Utoqqaasusi, ilagiinnit erligineqangaarpusi

Immaqa aamma illit inuusunninni iliuuserisimasarpas­suattut iliuuseqarsin­naanngilatit. Naak ukiorpassuarni Jehova aalajaaf­figisimagaluarlugu immaqa utoqqalillutit atukkatit allanngorsimammata imminut pillutit nikallor­nartunik eqqarsaatersor­tarputit. Taamaas­simappat taava suna qiimmas­saatigisin­naaviuk?

JEHOVAP QANOQ PIUMASAQARFIGAATIT?

Imminut ima aperigit: “Jehovap qanoq piumasaqarfigaanga?” Makkorsi 12:30-mi allassimasut tuppallersaatigisin­naavatit, ima allakkami: ‘Jehova Guutit uummatit tamakkerlugu, tarnit tamakkerlugu, isumat tamakkerlugu nukitillu tamakkerlugit asassavat.’

Allassimaffik naapertorlugu Jehovap piumaffigaatit illit atukkatit naapertorlugit sapinngisannik guutisius­sasutit. Taamaattumik allanut naleqqiun­naveersaar­tassaatit – imaluunniit qanga iliuuserisimasatit maanna pisinnaasannut naleqqiut­tassanngilatit.

Una eqqarsaatigiuk: Inuusuk­kallaravit taamanikkut atukkatit naapertorlugit sapinngisat tamaat Jehovamut kiffartorsimagunarputit. Maannalu qularnan­ngitsumik sapinngisat tamaat suli kiffartorputit. Taamatut eqqarsaruit paasinarsissaaq Jehovamut tunnius­sinnaasatit annikil­lisiman­ngitsut. Taamani pitsaanerpaamik tunisarsimavat sulilu ullumikkut pitsaanerpaamik tunisarlugu.

ALLANUT ILUAQUTAAL­LUARSIN­NAAVUTIT

Iliuuserisin­naajunnaakkatit kisiisa eqqarsaatiginagit utoqqartut periarfis­sarpassuatit eqqarsaatigikkit. Inuusuk­kallaravit iliuuserisin­naanngisatit ullumikkut utoqqartut iliuuserisin­naavatit. Assersuutigalugu imaaliorsin­naavutit:

Misigisimasatit allanut oqaluttuarisakkit. Jehovamut kiffartortut aalajaatsut utoqqalisimasut oqaasii uku eqqarsaatigeriakkit:

Kunngi Daavi: “Inuusut­tuusimavunga utoqqalisimal­lungalu maanna, takusiman­ngisaan­narpungali iluartumik qimagaasumik qitornaanil­luunniit nerisassanik qinnuuloortunik.” – Tuss 37:25.

Josva: “Maanna kikkulluunniit atorumaagaat atortus­sanngorpara, tamassilu uummatissigut tarnissigullu ilisimas­savarsi ajunngitsut Naalakkap Guutissi ilissinnut oqaatigisaasa ilaat ataasin­nguarluunniit qammuin­narsiman­ngitsoq. Tamarmik piviusun­ngorsimapput, oqaaseq ataasiin­narluunniit maangaan­narsimanngilaq.” – Jos 23:14.

Immaqa aamma illit allat qiimmas­sarlugit taama oqaaseqarsimavutit. Daavi Josvalu immikkut tamarmik ukiorpassuarni taama misigisaqarsimagamik oqaasii isumaqar­nerungaarpoq.

Illit aamma ukiorpassuarni Jehova kiffartorfigisimagukku misigisatit Jehovallu ikiuisimanera pillugit oqaluttuarisarsin­naavatit. Jehovap innuttaminik pilluaq­qusisimaneranik immikkut ittumik eqqaamasaqarpit? Tamakku oqaluttuarisakkit! Uppeqatitit misigisimasannik oqaluttuut­tarukkit qiimmas­saatigisin­naavaat, illit aamma qiimmas­saatigisinnaavat. – Rom 1:11, 12.

Aamma pisinnaagaangavit ornigullutit ataatsimiigiar­tarnikkut allat qiimmas­sarsinnaavatit. Ilinnullu tamanna aamma qiimmas­saataassaaq. Connie, siuliani eqqaaneqartoq, oqarpoq: “Ataatsimiinnerni najuuttarnera nikallun­nginnissannut iluaqutigisarpara. Uppeqatikka naalagaaf­filersaarfimmi ilagigaangakkit asanninnerat misigalugu nikallungaf­fissaanngilaq. Taakkununnga tunissuteqalaarnikkut qujamasunnera ersersin­niartarpara. Uppeqatima anersaakkut sammisaqaqatiginissaat pingaar­tippara.”

