Ataatsimiinnerni tusarnaarluartarit

1-2. (a) Jehovap innuttani anersaakkut qanoq isumagisarpai? (Tussiaat 23:1, 2, 5) (b) Ataatsimiit­tarnitsinnut tunngatillugu suut sammissavagut?

JEHOVAP anersaakkut inuussutis­sarpassuarnik pilersor­tarpaatigut. Daavi ima tussiaasiortoq isumaqatigaarput: “Naalagaq paarsisigaara, sumik ajorsaateqan­ngilanga.” – Tussiaat 23:1, 2, 5 atuakkit.

² Jehovap ilaatigut ataatsimiinnerni anersaakkut inuussutissanik pilersor­tarpaatigut. Ilisimariikkagut ataatsimiinnerni sammikulasarpagut. Allaat sivisuumik Nalunaajaasuusimagaluarluta eqqaasitsissutit taamaattut pisariaqar­tittarpagut. (Pet 2. 1:12) Kisianni arlaleriarluta tusartakkagut sammineqaraangata tusarnaarluarnissat ajornakusoor­tittarpiuk? Taamaappat allaaserisaq una iluaqutigissavat. Ataatsimiinnerni sooq tusarnaaq­qissaar­nissarput pingaaruteqartoq sammissavarput. Aamma ataatsimiinnerni ilinniar­titsisartut najuuttunik qanoq tusarnaarusulersitsisinnaasut paasissavarput. Kiisalu tusarnaarluar­nissatsinnut siunnersuutitsialaqassaaq. Siullermilli apeqqut una sammissavarput: Ataatsimiinnerni ilinniar­titsissutigineqartut kiminngaan­neerpat?

EQQAAMAJUK JEHOVAMIT ILINNIAR­TINNEQARTUGUT

3. Jehovap qanoq oqaluut­tarpaatigut, kiffaasalu taassuma oqaasia qanoq atorluar­tarpaat?

³ Jehovap oqaatsini, tassa Biibili, aqqutigalugu oqaluut­tarpaatigut. (Tim 2. 3:16, 17) Jiisusip tamanna paasilluarsimavaa. Guutip oqaasianik atuillaq­qissuummat tusarnaartai ima oqarput: “Ilinniarfinni ilinniarsiman­ngikkaluarluni Allakkanik Illernartunik qanoq taama ilisimasaqar­tigisin­naagami?” (Joh 7:15) Inuit eqqortuliorusuttut Jiisusip Allakkanik Illernartunik nassuiaanera tusarlugu nuannaarutigisarpaat. Kristumiullu siulliit, soorlu Paulusip Apulusillu, Jiisusi ilaarlugu tunngavilersuinerminni Allakkat Illernartut issuaaf­figikulasarpaat. (ApS 17:2, 3; 18:24, 28) Nalunngisatsitut allaaserisat, oqalugiaatinut najoqqutassat videullu peqatigiis­sortatsinnit saqqummiun­neqartut tamarmik Biibilimik tunngaveqarput. Nalunaajaasuun­ngitsut ataatsimiigiaq­qaartut Biibilimik atorluaasarnerput tupigusuutigisarpaat. Ataatsimiinnerni qaqisartut ilinniar­titsinerminni Biibili pingaar­nerpaatit­tarpaat. Najuuttut atuffat­tarlugillu allassimasunik paasinnin­nissaannut atuisin­naanissaannullu ikiortarpaat. – Luk 24:32.

4. Sooq ataatsimiinnerni tusarnaarluar­nissarput pingaaruteqarpa?

⁴ Oqaaseq “tusarnaarneq” Biibilimi eqqaaneqaraangat paasissutissamik tusaasaqaannarneq pineqarneq ajorpoq. Pineqar­tarporli paasissutissanik uummammiuliussineq inuunermilu atuineq. Tassa ataatsimiinnerni Biibili aqqutigalugu Jehovap ilinniar­titsinera tusarnaaraangatsigu naalannissaa ajornan­nginnerutit­tarparput. Ilikkak­kagullu maleruaraangatsigit Jehova nuannaar­tittarparput. – Uss 27:11.

