Ezra Guutip inatsisaanik ilinniar­titsisoq

Maanna Israalikkut Jerusalemmimut utereernerata kingorna ukiut 70-it missaat ingerlareersimapput. Sulili ilaat Persiami najugaqarput. Taakkua ilagaat palasi Ezramik atilik Jehovap inatsisaanik ilinniar­titsisartoq. Ezrap paasigamiuk inuit Jerusalemmimi inatsisinik maleruaan­ngitsut ikioriar­torusuppai. Persiami kunngip Artaxerxesip oqarfigaa: ‘Guutip inatsisiminik ilinniar­titsisin­naanias­sagavit ilisimas­suseqalersippaatit. Ilaarusuttut kikkulluunniit ilagalugit aallarit.’ Taava Ezrap Jerusalem­miliaqataarusuttut naapeqatigai. Angalangaatsiar­nissaminni illersor­neqaqqullutik Jehovamut qinupput. Taava aallarput.

Qaammatit sisamat qaangiummata Jerusalemmimut apuupput. Naalagartat Ezra oqarfigaat: ‘Israalikkut Jehovamut naalanngillutik arnanut guutipilus­siortartunut katissimapput.’ Taava Ezra qanoq iliorpa? Inuit isigitillugit Ezra seeqqum­meriarluni ima qinuvoq: ‘Jehova, assigiin­ngitsorpas­suarnik ajunngitsuliorfiginikuuatsigut, ilinnulli ajortuliorsimavugut.’ Inuit peqqissimipput sulili ajortulior­tarlutik. Taamaattumik Ezrap utoqqaanertat eqqartuus­sisullu tamatuminnga misissueqquai. Qaammatit pingasut tulliuttut ingerlanerini Jehovamut guutisiun­ngitsut aallartitaapput.

Ukiut aqqaneq-marluk ingerlapput. Tamatuma ingerlanerani Jerusalemmip qarmarsui sanaqqin­neqarput. Taava Ezrap inuit katersortippai Guutillu inatsisaanik atuffallugit. Ezrap atuagaq inatsisinik imalik quppermagu inuit nikuipput. Jehova unnersiutigaa inuillu isumaqataanertik takutin­niarlugu talitik qullarpaat. Ezrap inatsisit atuarlugillu nassuiarpai, inuillu tusarnaarluaq­qissaarput. Jehovamit ungasil­lisimanertik nassuerutigaat qissatigalugulu. Aqaguani Ezrap inatsisinik atuffateqqippai. Paasivaat tupiusaliorfimmik nalliussivik qanittukkut nallius­sisariaqarlugu. Ingerlaannarlu nallius­sinissartik piareersalerpaat.

Ulluni arfineq-marlunni inuit nalliut­torsiorput Jehovalu naatitanik katersuif­fiulluarsimaneranik qujaffigalugu. Josvap nalaaniilli tupiusaliorfimmik nalliussivik taamarsuaq nalliut­torsiutigineqarsimanngilaq. Nalliut­torsioreeramik inuit katersuupput Jehovamullu qinullutik: ‘Inussiaanermiit annaappatsigut, inoqajuitsumi nerisilluta nunamillu kusanartumik tunilluta. Sulili ilinnut naalanngit­tuarpugut. Mianersoq­quniarluta pruffiitinik aallartitsigaluarputit, tusaanngilagulli. Taamaak­kaluartoq naammagit­tartuarputit. Aaperaamut neriorsuutit eqquutitippat. Maanna neriorsorpatsigit ilinnut naalanniarluta.’ Taava neriorsuutertik allappaat, naalagartallu aamma Levikkut palasillu naqissuserpaat.