Daavi Saulilu

Daavip Goliati toqoreeraalu kunngip Saulip sorsuttar­tuminut naalagan­ngortippaa. Daavip sorsunnerni ajugaasaqat­taarnini tusaamasaas­sutigilerpaa. Sorsoreerluni angerlaraangat arnat qitiitigalutik ima erinarsorfigisarpaat: ‘Saulip 1.000-t toquppai, Daavilli 10.000-t toquppai!’ Taava Saulip Daavi sinngagilerpaa toqukkusulerlugulu.

Daavi kukkilat­tarissamik nipilersul­laqqissuuvoq. Ullut ilaanni Daavip nipilersorfigigaani kunngip Saulip naaleriarpaa. Daavili illuariar­taarmat uniorpaa naaligarlu iikkamut kapputsillugu. Tamatuma kingorna Saulip arlaleriarluni toqoriaraluartarpaa naggataatigullu Daavi qimaavoq inoqajuitsumullu toqqorluni.

Saulip sakkutuuni 3.000-t ilagalugit Daavi ujalerpaa. Qaarusummut iserpoq, sunaaffa Daavip toqqoqqaf­figisaanut. Angutitaasa isussuffigaat: ‘Massakkut Saulip toqunnissaanut periarfis­saqalerputit.’ Daavi nipaarsaarluni Saulimut qanilliartorpoq qallersaataatalu nuuanik kipisilluni. Kingornatigulli Jehovap kunngisut toqqagaanut ataqqin­ninngitsuliornini ilerasuutigilerpaa. Angutitanilu Saulimut saassus­seqqunngilai. Sauli qaarusummiit animmat Daavip suaarpaa toqunniarlugu periarfis­saqarsimagaluarluni. Taamaak­kaluartorli Saulip Daavi suli malersor­tuarpaa.

Unnuit ilaanni Daavi soralussanilu Abishaji Saulip sakkutuuisalu unnuiffigisaan­nukarput. Tamarmik sinipput, allaat aamma Saulip paarsisua Abneri. Abishaji oqarpoq: ‘Periarfis­saqalerpugut! Toquunnaqilara.’ Daavili akivoq: ‘Naamik, Jehovap Sauli isumagis­saqqaarpaa. Naaligaataa imiisivialu tigoriarlugit qimagutiinnaarta.’

Daavi qaqqamut ungasin­ngitsumut majuarpoq Saulikkut tupersimaarfiat takulluarsin­naanias­sagamiuk. Suaartarpai: ‘Abneri, sooq kunngit paarinngiliuk? Naak Saulip imiisivia naaligaataalu?’ Daavip nipaa Saulip ilisarigamiuk oqarfigaa: ‘Toqussimasin­naagaluarparma, taamaaliun­ngilatilli. Nalunngilara Israalimi kunngissatut tullinnguuttutit.’ Taava Sauli illussaarsuaminut uterpoq. Saulip Daavi iluarin­ngimmagu imaanngilaq Saulip ilaqutaasa tamarmik uumigigaat.