SOOQ ATAATSIMIINNERNI TUSARNAAQ­QISSAAR­TARTUGUT

5. Jehovamik asanninnerput sunissatsinnut kajumis­sissutigaarput? (Johannesi 4:23, 24; Johannesimit 1. 5:3)

⁵ Ataatsimiinnerni tusarnaaq­qissaar­tarpugut Jehova asagatsigu. (Mat 22:37) Jehova ilisarisimanerujar­tortillugu asaneruler­tarparput. Asagatsigulu tusarnaarusut­tarparput, naalakkusut­tarparput iluarisaatullu guutisiorfigerusullugu. – Johannesi 4:23, 24; Johannesimit 1. 5:3 atuakkit.

6. Inoqatitsinnik ikiuinissarput pillugu ataatsimiin­nitsinni suna ilikkar­tarparput?

⁶ Ataatsimiinnerni tusarnaaq­qissaar­tarpugut inoqatigut asagatsigit. (Mat 22:39) Ataatsimiinnerni Jehovap ilinniar­tittarpaatigut uppeqatigut taassuminngalu suli ilisarisiman­ninngitsut qanoq ikiorsin­naagigut. Assersuutigalugu quppersagaq Inoqatit asajuk ilinniar­tillugulu iluaqutigalugu paasisin­naavarput oqaluus­sinermi qanoq asanninnermik ersersitsisin­naanersugut. Inuit oqaloqatiginiarlugit saaffiginissaat sapernar­tittarpiuk? Taamaappat ulluinnarni ataatsimiinnermi “Oqaluus­sinermut piareersarneq”-mi qaqisut periaasii immikkut maluginiarsin­naavatit.

7. Jehovap tusarnaarnissaa sooq pingaaruteqarluinnarpa?

⁷ Ataatsimiinnerni tusarnaaq­qissaar­tarpugut inuuneq pingaar­tikkatsigu. Itsaq Jehovap innuttani oqarfigai pilluas­sagunik naassaan­ngitsumillu inuussagunik naalattariaqaraanni. (Mos 5. 32:44-47) Aamma nalitsinni taamaappoq. Ataatsimiinnerni tusarnaarluaraangatta kajumis­sisinneqar­tarpugut pinertusaarluta paratiisissap utaqqinissaanut. (Rom 8:25) Ulluni kingullerni inuugatta anersaakkullu eqqumasariaqaratta Jehovap tusarnaarnissaa pingaaruteqarluinnarpoq. – Mat 24:42-44; Saqq 1:3.

NAJUUTTUNIK TUSARNAARUSULERSITSIGIT

8. Sooq ataatsimiinnerni ilinniar­titsisartut ilinniar­titsillaq­qinneruler­nissartik sulissutigiuassavaat?

⁸ Qatanngutit angutit qaqisarfimmiit ilinniar­titsisartut, ingammik tamanut oqalugiartartut, ilinniar­titsillaq­qinneruler­nissartik sulissutigiuassavaat. Saqqummiussaq Biibilimik tunngavilik piareersarluagaq inuit ilumoortumut Biibilimeersumut kajungiler­nissaannut uagullu uppertuujuar­nissatsinnut iluaqutaangaarsinnaavoq. Ataatsimiinnerni ilinniar­titseqataagaangavit eqqaamassavat illit oqaatsitit tusarnaartivit sunnerneqaatigingaarsin­naagaat. Taamaattumik eqqarsaatigiuk siunnersuutit sammisassagut qanoq maleruarsin­naanerlugit. Taakku tamanut oqalugiar­tartunut tunnganerugaluarlutik qaqisartunut tamanut iluaqutaasin­naapput. – Tim 2. 4:2; Tit 1:9.

