Ilagiinni oqaluus­sisartoqatigiit iluaqutigaagut

1-2. Sooq oqaluus­sisartoqatigiinnut ilaanerput iluaqutaava?

EQQAAMAVIUK oqaluus­sisartun­ngornissannut akuerineqaravit? Jehovap aqqanik unnersiutigin­nittorparpas­suarnut ilaalernerit nuannaarutigisimassavat. (Tuss 148:1, 2, 12, 13) Aammali ilagiinni eqimattan­nguanut – oqaluus­sisartoqatigiinnik taaneqartunut – ilaalerputit.a Jiisusip malinnitsini peqquai Guutip kunngeqarfia pillugu nutaarsiassat nuannersut ‘nunarsuaq tamakkerlugu oqaluus­sissutigineqassasut’. Taamaalior­nissatsinnut ilagiinni oqaluus­sisartoqatigiit iluaqutigingaarpagut. – Mat 24:14.

² Oqaluus­sisartoqatigiinnut ilaanerit qanoq igaajuk? Qatanngut arnaq Wendymikb atilik ima oqarpoq: “Ilagiinni aaqqissuussaaneq tamanna iluaqutigeqaara. Assersuutigalugu oqaluus­sisartut allat ilinniarfigalugit oqaluus­sinermi ilinniar­titsinermilu pikkorin­nerulerpunga, anersaakkut ittunik anguniagaqar­nissamut kajumis­saarneqarpunga, oqaluus­sisartoqatigiinnilu qanimut ikinngutitaarpunga.” Qatanngut angut Richimik atilik ima oqarpoq: “Oqaluus­sisartoqatigiinnik nakkutilliisup akisussaaffia pingaaruteqarluinnarpoq. Oqaluus­sisartut ilaasa inuk imermut morsutsin­neqarnissaanut ikiortarpaat, oqaluus­sisartoqatigiinnilli nakkutilliisup inuk taanna anersaakkut siumukar­nissaanut ukiuni arlalinni ikiorsinnaavaa.” Dinah, qatanngut arnaq alla, ima oqarpoq: “Oqaluus­sisartoqatigiinnut ilaanera nuannareqaara! Taakku ilaquttattut isigaakka.”

3. Allaaserisami matumani suut sammissavagut?

³ Allaaserisami matumani sammeqqaas­savarput oqaluus­sisartoqatigiinnik nakkutilliisoq ikiortaalu qanoq akisussaaf­feqartut uppeqatiminnillu qanoq ikiuisinnaasut. Aamma sammissavarput immikkut tamatta oqaluus­sisartoqatigiit ilagisagut qanoq tapersersorsin­naagigut. Kiisalu oqaluus­sisartoqatigiit qanoq iluaqutigisin­naanerlugit paasissavarput.

OQALUUS­SISARTOQATIGIINNIK NAKKUTILLIISOQ IKIORTAALU

4. (a) Oqaluus­sisartoqatigiinnik nakkutilliisoq sumik akisussaaf­feqarpa? (b) Oqaluus­sisartoqatigiinnik nakkutilliisoq qanoq oqaluus­sisartunik ikiuisarpa? (Takuuk ungalusaq “Oqaluus­sisartoqatigiinnik nakkutil­liisumut siunnersuutit”).