AALAJAANNERIT PILLUGU JEHOVAP ASAVAATIT

Pisinnaasaat killeqaraluartut sulili Jehovamit asaneqartut Biibilimi oqaluttuarineqarput. Israalikkuusoq utoqqaq, Jiisusip inunngornerata nalaani inuusoq, Simmiuut, eqqarsaatigiuk. Guutisiorfimmut iseraangami angutit inuusuttut pingaarutilinnik suliaqartut takusarsimas­sagunarpai. Namminermi? Immaqa Simmiuut eqqarsarpoq angutitut inuusuttutut ikkutut sulisin­naannginnami Jehovamit atorneqarsin­naajunnaarluni. Jehovali allatut isiginnit­taaseqarpoq. Jehovap Simmiuut angutitut ‘naapertuil­luartutut upperluar­tutullu’ isigaa naalungiarsummillu Jiisusimik takunnit­tussatut pisinnaatitaaf­feqartillugu. Allaat Jehovap Simmiuut Jiisusip Missiarsin­ngornissaa pillugu siulittuisippaa! (Luk 2:25-35) Ersarippoq timaa utoqqalisoq isiginiarnagu Jehovap Simmiuut angutitut upperluartutut isigigaa ‘anersaamillu illernartumik qulangersimaneqartikkaa’.

Aamma illit, naak pisinnaasatit killeqaraluartut, qularis­sanngilat aalajaallutit kiffartornerit Jehovap naleqar­tingaaraa. Jehovap “piginngisat naapertornagit pigisalli naapertorlugit tunissuteqar­toqartassasoq kajumilluni tunissuteqarneq pingaartumik iluaraa”. – Kor 2. 8:12.

Taamaattumik iliuuserisin­naasatit eqqarsaatigisakkit. Assersuutigalugu sivikitsun­nguamil­luunniit oqaluus­seriaatsit suut peqataaf­figisin­naanerlugit eqqarsaatigiuk. Sianernikkut kortinnguarmil­luunniit tunissuteqarnikkut qatanngutinik qiimmas­saasinnaavit? Asanninnermik ersersitsinerit annikitsun­nguilluunniit uppeqatinnut sunniutilerujus­suusinnaapput, pingaartumik ukiorpassuarni Jehovamut kiffartor­tuusimaguit.

Pisinnaasatit killeqaraluartut suli Jehovamut iliuuseqangaarsin­naavutit. Ungalusami “Inuuneranik annaasseqataasoq”-mi Afrikap Kangiani misigisimasaq atuaruk.

Eqqaamajuk illit maligas­siuillutit ukiorpassuarni Jehovamut kiffartorsimanerit sulilu aalajaallutit kiffartornerit allanut kajumis­saataangaarsin­naammat. Pinertusaarnikkut maligas­siuivutit, qularis­sanngilallu ‘Guutip naapertuil­luartuugami puiornavian­ngikkai illernartunik kiffartuus­sinikkut kiffartuus­siuarnikkullu iliuutsitit aterminullu asannit­tuliornerit’. – Hebr 6:10.

SAPINNGISANNIK IKIUUTTARIT

Misissuinerit takutippaat utoqqarpas­suarnik allanik ikiuisartut peqqinnerul­lutillu eqqarsarluarsin­naanerul­lutillu inuuneq­qortunerusartut.

Soorunami utoqqaliar­tornerup kingunipilui tamaasa ajunngitsuliornikkut peerneqarsin­naanngillat. Utoqqaliar­tornermut toqumullu pissutaasoq – naammal­luinnan­ngissuseq Adamimit kingornussarput – Guutip kunngeqarfiata atuukkun­naarsissavaa. – Rom 5:12.

Maannakkulli Jehovamut kiffartornerit, ilaatigut allat taassuminnga ilisarisiman­nilernis­saannik ikiuisarnerit, neriuutinnik nukittunerulersitsillunilu peqqissutsinnut iluaqutigisarpat. Utoqqaasutit, nalussanngilat upperluarlutit kiffartornerit Jehovap naleqar­tingaaraa ilagiinnullu erlinnangaar­tuusutit!