9. Oqalugiaatit malinnaaf­figiuminar­niassammat qanoq iliorsinnaavit?

⁹ Eqqartugassatit tulleriis­sarluakkit. Oqalugiartartut oqalugiaatimik malinnaaf­figiuminar­tuunissaat kissaatigisarpaat. Eqqartukkatit paasiuminaap­pallaarpata tusarnaartitit allamut saaqqajaalersin­naapput. Oqalugiaatinni sammisassatit qanoq tulleriis­sarluarsin­naavigit? (1) Oqalugiaativit aallartinnerani ersarissumik oqaatigiuk suut eqqartor­niarnerlugit. (2) Sammisat ataasiak­kaarlugit eqqartukkit. Pitsaassaaq sammisamut allamut ingerlaq­qinnginninni unikaal­lattaruit ingerlaq­qitsinnallu sammisassaq tulliuttoq taaqqaar­tarukku. (3) Oqalugiaatit naggaserlugu uteqqiigit.

10. Oqalugiaatigisassanni sammineqartut sooq nammineq nuannaarutigis­savigit?

¹⁰ Oqalugiaatigisassanni sammineqartut nammineq nuannaarutigikkit. Oqalugiaatissat nammineq nuannarigukku pikkusullutit oqalugiarsin­naassaatit. (Uss 2:4, 5; ApS 4:20) Oqalugiaammi sammisassat allassimaffiillu eqqarsaatigeq­qissaarukkit oqalugiaammi ilinniar­titsissutigineqartut nuannaarutiginerulis­savatit. Qatanngutip angutip 70-it sinnerlugit ukiullip USA-mi najugallip inuusut­tuaraalluni oqalugiaatigineqartoq suli eqqaamavaa. Ima oqarpoq: “Eqqaamavara kajumis­saarneqarluta Guutip oqaasiani atuakkagut eqqarsaatigeq­qissaar­tassagigut. Oqalugiartup ersarissumik nassuiaap­paatigut qanoq iliorsin­naasugut, takusin­naavaralu taamaaliortarneq nammineq pingaartikkaa. Oqalugiaat tamanna pissutigalugu inuunera allanngorpoq, tassami Biibilimik atuartarninnut Jehovamullu attaveqarninnut sunniuteqangaarpoq.”

11. Oqalugiaatit sunniuteqarluar­niassammat qanoq iliorsinnaavit? (Timuutiusimut 1. 4:13-16)

¹¹ Tusarnaartivit pisariaqartitaat eqqarsaatigikkit siunnersuuteqarlutillu. Sammisaq pillugu paasissutis­siiginnarnak Biibili atorlugu aalajangersimasunut tunngatillugu kajumis­saarisarit siunnersuuteqarlutillu. Paulusi taamaaliortarpoq. Timuutiusi siunnersorpaa Efesossimi ilagiit ikiortillugit anersaakkut nukittujuarsin­naaqqullugu. (Timuutiusimut 1. 4:13-16 atuakkit). Eqqarsaatigiuk tusarnaartivit suut pisariaqar­tinneraat, oqalugiaatinnilu sammisatit inuunerminni qanoq atorsin­naagaat paasinnin­nissaannut ikiukkit.

12. Sooq oqalugiar­tilluni atuffas­serpalaan­ngitsumik oqalunnissaq pingaaruteqarpa?

¹² Oqalugiar­tillutit atuffas­serpalaan­ngitsumik oqalunnias­sagavit sungiusartarit. Oqaasissatit tamaqqissaasa allariarlugit oqalugiarninni atuaannarukkit tusarnaartitit allamut saaqqajaalersin­naapput. Ulluinnarnili oqaluttarnittut oqalullutit oqalugiaruit tusarnaartivit malinnaanissartik ajornan­nginnerutissavaat paasisaqar­nerussal­lutillu. Quppersakkami Atuffas­sinermut ajoqersuinermullu pikkorin­nerulerit-mi ima siunnersuuteqarpoq: “Pisarnittut uummammillu pisumik oqalugit. … Eqqarsaatigiuk sooq tusarnaartivit tusarliussassaq tusartariaqaraat.” Uummammit pisumik oqalukkuit uummaarin­nerusumik, soqutigin­ninnerulersitsisumik kajumis­sinarnerusumillu saqqummius­sissaatit.