⁴ Oqaluus­sisartoqatigiinnik nakkutilliisoq utoqqaanertaavoqc gruppimi oqaluus­sisartut anersaakkut siumukar­nissaannik ikiuinissamik akisussaaffilik. Qanoq taamaaliortarpa? Siullertut, oqaluus­sisartoqatigiin­niittut inuttut soqutigingaarpai. (Uss 27:23) Ilisarisimal­luarpai oqaloqatigikulasarlugillu. Taamaalior­nermigut taakkua anersaakkut, misigis­sutsikkut timikkullu pisariaqartitaat eqqumaf­figisinnaavai asannit­tumillu isumassorlugit. (Uss 12:25; Es 32:2; Jaak 2:15-17) Aappaattut, sapinngisamik oqaluus­siuarnis­saannut kajumis­saartarpai ikiorlugillu. Oqaluus­sinermi aallussil­luarluni peqataasarpoq, ingammik weekendini. Oqaluus­sisartoqatigiin­niittut qiimmas­sarniarlugit oqaluus­sinermilu pikkorin­neruler­niassammata oqaluus­seqatigisarpai. Ilaannikkut nammineq oqaluus­sinermi peqataasin­naanngik­kaangami oqaluus­sisartoqatigiinni ikiortimut oqaluus­sisartumul­luunniit allamut piukkun­naatilimmut isumagisas­sanngor­tissavai. Pingajuattut, qatanngutit angutit ilagiinni akisussaaf­feqarnerulersin­naaqqullugit ikiortarpai. (Tim 1. 3:1) Nersualaarinikkut, Biibilimeersunik siunnersuinikkut ilitsersuinikkullu qatanngutit angutit ilagiinni kiffartor­tunngor­nissaannut utoqqaaner­tanngor­nissaannullu ikiortarpai. Oqaluus­sisartoqatigiinnik nakkutilliisup suliaa pingaaruteqangaarmat utoqqaaner­taqatigiit qatanngummik piukkun­naateqar­nerpaamik taamatut akisussaaf­filiisarput.

5. Oqaluus­sisartoqatigiinnik nakkutilliisut ilaat sunik ajornar­torsiuteqartarpat?

⁵ Oqaluus­sisartoqatigiinnik nakkutilliisoq suliamini ajornar­torsiuteqarsin­naasarpoq. Assersuuteqariarta. Utoqqaanertat allat assigalugit Jörg, oqaluus­sisartoqatigiinnik nakkutilliisoq Tysklandimeersoq, ilagiinni arlalinnik akisussaaf­feqarpoq. Ima oqarpoq: “Ilagiinni suliassarpassuama naammattumik piffissaqarfiginissaat ajornakusoor­tittarpara. Taamaattumik oqaluus­sisartoqatigiin­niittut tamaasa immikkut oqaloqatiginis­saannut ilaannikkut piffissaqan­ngitsoor­tarpunga.” Abel, utoqqaanertaq 70-nik ukiulik Ugandameersoq ima oqarpoq: “Ilagiinni kiffartortut utoqqaanertallu ikittuin­naammata oqaluus­sisartut oqaluus­sisartoqatigiinni amerlapput. Taamaattumik oqaluus­sisartut ataasiakkaat qiimmas­sarlugillu oqaluus­seqatigisarsin­naanngilakka, naak tamanna kissaatigigaluarlugu.” Aamma Obed, utoqqaanertaq Surinamimeersoq, ima oqarpoq: “Qatanngutinik angutinik ilinniar­titsineq nuannaraara. Piffissaqarnerli nukissaqarnerlu pisariaqarput. Ilaannikkullu ilinniar­titakka ingerlaannaq siumukarneq ajorput. Taamaattumik aamma allanik suliassaqarama qatanngutinik angutinik ilinniar­titsinera tunulliut­toortarpara.” Utoqqaanertat taamatut ajornar­torsiuteqartut susinnaappat?

6. Sooq oqaluus­sisartoqatigiin­niittut amerlaval­laannginnerat iluaqutaasarpa?

⁶ Oqaluus­sisartoqatigiin­niittut amerlaval­laanngik­kaangata nakkutilliisup oqaluus­sisartut tamaasa ilisarisimal­luarnerulersin­naallugillu anersaakkut ikiorluar­nerusinnaavai. Taavami ilagiinni ikittuinnarnik utoqqaaner­taqarpat? Oqaluus­sisartoqatigiinnik nakkutilliisup amerlasuut ataatsikkut isumagil­luarsin­naanngimmagit utoqqaaner­taqatigiit aalajangersin­naapput ilagiinni kiffartortup oqaluus­sisartoqatigiit isumagigal­lassagai. Oqaluus­sisartoqatigiin­niittut ikittuin­naappata oqaluus­sisartoqatigiinnik nakkutilliisup suliassamini pingaar­nerpaaq – tassa uppeqatimi anersaakkut paarilluar­nissaat – isumagisin­naassavaa.

