Kunngip Daavip ajortuliornera

Sauli toqummat Daavi 30-nik ukioqarluni kunngin­ngorpoq. Ukiualuit kunngioreerluni unnuit ilaanni illup qaavaniitilluni arnaq pinnersoq takuaa. Daavip paasivaa arnaq takusani Batsebamik ateqartoq ueqartorlu sakkutuumik Uuriamik atilimmik. Daavip Batseba illussaarsuaminut aggertippaa. Atoqatigiipput, Batsebalu naartulerpoq. Daavip ajortuliornini isertor­niarsarigaluarpaa. Sakkutuut naalagaat oqarfigaa Uuria akiuuffiusumut sallerpaan­ngorlugu inississagaa taavalu qimallugu imminiigin­nassagaat. Uuria toqutaammat Daavip Batseba katippaa.

Daavi ajortorujus­suarnik iliorpoq, Jehovallu tamakku tamaasa takuai. Qanoq iliussava? Jehovap pruffiiti Naatat Daavimukartippaa. Naatat oqarpoq: ‘Angut pisooq amerlasoorsuarnik savaateqarpoq. Piitsorli ataasin­nguamik erligisaminik savaaraateqarpoq. Taava pisuup piitsup savaaraatituaa tiguaa.’ Daavi kamaammerpoq oqarlunilu: ‘Angut taamaaliortoq toqutassaavoq!’ Taava Naatap Daavi oqarfigaa: ‘Illinuna pineqartutit!’ Daavi aliasut­torujus­suanngorpoq Naatamullu nassuerpoq: ‘Jehovamut ajortuliorsimavunga.’ Daavi ajortuliornermi kingunerisaanik ilaquttanilu ajornar­torsiuterpas­suaqalerput. Jehovap Daavi pillarpaa unneqqarillunili maniguummat inuutiin­narlugu.

Daavi Jehovamut guutisiorfimmik sanarusuk­kaluarpoq, Jehovalli Daavip ernera Saalumuut sanatitsisussatut toqqarpaa. Daavip guutisiorfiup sananissaanik Saalumuut piareersaappaa oqarlunilu: ‘Guutisiorfik Jehovamut sananeqartussaq angisoorujus­suullunilu kusanar­torujus­suussaaq. Saalumuut suli inuusut­tunnguuvoq taamaattumik ikiorniarlugu atortorpas­suarnik piareersaak­kumaarpara.’ Daavi guutisiorfiup sananeqar­nissaanut aningaasarpas­suarnik tunissuteqarpoq. Sulisussanik pikkorissunik nassaarpoq. Aamma kuultit sølvillu katersorpai orpiillu cederiusut Tyrusimiit Siidonnimiillu tikisillugit. Toqunngitsiarluni Daavip guutisiorfiup sananissaanut titartakkat Saalumuumut tunniuppai. Oqarpoq: ‘Jehovap makkuninnga allatsis­simavaanga ilinnut tunnius­sassannik. Jehovap ikiussavaatit. Erseqinak suliassarlu aallartillugu.’