13. Sooq oqalugiarnermik misilit­tagaqarluartup siunnersuutis­sarsiorfiginissaa pitsaava? (Aamma asseq takuuk).

¹³ Oqalugiarnermik misilit­tagaqarluartumut siunnersoqqugit. Qanoq taamaaliorsinnaavit? Oqalugiarnermut najoqqutas­siarisimasat oqalugial­laqqissumut takutis­sinnaavat siunnersuutaalu oqalugiarninni maleruarlugit. Aamma oqalugiartissat sungiusar­tillugu ilinniar­titsinermi qanoq pikkorin­nerulersin­naanersutit maluginiaq­qusinnaavat siunnersuuteqaq­qullugulu. (Uss 1:5) Suut sulissutigisariaqar­nerlugit sammisagullu paasiuminartumik saqqummiut­tarnerlugit nammineq nalileruminaatsis­sinnaavagut. Taamaattumik siunnersoq­qusarutta pikkorin­nerulersin­naavugut. Biibilimi ilumoortut naleqangaartut tusarnaartitta paasilluar­niassam­matigit iluaqutiginias­sammatigillu oqalugiarnermi ilinniar­titsinermilu pikkorin­nerulerusuppugut.a

QANOQ TUSARNAAL­LAQQINNERULERSIN­NAASUGUT

14. Guutip eqqaasitsissutai qanoq isiginnit­taaseqarfigis­savagut? (Tussiaat 119:24, 111, 167)

¹⁴ Jehovap eqqaasitsissutai naleqar­tinnerulikkit. ‘Ulluni kingullerni pissutsini anigoruminaatsuni’ ajornar­torsiutit naammagalugit atornis­saannut Guutip eqqaasitsissutai pisariaqar­tippagut. (Tim 2. 3:1) Ilaannikkut ataatsimiinnerni saqqummiun­neqartut uteqattaar­neqarsorisarutsigit pitsaassaaq Tussiaat 119-imik allattup Guutip eqqaasitsis­sutaanut isiginnittaasia eqqarsaatigeq­qissaarlugulu ilaarniarutsigu. – Tussiaat 119:24, 111, 167 atuakkit.

15. Ataatsimiinnerni anersaakkut inuussutissat pisartakkagut naleqar­tittuas­sagutsigit suna iluaqutigis­savarput?

¹⁵ Anersaakkut inuussutissat Jehovamit tunissutaanerat eqqaamajuas­savarput. Israalikkut inoqajuitsumiitillutik Jehovamit inuussutissanik mannanik tunineqartut ilinniutigisin­naavagut. (Mos 2. 16:15, 31) Qularnan­ngitsumik aallaqqaammut mannat qujamasuutigingaarpaat. Jehovameersuuppummi, mamarput, inuussutigisin­naavaallu. Piffissalli ingerlanerani ilaasa ullut tamaasa mannator­tuarneq qatsutilerpaat. (Mos 4. 21:5) Nalitsinni ataatsimiinnerni ilisimariikkagut sammikulasarpagut. Kisianni eqqaasitsissutit taakku naleqar­tikkunnaas­sanngilagut. Israalikkutut Jehovamit tunissutaasunik qujamasuutigin­nikkunnaartutut innata ataatsimiinnerit Jehovamit tunissutaasut qujamasuutigiuas­savagut. Aamma eqqaamas­savarput sammineqartut Jehovap peqatigiis­sortaanit piareersagaal­luartuusut. Ilikkakkagut iluaqutigalugit silatusaartumik aalajangiisarsin­naavugut naassaan­ngitsumillu inuusin­naalluta. – Uss 3:13, 16-18; Joh 17:3.