7. Oqaluus­sisartoqatigiinnik nakkutilliisup ilagiinni ikittuinnarnik utoqqaaner­talinni oqaluus­sisartut paarill­luarnissaat qanoq qulakkeersinnaavaa? (Petrusimit 1. 5:2) (Aamma asseq takuuk).

⁷ Ilagiinni ikittuinnarnik utoqqaaner­talinni illit oqaluus­sisartoqatigiinnik nakkutil­liisuuguit ikiortivit Guutip savaataanik paarsinissaanik ilinniar­tinnissaa pingaartiguk. (Petrusimit 1. 5:2 atuaruk). Illit suliassavit ilaat ikiortinnut tunniuk­kallarsinnaavat. Assersuutigalugu weekendit ilaanni oqaluus­sinermi siulersuisin­naasarpoq. Ikiortillu oqaloqatigisaruk oqaluus­sisartut qanoq oqaluus­sillaqqin­nerulersin­naanersut Jehovamullu attaveqarluarsin­naanersut. Oqaluus­sisartoqatigiin­niittut pulaaraangakkit ikiortit ilagisaruk siornalu kingornalu siunnersorlugu. Imaassinnaavoq ikiortit siunissami nakkutil­liisunngor­nissamut piukkun­naateqalissasoq. (Tim 2. 2:2) Aamma oqaluus­sisartut allat aperisin­naavatit ikiuussin­naanersut. Assersuutigalugu pionerit misilit­tagaqartullu allat oqaluus­sisartun­ngorlaanik misilit­tagakitsunillu ikiuisin­naapput. Oqaluus­sinermi qanoq oqaloqateqar­toqarsin­naanersoq, qanoq pulaaqqiisoqarsin­naanersoq qanorlu Biibilimik ilinniar­titsisoqarsin­naanersoq nassuiaasin­naapput. Maanna sammeriartigu immikkut tamatta oqaluus­sisartoqatigiit pingasutigut qanoq tapersersorsin­naanerigut.

OQALUUS­SISARTOQATIGIIT ILAGISATIT TAPERSERSUKKIT

8. Oqaluus­sisartoqatigiit ilagisagut qanoq tapersersorsin­naavagut? (Romamiut 1:12)

⁸ Oqaluus­seqataasarit. Uppeqatigut oqaluus­seqatigigaangatsigit ‘tamatta qiimmas­saqatigiit­tarpugut’. (Romamiut 1:12 atuaruk). Arlaliulluta oqaluus­seqatigiit­tarnerput sapiillisitsisarlunilu sumiiffiit ilaanni isumannaan­nerusarpoq. Suliffiit pissutigalugu oqaluus­seqataanissat ajornakusoor­tittarpiuk? Taamaappat oqaluus­sinermi peqataanias­sagavit suliffinni pisortaasoq aperisin­naaviuk piffissami aalajangersimasumi sulisarnitit allanngor­tissinnaanerlugit? Immaqa akuersissaaq. (Neh 2:4-6) Peqqiil­liornerit utoqqalineril­luunniit pissutigalugu oqaluus­sisartoqatigiit ilaginis­saannut ajornakusoor­titsivit? Taamaappat oqaluus­sisartoqatigiinnik nakkutilliisoq oqaloqatigisinnaavat. Taava immaqa oqaluus­sisartoqatigiit Zoomikkut, allakkatigut oqarasuaatik­kulluunniit oqaluus­seqatiginis­saannik aaqqissuus­sissaaq. Inuusuttuuit peqqissoq akuttoqatigiimmilli oqaluus­seqataanissamik ajornakusoor­titsisoq? Taamaappat oqaluus­sisartoqatigiin­niittut ilaannik aalajangersimasumik sapaatit-akunneri tamaasa oqaluus­seqateqar­tarnissat pilersaarusiorsinnaavat. Immaqa inuuninni suna pingaar­nerutin­niarnerlugu eqqarsaatigissavat, piffissamil­luunniit atuinissanni allannguilaarnissat pisariaqarsinnaavoq. (Rom 12:11; Kol 4:5) Taama suliniuteqarneq pitsaassaaq. Jehova qinunikkut saaffigisaruk. Jehovammi ‘piumassuseqalersil­lutillu pissatsis­sinnaavaatit’. – Flp 2:13.

