnermi taamaalioraluarutta ilumoortoq oqaatigis­sagaluarparput, kisianni Guutip oqaasia periaaserilluta atunngitsuus­savarput.

13. Oqaatsigut qanoq “taratsersin­naavagut”?

¹³ Paulusi aamma allappoq taratsikkamik oqaluttas­sasugut. Paulusi isumaqanngilaq ilumoortoq allanngor­tillugu oqaatigis­sagipput imaluunniit toqqortus­sagipput. Kissaatigaali oqaatsigut “mamartuussasut”, tassa allanut killitsin­nartuussasut. (Job 12:11) Tamanna sapernarsinnaavoq. Nerisassat eqqarsaatigalugit isumaqar­toorsin­naavugut uagut mamarisavut allat aamma mamarissagaat. Taamatuttaaq aamma isumaqar­toorsin­naavugut oqaluttariaaserput kikkut tamarmik nuannarigaat. Naleqqus­sartariaqarpugulli. Assersuutigalugu kulturit ilaanni inuit isummatik toqqaan­nartumik annisin­naasarpaat, allaat utoqqaanerusunut. Allanili taamaaliorneq akuerineqarsin­naananilu narrujuum­misitsisinnaavoq. Paulusi oqarpoq “kinaluunniit qanoq akissallugu” ilisimas­sagipput. Tamanna isumaqarpoq uagut iluarinerusarput imaluunniit kulturerput apeqqutaatinnagu tusarnaar­tittali iluarinerusaat naapertorlugu oqaluttas­sasugut.

ILUMOORTOQ QAQUGU OQAATIGIS­SAGIPPUT

14. Jiisusip nunarsuarmiik­kallarami ilisimasani tamaasa ilinniar­titaminut ilinniar­titsissutigai?

¹⁴ Jiisusi tamatigut inussiar­nersumik oqaluttarpoq, ilinniar­titanilu amerlasuunik ilinniartippai. (Mak 6:34) Suli ilikkagas­sarpassuaqaraluartut Jiisusip ilisimasaminik tamanik ataatsik­korsuaq oqaluttuutinngilai. Paasisin­naasaasa killeqarnerat eqqarsaatigisarpaa. Aamma nalunngilaa ilumoortut ilaat massakkorpiaq paasisariaqan­ngikkaat. (Joh 16:12) Qanoq ilinniarfigaarput?

15. Jiisusi qanoq ilinniarfigaarput? (Ussatit 15:23) (Aamma asseq takuuk).

¹⁵ Jiisusip maligassiaata ersersippaa ilumoortut Biibilimeersut ilisimasagut tamaasa ataatsik­korsuaq ilinniar­titsissutigis­sanngikkigut. Jiisusi qanoq ilaarsin­naavarput? Inuit atugaat eqqarsaatigisariaqarpagut. Pulaarneqartoq ilaquttani ilagalugit juullisiornermik poorskisior­nermillu nuannarisaqartoq eqqaaqqeriartigu. Nalunngilarput nalliut­torsiornerit taakku upperisarsioqatigiinnit eqqunngitsunit pilerfeqartut Guutillu tamakku nuannarin­ngikkai. Takorlooriarulli decembarip qeqqata missaani angut taanna Biibilimik atuaqatigisalerit. Nalliut­torsiornerit taakku pillugit Biibilimi qanoq allassimasoqarnera ingerlaannaq takutik­kutsigu tusaruminartumik taratsik­kamillu oqalussimassaagut? Naatsorsuutigisin­naanngilarput ingerlaannaq juullisior­tarunnaassasoq. Atuaqqis­saartartut ilaasa ilikkakkatik Biibilimeersut ingerlaannaq maleruar­taleraluaraat allat eqqarsaatimikkut iliuutsimikkullu allannguinis­saminnut piffissaq sivisunerusoq atortarpaat. Biibilimik ilinniar­titagut siuariar­tornissaannut ikiorsin­naavagut ilisimasariaqagaat piffissan­ngoraangat – tassa paasinnis­sinnaaleraangata – oqaatigisar­nerisigut. – Ussatit 15:23 atuaruk.

16. Biibilimik misissueqatigisar­takkagut ilumoortoq malillugu inuunis­saannut qanoq ikiorsin­naavagut?

¹⁶ Jehova pillugu ilinniar­titsineq inuunermi nuanner­nerpaat ilagaat. Aamma ilumoortoq aalajangiusimallugu inuulersimasunik takulluni nuannertaqaaq. (Joh 3. 3, 4) Taamaalior­nissaannut qanoq ikiorsin­naavagut? Nammineq taakkununnga maligas­saalluar­tariaqarpugut inooriaatsitsigullu takutillugu Guutip oqaasiani neriorsuutit eqquukkumaartut upperil­luinnaripput. Eqqortumik pissutiginiagaqarluta, tassa Jehova ataqqinaatis­sikkusullugu, ilumoortumik oqaluttassaagut. Kiisalu inussiar­nersumik piffissarlu eqqorlugu ilumoortoq ilinniar­titsissutigis­savarput. Taamaalilluta uppernarsas­savarput Jehovamut, Guutimut unneqqarissumut, kiffartor­tuulluta.