16. Ukiorpassuarni Jehovamut kiffartorsimasut ataatsimiinnerni tusarnaaq­qissaar­nissamut suut iluaqutigisimavaat? (Aamma ungalusaq “Tusarnaarluar­nissamut siunnersuutit” takuuk).

¹⁶ Siunnersuutit tulliuttut maleruakkit. Ukiorpassuarni Jehovamut kiffartorsimasut ataatsimiinnerni tusarnaarluar­nissamut suut iluaqutigisimavaat? Ashley, ukiut 30-t sinnerlugit Jehovamut kiffartorsimasoq, ima oqarpoq: “Ataatsimiinnernut piareersarneq malinnaal­luarnissamut pisariaqarluinnarpoq. Piareersarsiman­ngikkaangama akissuteqarnissaq sapernar­tittarpara eqqarsaatikkalu allamut saaqqajaasarlutik.” József, ukiuni 52-ini Jehovamut kiffartorsimasoq ima oqarpoq: “Ilisimariikkakka ataatsimiinnerni sammeqqik­kaangatsigit nuannarisarpara. Oqalugiaatit akissuteqartullu tusarnaaraangakkit sammisaq itinerusumik paasisarpara.” Aamma oqarpoq: “Oqalugial­laqqittorsuun­ngitsoq oqalugiaraangat oqaloriaasia pinnagu oqariartuutaa Biibilimeersoq eqqarsaatiginiar­nerusarpara.”

17. Tusarnaarluas­sagaanni aamma qanoq iliortoqarsinnaava? (Aamma asseq takuuk).

¹⁷ Ataatsimiinnerni tusarnaarluar­niassagavit ilaatigut ima iliorsin­naavutit: (1) Ataatsimiigian­nginninni nerisaruit uernarpal­laanngin­niassagavit nerival­laarnaveersaarit. (2) Ataatsimiinnerup aallartin­nginnerani siusinaarlutit isertarit issiavis­sannillu innimin­niillutit. (3) Ataatsimiinnerup nalaani mobilinnit tabletin­nilluunniit akornuser­neqannginnissat qulakkeeruk. (4) Suut sammineqas­sanersut eqqarsaatigereertaruk. (5) Allamut saasartin­nginnias­sagavit oqalugiartoq isigisaruk. (6) Sammineqartuni pingaar­nerusunik allattuigit titartaal­lutilluunniit. (7) Allassimaffiit sammineqartut imminnullu qanoq atassuteqarnerat eqqarsaatigikkit. (8) Una eqqarsaatigiuk: ‘Uppeqatiga oqaluus­siffigisaraluunniit ikiorniarlugu sammineqartut qanoq atorsin­naavakka?’ (9) Ataatsimeersuan­nginnermi ullormut sammineqartussaq, oqalugiaatit qulequtaat allassimaffiillu atuariarlugit eqqarsaatigisakkit. (10) Ataatsimeersuarnerni Jehovamit ilinniar­tinneqar­nissannut piareersimanias­sagavit saqqummius­sisoqan­nginnerani nipaallutit nipilersukkat videullu malinnaaf­figilluartakkit.

JEHOVA TUSARNAARTUARUK

18. Sooq ataatsimiinnerni tusarnaarluar­tuassaagut?

¹⁸ Ataatsimiinnerni tusarnaarluar­tuarnissarput pingaaruteqarpoq, Jehovammi taakku aqqutigalugit siulersor­tarmatigut. (Tuss 23:3; 31:4) Umiatsiatut tissukartutut innginnias­sagatta Jehovap siulersuinera pisariaqar­tipparput. Taamaattumik ‘qanoq tusarnaarluar­tiginerlutit eqqumaf­figisaruk’ ataatsimiin­nernilu ilinniar­titsissutigineqartut maleruar­tarlugit. (Luk 8:18) Jehovamik tusarnaartut maanna pilluassapput siunissamilu naassaan­ngitsumik inuussallutik. – Tuss 119:2, 14.