Esterip juuteqatini annaakkai

Esteri niviarsiaavoq juutiusoq Persiami illoqarfimmi Susami najugalik. Ukiorpassuit matuma siorna siuaasai Nebukadnesarip Jerusalemmimit aallaruppai. Esteri illooqqamini Mordokajimi peroriartorpoq, taanna Persiami kunngimut Ahasverusimut kiffaavoq.

Kunngi Ahasverusi allamik dronningitaarusuppoq. Kiffaasa nunami arnat pinnernerpaat, Esteri ilanngullugu, aggiuppaat. Arnarpassuit akornanni kunngip Esteri dronninginngortussatut toqqarpaa! Mordokajip Esteri oqarfigaa juutiunini oqaatigissanngikkaa.

Angut anneruniartoq Hamanimik atilik naalagartanut naalagaavoq. Kikkunnillu tamanit seeqqummerfigineqaqquvoq. Mordokajili taamaaliorusunngimmat Hamanip kamaatingaaramiuk toqukkusulerpaa. Hamanip paasigamiuk Mordokaji juutiusoq juutit tamaasa toqunniarlugit pilersaarusiulerpoq. Kunngimut oqarpoq: ‘Juutit ulorianarput. Toqunneqartariaqarput!’ Ahasverusip akivaa: ‘Piumasattut iliuinnassaatit.’ Hamanilu inatsisiliorsinnaalersippaa. Taava Hamani inatsisiliorpoq juutit tamarmik qaammatip adarip ulluisa 13-ianni toqunneqassasut. Jehovalli tamakku tamaasa malinnaaffigai.

Esteri inatsit pillugu tusagaqarsimanngilaq. Taava Mordokajip inatsit pillugu allakkanik nassippaa oqarfigalugulu: ‘Kunngi oqaloqatigiartorniaruk.’ Esteri oqarpoq: ‘Kinaluunniit qaaqquneqarsimanani kunngimukartoq toqutaassaaq. Kunngip ulluni 30-ni qaaqqunikuunngilaanga! Kisianni taakunnarumaarpunga. Kunngisullu tigumiani kuultiusoq uannut isaappagu inuuginnassaanga. Taamaaliunngippallu toqussaanga.’

Esteri kunngimukarpoq. Kunngip takugamiuk tigumiani kuultiusoq isaappaa. Esterip ornimmani aperivoq: ‘Qanoq ikiugassaavit?’ Esterip akivaa: ‘Hamanilu neriartoqqorusuppassi.’ Nereqatigiinnerminni aamma aqaguani nereqatigiinnissamut qaaqqoqqippai. Aappassaanillu nereqatigiinnerminni kunngip aperaa: ‘Suna kissaatigaajuk?’ Akivoq: ‘Uanga inoqatikkalu toqunniarneqarpugut. Ikiortigut.’ Taava kunngip aperaa: ‘Kiap toqunniaramisi?’ Akivorlu: ‘Uuma inupiluup, Hamanip!’ Ahasverusi kamangaarami Hamani ingerlaannaq toqunneqartippaa.

Kialluunniilli Hamanip inatsisiliaa, allaat kunngip, taamaatissinnaanngilaa. Taava kunngip Mordokaji naalagaanertanut naalaganngortippaa inatsisiliorsinnaalersillugulu. Taava Mordokaji inatsisiliorpoq juutit ullormi saassunneqarnerminni imminut illersorsinnaalissasut. Qaammatillu adarip ulluisa 13-ianni juutit akeqqaminnut ajugaapput. Taamanimiilli ajugaasimanertik ukiut tamaasa nalliuttorsiutigisarpaat.