9. Oqaluus­sisartoqatigiin­niittut qanoq asanninnermik ersersitsivigisin­naavigit? (Romamiut 12:13)

⁹ Asanninnermik inoroorsaar­nermillu ersersitsigit. ‘Inoroorsaarneq ileqquliuk­kutsigu’ oqaluus­sisartoqatigiin­niittut asaneqartutut misigitis­sinnaavagut. (Romamiut 12:13 atuaruk). Angerlarsimaf­fitsinni katersuutsitsisin­naavugut? Ilagiit ilaanni oqaluus­sisartoqatigiit oqalugiariarluni tikeraartup nereqatiginissaanut aaqqissuus­sisinnaapput. Oqalugiarsimasoq pisinnaan­ngikkaluartoq gruppit ilaat nereqatigiin­nissamut katerisimaartarput. Specialpioneri Sarahmik atilik ima oqarpoq: “Qaaqqusiniaraangama ernumaam­mertarpunga, taamaattumik pisariitsunik piareersaaniar­tarpunga. Allat ilisarisimaneruler­niarsarisarpakka pisariusunillu nerisas­siornaveersaar­tarlunga.” Oqaluus­sisartoqatigiinnut asanninneq inoroorsaarnerlu ineriar­tortikkutsigu Jehovamut immitsinnullu qanimut attaveqar­nerulissaagut. – Neh 8:10; ApS 20:35.

10. Oqaluus­sinermi pikkorin­nerulerusukkutta susinnaavugut? (Ussatit 1:5; 27:17) (Aamma asseq takuuk).

¹⁰ Oqaluus­sillaqqin­nerulerit. Oqaluus­sinermi ilinniar­titsinermilu pikkorin­nerulerutta oqaluus­sisartoqatigiin­niittut oqaluus­seqatigisar­nissaat nuannarinerulis­savarput. Arlaatigut pikkorin­nerulersinnaavit? Oqaluus­sisartoqatigiin­niittut ilaat ikiortiserisinnaavat. (Ussatit 1:5; 27:17 atuakkit). Oqaluus­sisartoqatigiinnik nakkutilliisoq sumik anguniagaqar­nerlutit oqaluttuuguk. Immaqa ikiorsin­naavaatit. Imaluunniit pionerimut oqaluus­sisartumul­luunniit allamut ikioqqusin­naavutit. Qatanngut arnaq Heather ikioqqunissamut ittooraluarluni taamaaliorpoq. Ima oqarpoq: “Pionereq aperaara pulaaqqiinissannut ikiorsin­naaneraanga. Asannittuuvoq inussiar­nersuullunilu. Oqaluus­sisalerpugut, allaallu pulaaqqit­takkama ilaannik Biibilimik misissueqateqaler­nissannut ikiorpaanga. Ikioqqunera nuannaraara maannami oqaluus­sinermik nuannarin­neqqilerama.” Oqaluus­sisartoqatigiit tapersersorumallugit tamatta iliuuseqangaarsin­naavugut.

OQALUUS­SISARTOQATIGIIT ILAGISATIT QANOQ ILUAQUTIGISIN­NAAGITIT

11-12. Oqaluus­sisartoqatigiit qanoq anersaakkut iluaqutigisin­naavigit? Misigisaq oqaluttuariuk.

¹¹ Anersaakkut iluaqutissartai. Immikkut tamatta oqaluus­sisartoqatigiit anersaakkut iluaqutigisin­naavagut. Assersuutigalugu ilagiinni Jehovap erligisai immikkut pisariaqar­titallit – uillarnerit, iliarsuit utoqqaallu – nakkutil­liisumit qiimmas­sarneqarlutillu ikiorneqarsin­naapput. (Tes 1. 2:8; Jaak 1:27) Aamma oqaluus­seqatigiit­tarnitsigut oqaluus­sinermi pikkorin­neruler­tarpugut. Qatanngutillu angutit ilagiinni iliuuseqar­neruler­nissaannut ikiorneqarsin­naapput. – Tim 1. 3:10.

