Daaniali løvit inaanniittoq

Babylonnimi aamma allamik kunngeqarsimavoq mederiusumik Dareiosimik atilimmik. Taassuma maluginiarpaa Daaniali angutaasoq pikkorissoq. Daaniali angutinut naalagaanertanut naalagaanin­ngortippaa. Angutit taakkua Daaniali sinngagilerpaat toqukkusulerlugulu. Nalunngilaat Daaniali ullormut pingasoriarluni Jehovamut qinusartoq. Taamaattumik kunngi Dareiosi oqarfigaat: ‘Inatsiseqar­tariaqaraluarpoq ilinnuinnaq qinusoqar­tassasoq. Unioqqutitsisoq kinaluunniit løvit inaannut iginneqassaaq.’ Siunnersuutaat Dareiosip ajorinnginnamiuk inatsisissaq atsiorpaa.

Inatsit nutaaq tusaramiuk Daaniali ingerlaannaq angerlarpoq. Igalaap ammasup saavani seeqqum­meriarluni Jehovamut qinuvoq. Angutit sinngasut iseriataarput, takuaallu qinusoq. Dareiosimukapallapput oqarlutillu: ‘Daanialip inatsisiliat unioqqutippaa. Ullormut pingasoriarluni Guutiminut qinusarpoq.’ Dareiosip Daaniali nuannarigamiuk toqutaanissaa kissaatiginngilaa. Ulloq naallugu eqqarsaatersuutigigaluarpaa qanoq ililluni Daaniali annaassin­naanerlugu. Kisianni kunngiugaluarluni inatsit atsioreer­nikuusani allanngor­tissinnaanngilaa. Allatullu ajornartumik Daaniali løversuarnut iginneqar­tittariaqarpaa.

Unnuaq taanna Dareiosip Daaniali isumakuluutigingaaramiuk sininngitsoorpoq. Aqaguani ullaakkut løvit inaannukapallappoq Daanialilu suaartarlugu: ‘Guutivit annaappaatit?’

Taava Daanialip nipaa tusaariataarpaa! Daaniali oqarpoq: ‘Jehovap inngiliata løvit qarni matummagit ajoqusin­ngilanga.’ Dareiosi nuannaar­torujussuuvoq! Peqqusivorlu Daaniali løvit inaannit qaqinneqassasoq. Daaniali ajoquser­neqarsiman­ngivippoq. Taava kunngi peqqusivoq: ‘Daanialimik unnerluutiginnittut løvit inaannut igissigit.’ Itersaliallu naqqanut tunnatil­luunniit løvinit nerineqarput!

Dareiosi innuttaminut ima peqqusivoq: ‘Kikkut tamarmik Daanialip Guutia ataqqissavaat. Guutiatami Daaniali løvinit annaappaa.’

Illit Daanialitut ullut tamaasa Jehovamut qinusarpit?