Jonatani sapiitsuullunilu ikinngutaal­luarpoq

Kunngip Saulip ernera angajulleq Jonatanimik ateqarpoq. Sorsuttartuuvoq sapiitsoq. Daavi oqarpoq Jonatani nattoralimmiit sukkanerusoq løvimiillu nukittunerulluni. Ullut ilaanni Jonatanip sakkutuut qaqqamiittut takuai, filisteriupput. Ikiortiminut sakkuminik tigummiartumut oqarpoq: ‘Aatsaat Jehovap nalunaarfigip­patigut saassus­sissaagut. Filisterit qummukaq­quppatigut taava paasissavarput saassus­sissalluta.’ Filisterit nilliapput: ‘Majuarfiginiartigut akiuukkiar­torlusi!’ Taava Jonatani ikiortinilu majuarput sakkutuunullu 20-nut ajugaallutik.

Jonatani kunngip Saulip angajul­lequtigimmani Israalimi tulliulluni kunngiusus­saagaluarpoq. Jonatanilli nalunngilaa Jehovap Daavi kunngissatut toqqarsimagaa. Taamaak­kaluartorli sinngaginngilaa. Jonatani Daavilu assut ikinngutigiil­lualerput. Neriorsoqatigiipput ikioqatigiin­niarlutik illersoqatigiin­niarlutillu. Ikinngutigiin­nerminnut uppernarsaatitut Jonatanip atisami ilaat, panani, pisissini qiterutinilu Daavimut tunniuppai.

Daavi Saulimit qimaaqqatillugu Jonatanip ornippaa kajumis­saarlugulu: ‘Nukittugit sapiillutillu. Jehovap kunngissatut toqqarsimavaatit. Tamannalu aamma ataatama nalunngilaa.’ Illit Jonatanitut ittumik ikinnguteqarusuppit?

Jonatani ikinngutaal­luarpoq ilumoorfiginnittoq, Daavip tatigisinnaasaa. Jonatanip arlaleriarluni inuunini navianar­torsior­tillugu ikinngutini ikiorpaa. Nalunngilaa ataatami Saulip Daavi toqukkusukkaa, ataatanilu oqarfigaa: ‘Daavi toqukkukku ajortuliussaatit. Ajortumik iliornikuunngilaq.’ Saulip Jonatani kamaattorujus­suanngorpaa. Ukiualuit qaangiummata Sauli Jonatanilu sorsutsillutik toqupput.

Jonatanip toqoreernerata kingorna Daavip Jonatanip ernera Mefibosheti ujalerpaa. Daavip Mefibosheti nassaarigamiuk ima oqarfigaa: ‘Ataatat ikinngutigil­luarakku inuunerpit sinnera isumagis­savakkit. Illussaarsuanni najugaqalissaatit nereqatigalungalu.’ Daavip ikinngutini Jonatani puiunngisaannarpaa.