¹² Maluginiaruk Wendy, siusinnerusukkut eqqaaneqartoq, qanoq misigisimasoq. Ima oqarpoq: “Ataataga upperisatsinnik akerlilersuisuummat anaanaga weekendini oqaluus­sisartoqatigiit ilagalugit nalunaajaaqataasin­naasanngilaq. Uangali taamaaliorsin­naasarpunga. Pionerip utoqqaap oqaluus­seqatigisarpaanga, ikinngutigiilerpugullu. Oqaluus­sinermi ilagiinnilu iliuuseqar­neruler­nissannut ikiorpaanga. Oqaluus­sisartoqatigiinnik nakkutilliisup arlaleriarluni asannilluni Biibilimeersumik siunnersor­tarsimavaanga, siunnersuutaalu suli iluaqutigisarpakka.”

13. Oqaluus­sisartoqatigiit tapersersor­tarutsigit qanoq misigis­sutsikkut iluaqutigisin­naavagut? (Aamma asseq takuuk).

¹³ Misigis­sutsikkut iluaqutissartai. Oqaluus­sinermi ‘tamaviaaqatigiik­kaangatta’ ikinngutigiil­lualertarpugut. (Flp 1:27) Oqaluus­sisartoqatigiin­niittut ikittuin­naammata ittoortut inuppassuillu akornanni tunuarsimaartut ikinngutitaar­nissaat ajornan­nginnerusarpoq. (Kor 2. 6:13) Napparsimagaangatta, nikallungagaangatta asasamil­luunniit annaasaqaraangatta ikinngutitta taakkua tuppallersar­tarsinnaavaatigut. (Tes 1. 5:14) Annikil­liornar­tussarsuaq qanilliar­tortillugu qanimut ikinnguteqarnerput pisariaqar­nerulissaaq. (Mat 24:21) Asannittunik ikiuiumatuunillu ikinnguteqaratta ajornar­torsiutit naammagalugit atornis­saannut iluaqutaangaarpoq. – Uss 17:17.

14. Ajornar­toortoqar­tillugu oqaluus­sisartoqatigiit qanoq iluaqutigisin­naavagut?

¹⁴ Ajornar­toortoqar­tillugu iluaqutissartai. Nappaalanersuaqar­tillugu, ajunaar­nersuaqar­tillugu malersugaanermilu oqaluus­sisartoqatigiit aqqutigalugit pisariaqar­titatsinnik ikiorneqarsin­naavugut. Assersuutigalugu ilagiinni tamani kiffartornermut ataatsimiititaliaq oqaluus­sisartoqatigiinnillu nakkutilliisut pilersaarusiortarput immikkut pisariaqar­titallit qanoq ikiorneqarsinnaasut. Ajornar­toortoqar­tillugu oqaluus­sisartoqatigiinnik nakkutilliisut oqaluus­sisartut attaveqarfigissavaat paasiniarlugu arlaat nakorsamit ikiorneqar­tariaqarnersut, nerisassanik, imermik, atisanik inigisamil­luunniit pisariaqar­titsinersut. Oqaluus­sisartoqatigiinni isumassorluar­neqartarpugut, ilaa?

15. Jehovap kiffai tamarmik sumik anguniagaqarpat?

¹⁵ Jehovap qilammi nunarsuarmilu kiffai aalajaatsut amerlaqaat. Qilammi millionilip­passuarnik inngileqarpoq. Nunarsuarmilu oqaluus­sisartut 9 millioninit amerlanerupput sulilu amerliar­torlutik. (Zak 8:23; Saqq 5:11) Taakkua tamarmik Jehova guutisiorfigaat kunngeqarfialu pillugu nutaarsiassat nuannersut sapinngisaminnik oqaluus­sissutigisarlugit! (Saqq 14:6, 7) Ilagiinni oqaluus­sisartoqatigiit iluaqutigalugit Jehova uummatikkut iluunngarluta unnersiutigisigu. – Tuss 111:1.